જયપુર : નવી દિલ્હીના રાષ્ટ્રપતિ ભવન ખાતે વડા પ્રધાન નરેન્દ્ર મોદીની અધ્યક્ષતામાં યોજાયેલી નીતિ આયોગ ગવર્નિંગ કાઉન્સિલની ૧૧મી મહત્વપૂર્ણ બેઠકમાં રાજસ્થાનના મુખ્યમંત્રી ભજન લાલ શર્માએ રાજ્યના વિકાસની એક નવી અને ભવ્ય રૂપરેખા રજૂ કરી છે. વડા પ્રધાનના 'વિકષિત ભારત-૨૦૪૭' ના રાષ્ટ્રીય વિઝનને સાકાર કરવા માટે મુખ્યમંત્રીએ 'વિકષિત રાજસ્થાન-૨૦૪૭' ની વ્યાપક બ્લુપ્રિન્ટનું અનાવરણ કર્યું હતું. આ રોડમેપ દ્વારા રાજસ્થાનને આગામી સમયમાં દેશનું અગ્રણી ઔદ્યોગિક અને આર્થિક પાવરહાઉસ બનાવવાનો મજબૂત દાવો કરવામાં આવ્યો છે.
આ હાઈ-લેવલ બેઠકને સંબોધતા મુખ્યમંત્રી ભજન લાલ શર્માએ જણાવ્યું હતું કે, વડા પ્રધાન મોદીના નેતૃત્વમાં ભારત આત્મનિર્ભરતા, ટેકનોલોજી અને સુશાસનના નવા શિખરો સર કરી રહ્યું છે. રાજસ્થાન આ વિઝન સાથે સંપૂર્ણ કદમ મિલાવીને ચાલી રહ્યું છે. રાજ્ય સરકારે યુવાનો, ગરીબો, ખેડૂતો અને મહિલાઓને તમામ સરકારી નીતિઓના કેન્દ્રમાં રાખ્યા છે. રાજસ્થાનની સૌથી મોટી તાકાત તેની ૬૩ ટકા યુવા વસ્તી છે, જે રાજ્યના ભવિષ્યના વિકાસની અસલી ચાલક શક્તિ (ગ્રોથ એન્જિન) બનશે.
વર્ષ ૨૦૨૯ સુધીમાં $૩૫૦ બિલિયનની અર્થવ્યવસ્થાનું લક્ષ્ય
મુખ્યમંત્રીએ રાજ્યના આર્થિક લક્ષ્યાંકો જાહેર કરતા જણાવ્યું કે, હાલમાં રાજસ્થાન ૧૦.૨૪ ટકાના શાનદાર ગ્રોસ સ્ટેટ ડોમેસ્ટિક પ્રોડક્ટ (GSDP) વૃદ્ધિ દર સાથે આગળ વધી રહ્યું છે. આ મજબૂત પાયાના જોરે વર્ષ ૨૦૨૯ સુધીમાં રાજસ્થાનને ૩૫૦ અબજ ડોલર (૩૫૦ બિલિયન ડૉલર) નું અર્થતંત્ર બનાવવાનું લક્ષ્ય નક્કી કરવામાં આવ્યું છે. આ માટે રાજ્યમાં રોકાણકાર-મૈત્રીપૂર્ણ વાતાવરણ ઊભું કરવા ૩૫ થી વધુ નવી નીતિઓ અમલમાં મૂકવામાં આવી છે. અત્યાર સુધીમાં ૩૫ લાખ કરોડ રૂપિયાથી વધુના રોકાણ કરારો (MoU) થઈ ચૂક્યા છે, જેમાંથી ૯ લાખ કરોડ રૂપિયાથી વધુના પ્રોજેક્ટ્સનું ભૂમિપૂજન પણ થઈ ગયું છે. આ સિવાય સ્થાપિત થઈ રહેલી આધુનિક ૯ MMTPA રિફાઇનરી રાજસ્થાનના ઔદ્યોગિક ઇતિહાસમાં સીમાચિહ્નરૂપ સાબિત થશે.
કૃષિ ક્રાંતિ અને રોજગાર પર વિશેષ ભાર
ખેડૂતોને 'અન્નદાતા' માંથી 'ઉર્જાદાતા' અને બિઝનેસમેન બનાવવા માટે પીએમ-કુસુમ (PM-KUSUM) યોજના હેઠળ રાજસ્થાન ૭૨૩ મેગાવોટની ક્ષમતાવાળા ૪૯૬ સોલાર પ્રોજેક્ટ્સ સાથે દેશમાં પ્રથમ ક્રમે છે. આ ઉપરાંત પીએમ પાક વીમા યોજના હેઠળ ૨.૧૯ કરોડ વીમા પોલિસી ઈશ્યુ કરવામાં આવી છે. યુવાનો માટે કૌશલ્ય, રોજગાર અને સહકારી વિકાસ પ્રોગ્રામ શરૂ કરાયા છે. વડાપ્રધાનના 'મારું ભારત' અભિયાનમાં પણ ૧૮ લાખ યુવા નોંધણી સાથે રાજસ્થાન દેશમાં બીજા ક્રમે છે. મહિલા સશક્તિકરણ માટે 'લખપતિ દીદી' અને 'ડ્રોન દીદી' જેવી યોજનાઓ ગ્રામીણ અર્થતંત્રને વેગ આપી રહી છે, જ્યારે પીએમ પોષણ યોજનામાં રાજસ્થાન દેશમાં સતત બે વર્ષથી ટોચ પર છે.
'રાજ ઉન્નતિ' પ્લેટફોર્મથી પ્રો-એક્ટિવ ગવર્નન્સ
શાસનમાં પારદર્શિતા લાવવા માટે કેન્દ્રના 'પ્રગતિ' મોડેલના આધારે રાજસ્થાનમાં 'રાજ ઉન્નતિ' ડિજિટલ પ્લેટફોર્મ શરૂ કરવામાં આવ્યું છે, જેના દ્વારા ૨ લાખ કરોડ રૂપિયાના ૪૨ મોટા પ્રોજેક્ટ્સનું રિયલ-ટાઇમ મોનિટરિંગ થાય છે. ભ્રષ્ટાચાર સામે ઝીરો-ટોલરન્સની નીતિ અપનાવી સંપર્ક પોર્ટલ દ્વારા ફરિયાદ નિવારણનો સરેરાશ સમય ૨૮ દિવસથી ઘટાડીને માત્ર ૧૪ દિવસ કરી દેવામાં આવ્યો છે અને ૯૮% ફરિયાદોનો નિકાલ કરાયો છે. નીતિ આયોગના એસ્પિરેશનલ બ્લોક્સ પ્રોગ્રામ રેન્કિંગમાં પણ રાજસ્થાનના નીમરાના બ્લોકે દેશભરમાં બીજો ક્રમ મેળવ્યો છે.
પર્યાવરણ અને વારસાનું જતન
મુખ્યમંત્રીએ પર્યાવરણ અને સંસ્કૃતિના સંગમ પર પ્રકાશ પાડતા જણાવ્યું કે, પીએમ મોદીના 'એક પેડ મા કે નામ' અભિયાન હેઠળ રાજસ્થાને ૫ વર્ષમાં ૫૦ કરોડ વૃક્ષો વાવવાનું લક્ષ્ય રાખ્યું છે, જેમાંથી ૨૦ કરોડ છોડ રોપી દેવાયા છે. પાણીની તંગી દૂર કરવા 'કેચ ધ રેઈન' અને 'જલ સંચય જનભાગીદારી' અભિયાન ચાલી રહ્યા છે. આ સાથે જ ઐતિહાસિક શેખાવતી સંસ્કૃતિને જીવંત રાખવા ઝુંઝુનુ, ચુરુ અને સીકર જિલ્લાની ૬૬૦ થી વધુ પ્રાચીન હવેલીઓને સરકારી સહાયથી પ્રવાસન કેન્દ્રો (ટુરિઝમ યુનિટ્સ) તરીકે વિકસાવવામાં આવી રહી છે. ટૂંકમાં, રાજસ્થાન ટકાઉ પ્રગતિ અને સુશાસનના સથવારે આગામી સમયમાં દેશના વિકાસની સિકલ બદલવા સજ્જ બન્યું છે.