અયોધ્યા : અયોધ્યાના ભવ્ય રામ મંદિરમાં ભક્તો દ્વારા ચઢાવવામાં આવતા દાનની રકમમાં કથિત ઉચાપત અને નાણાકીય અનિયમિતતાઓનો વિવાદ ગુરુવારે વધુ વકર્યો છે. અત્યાર સુધી વિપક્ષી દળો દ્વારા કરવામાં આવતી ટીકાઓ વચ્ચે હવે રામ મંદિર ચળવળના અગ્રણી ચહેરો, ભાજપના વરિષ્ઠ નેતા અને બજરંગ દળના સ્થાપક વિનય કટિયાર પણ આ મામલે કૂદી પડ્યા છે. કટિયારે લખનૌથી અયોધ્યા પહોંચીને રામ મંદિરમાં મળેલા દાનની કથિત ચોરીના આરોપોની અત્યંત પારદર્શક અને નિષ્પક્ષ તપાસ કરવાની સણસણતી માંગ કરી છે, જેનાથી શ્રી રામ જન્મભૂમિ તીર્થ ક્ષેત્ર ટ્રસ્ટ પરનું દબાણ બમણું થઈ ગયું છે.
આરોપોની ગંભીરતા પર ભાર મૂકતા વિનય કટિયારે જણાવ્યું હતું કે, "આ આખા મામલાની બિલકુલ નિષ્પક્ષ તપાસ થવી જ જોઈએ. હાલમાં મારી પાસે એવી કોઈ પાકી માહિતી નથી કે ખરેખર મંદિરમાં કોઈ ચોરી થઈ છે કે નહીં. પરંતુ, જો આવા ગંભીર આક્ષેપો જાહેરમાં થઈ રહ્યા હોય, તો તેની તથ્ય આધારિત ચકાસણી થવી ખૂબ જ જરૂરી છે. આ મામલો દેશ અને દુનિયાના કરોડો રામભક્તોની અતૂટ શ્રદ્ધા, ભક્તિ અને આસ્થા સાથે જોડાયેલો છે, તેથી વહીવટમાં સંપૂર્ણ પારદર્શિતા હોવી જ જોઈએ."
૭ કરોડની ચોરી અને ૮ મહિનાના CCTV ફૂટેજ ગાયબ કરવાનો સનસનાટીભર્યો આરોપ
આ વિવાદની શરૂઆત ત્યારે થઈ જ્યારે રામ મંદિરના પૂર્વ એકાઉન્ટ્સ ઇન્ચાર્જ હોવાનો દાવો કરનાર મહિપાલ સિંહે એક ઈન્ટરવ્યુમાં બોમ્બ ફોડ્યો હતો. સિંહે આરોપ લગાવ્યો હતો કે મંદિરના પ્રસાદ અને દાનમાંથી અંદાજે ૭ કરોડ રૂપિયાની ચોરી કરવામાં આવી છે. તેમણે દાવો કર્યો કે આ કોઈ એક વખતની ઘટના નથી, પરંતુ મંદિરમાં દાનની ચોરી નિયમિતપણે થતી રહે છે.
મહિપાલ સિંહના જણાવ્યા અનુસાર, જ્યારે તેમણે આ આખી ગેરરીતિ અંગે ટ્રસ્ટના મહાસચિવ ચંપત રાય અને ટ્રસ્ટના સભ્ય ગોપાલ જીને લેખિત કે મૌખિક જાણ કરી, ત્યારે તેની તપાસ કરવાને બદલે બીજા જ દિવસે તેમને એકાઉન્ટ્સ ઇન્ચાર્જના પદ પરથી હાંકી કાઢવામાં આવ્યા હતા. સિંહે વધુમાં આક્ષેપ કર્યો છે કે કૌભાંડના પુરાવા મિટાવવા માટે મંદિર પરિસરમાંથી ૮ મહિના જૂના સીસીટીવી (CCTV) ફૂટેજ પણ ડિલીટ કરી નાખવામાં આવ્યા છે, અને જે કોઈ પણ આ આંતરિક ચોરી સામે અવાજ ઉઠાવે છે તેને નોકરીમાંથી બહાર કરી દેવાય છે.
સાધુ-સંતો અને શંકરાચાર્ય પણ તપાસના સમર્થનમાં આવ્યા
રામ મંદિર ટ્રસ્ટના પ્રમુખ મહંત નૃત્ય ગોપાલ દાસના પરમ શિષ્ય મહંત કમલ નયન દાસે પણ આ આક્ષેપોની પારદર્શક તપાસની હાકલ કરતા કહ્યું છે કે ભગવાનના ઘરમાં ચોરી કરનાર કોઈ પણ વ્યક્તિ 'દૈવી ન્યાય' થી બચી શકશે નહીં. બીજી તરફ, અયોધ્યાના પ્રાચીન દંત ધવન કુંડ આચારી મંદિરના મહંત વિવેક આચારીએ પણ માંગ કરી છે કે સત્ય જલ્દીથી જનતા સમક્ષ આવવું જોઈએ.
આ દરમિયાન ઉત્તર પ્રદેશના એટાહમાં બોલતા શંકરાચાર્ય સ્વામી અવિમુક્તેશ્વરાનંદે પણ આ વિવાદમાં ઘી હોમ્યું છે. તેમણે ગંભીર આરોપ લગાવતા કહ્યું કે, રામ મંદિરના શિલાન્યાસ સમારોહના સમયથી જ અનેક પ્રકારની અનિયમિતતાઓ અસ્તિત્વમાં છે. તેમણે મંદિર નિર્માણ દરમિયાન જમીનના ખરીદ-વેચાણના સોદાઓમાં થયેલી કથિત ગેરરીતિઓનો પણ ઉલ્લેખ કરીને વર્ષોથી ચાલી આવતી વ્યવસ્થા પર સવાલો ઉઠાવ્યા છે.
ટ્રસ્ટે તમામ આરોપો ફગાવ્યા
જો કે, બીજી તરફ શ્રી રામ જન્મભૂમિ તીર્થ ક્ષેત્ર ટ્રસ્ટે આ તમામ નાણાકીય અનિયમિતતા અને ચોરીના આરોપોને સદંતર પાયાવિહોણા ગણાવીને ફગાવી દીધા છે. ટ્રસ્ટનું કહેવું છે કે મંદિરના તમામ ખાતાઓનું નિયમિત અને કાયદેસર ઓડિટ કરવામાં આવે છે અને ભક્તો દ્વારા અપાતું એક-એક રૂપિયાનું દાન નિર્ધારિત સરકારી અને સ્થાપિત પ્રક્રિયાઓ અનુસાર જ જમા થાય છે. પરંતુ, રામ મંદિર આંદોલનના જ પાયાના નેતાઓ અને મોટા સંતો દ્વારા સ્વતંત્ર તપાસની તીવ્ર માંગણી સરાહનીય અને આશ્ચર્યજનક વળાંક તરફ ઈશારો કરી રહી છે.