બર્લિન જર્મનીમાં ઉચ્ચ શિક્ષણ (હાયર એજ્યુકેશન) અથવા વ્યાવસાયિક તાલીમ (વોકેશનલ ટ્રેનિંગ) મેળવી રહેલા ભારત સહિત વિશ્વભરના આંતરરાષ્ટ્રીય વિદ્યાર્થીઓ માટે એક અત્યંત રાહતજનક અને મહત્વપૂર્ણ સમાચાર સામે આવ્યા છે. જર્મન સરકારે પોતાની ઇમિગ્રેશન નીતિમાં મોટો સુધારો કરતા જાહેરાત કરી છે કે, હવેથી વિદેશી વિદ્યાર્થીઓ તેમનો અભ્યાસ પૂર્ણ કર્યા પછી દેશમાં રહીને લાયકાત મુજબની યોગ્ય નોકરી શોધવા માટે પૂરા ૧૮ મહિના સુધી લંબાવી શકશે. આ નવીનતમ 'જોબ સીકર વિઝા' (Job Seeker Visa) પ્રણાલી અંતર્ગત વિદ્યાર્થીઓને વિદેશની ધરતી પર પોતાની કારકિર્દી બનાવવાની અદભુત સુગમતા અને વધુ સમય મળશે.
જર્મન ઇમિગ્રેશન વિભાગના જણાવ્યા અનુસાર, આ ૧૮ મહિનાના વિરામ દરમિયાન વિદ્યાર્થીઓ જેવી જ પોતાની લાયકાતને અનુરૂપ કોઈ પણ ફુલ-ટાઇમ નોકરી મેળવી લેશે, કે તુરંત જ તેઓ પોતાના જોબ સીકર વિઝાને 'વર્ક રેસિડેન્સ પરમિટ' અથવા તેમની ઉચ્ચ લાયકાતના આધારે યુરોપના પ્રતિષ્ઠિત 'EU બ્લુ કાર્ડ' (EU Blue Card) માં રૂપાંતરિત કરવા માટે પાત્ર બનશે. જે વિદ્યાર્થીઓ પાસે પહેલેથી જ કોઈ જર્મન કંપનીનો ઓફર લેટર અથવા રોજગાર કરાર ઉપલબ્ધ છે, તેમણે આ વિઝા લેવાની જરૂર નથી અને તેઓ સીધા જ વર્ક વિઝા માટે અરજી કરી શકે છે.
જોબ સીકર વિઝાના નિયમો અને અદ્ભુત ફાયદા
આ નવા વિઝા નિયમનો સૌથી મોટો ફાયદો એ છે કે સામાન્ય રીતે વિદ્યાર્થી વિઝા (Student Visa) પર કામ કરવા માટે અઠવાડિયામાં માત્ર ૨૦ કલાકની મર્યાદા હોય છે, પરંતુ જોબ સીકર વિઝા મેળવ્યા બાદ વિદ્યાર્થીઓ આ સમય મર્યાદાથી વધુ એટલે કે ફૂલ-ટાઈમ પણ કામ કરી શકશે. જો કે, વિદ્યાર્થીઓએ એ ખાસ ધ્યાનમાં રાખવું પડશે કે આ ૧૮ મહિનાની સમય અવધિ કોઈ પણ સંજોગોમાં આગળ લંબાવી શકાશે નહીં. જો કોઈ પ્રવાસી આ નિર્ધારિત સમયમાં નોકરી શોધવામાં અસમર્થ રહેશે, તો તેણે દેશ છોડવો પડી શકે છે. આ ઉપરાંત જર્મનીમાં રોકાણ દરમિયાન જે કંઈ પણ આવક થશે તેના પર સ્થાનિક ટેક્સ નિયમો લાગુ પડશે.
અરજી ક્યાં કરવી અને કયા દસ્તાવેજો છે જરૂરી?
આ વિઝા લંબાવવા માટે વિદ્યાર્થીએ જર્મનીમાં પોતાના રહેઠાણ વિસ્તારની સ્થાનિક વિદેશી કચેરી એટલે કે 'આઉસલેન્ડરબેહોર્ડે' (Ausländerbehörde - Foreigners Office) નો સંપર્ક સાધવો પડશે. ઇમિગ્રેશન વિભાગના મતે આ વિઝા પ્રોસેસિંગનો સામાન્ય સમય ૪ થી ૬ અઠવાડિયા જેટલો લે છે અને તેની સત્તાવાર અરજી ફી €૭૫ (આશરે ૭,૦૦૦ ભારતીય રૂપિયા) નક્કી કરવામાં આવી છે.
અરજી કરતી વખતે વિદ્યાર્થી પાસે સંપૂર્ણ ભરેલું ફોર્મ, માન્ય પાસપોર્ટ, વર્તમાન સ્ટુડન્ટ વિઝા, હેલ્થ ઇન્સ્યોરન્સ (આરોગ્ય વીમો) અને યુનિવર્સિટીની ડિગ્રી અથવા કોર્સ પૂરો કર્યાનું સત્તાવાર પ્રમાણપત્ર હોવું અનિવાર્ય છે.
આર્થિક સધ્ધરતાનો પુરાવો આપવો પડશે
આ વિઝા મેળવવા માટે આંતરરાષ્ટ્રીય વિદ્યાર્થીઓએ જર્મનીમાં રહેવા માટે પોતાની આર્થિક સક્ષમતા સાબિત કરવી પડશે. આ માટે તેમના 'બ્લોક્ડ એકાઉન્ટ' (Blocked Account) માં દર મહિનાના ખર્ચ પેટે ઓછામાં ઓછા €૧,૦૨૭ (આશરે ૯૫,૦૦૦ રૂપિયાથી વધુ) ની રકમ હોવી જરૂરી છે. અથવા તો જર્મનીમાં રહેતા કોઈ સંબંધી કે પ્રાયોજક (Sponsor) તરફથી તમામ ખર્ચ ઉઠાવવાની ઔપચારિક ગેરંટી આપતું ઘોષણાપત્ર રજૂ કરવું પડશે.
એક ખાસ નોંધવા જેવી બાબત એ છે કે, આ ૧૮ મહિનાની ગણતરી વિઝા અરજી કર્યાની તારીખથી નહીં, પરંતુ યુનિવર્સિટીનો અભ્યાસ સત્તાવાર રીતે પૂર્ણ થાય તે દિવસથી જ શરૂ થઈ જશે, તેથી વિદ્યાર્થીઓએ સમય બગાડ્યા વિના પોતાની જોબ પ્રોફાઈલ અને સમયરેખાનું આયોજન અગાઉથી જ કરી લેવું હિતાવહ છે.