નવી દિલ્હી : પશ્ચિમ એશિયા (મિડલ ઈસ્ટ) માં ઈરાન અને અન્ય દેશો વચ્ચે ચાલી રહેલો લોહિયાળ સંઘર્ષ હવે વૈશ્વિક વેપારી જહાજો માટે કાળ સાબિત થઈ રહ્યો છે, જેની સીધી આંચ ભારતીય નાગરિકો પર આવી છે. આ આંતરરાષ્ટ્રીય કટોકટી વચ્ચે, સંયુક્ત રાષ્ટ્ર સુરક્ષા પરિષદ (UNSC) ની ખુલ્લી ચર્ચામાં ભારતે ખૂબ જ આક્રમક વલણ અપનાવ્યું છે. સંયુક્ત રાષ્ટ્ર (UN) માં ભારતના કાયમી પ્રતિનિધિ, રાજદૂત હરીશ પાર્વથાનેનીએ વૈશ્વિક નેતાઓ સમક્ષ ગર્જતા જણાવ્યું છે કે, વેપારી શિપિંગ (Commercial Shipping) પર થઈ રહેલા હુમલાઓ ભારત કોઈ પણ કાળે સહન નહીં કરે. તેમણે ચોંકાવનારો ખુલાસો કર્યો કે આ દરિયાઈ હુમલાઓને કારણે અત્યાર સુધીમાં ઘણા નિર્દોષ ભારતીય નાગરિકોએ કાં તો જીવ ગુમાવ્યા છે અથવા તેઓ દરિયામાં ગુમ થઈ ગયા છે.
ભારતનો આ આક્રોશ એવા સમયે સામે આવ્યો છે જ્યારે આ ટિપ્પણીના ગણતરીના કલાકો પહેલા જ નવી દિલ્હીમાં ભારતીય વિદેશ મંત્રાલયે યુએસ (અમેરિકા) ના ચાર્જ ડી'અફેર્સ જેસન મીક્સને તાત્કાલિક સમન્સ પાઠવી બોલાવ્યા હતા અને ઓમાનના દરિયાકાંઠે ૨૪ ભારતીય ક્રૂ સભ્યોને લઈને જઈ રહેલા કોમર્શિયલ ટેન્કર 'સેટેબેલો' પર થયેલા ઘાતકી હુમલા સામે સખત વિરોધ નોંધાવ્યો હતો. આ હુમલા બાદ જહાજ પર સવાર ૨4 ભારતીયોમાંથી ૩ ક્રૂ સભ્યો ગુમ છે. આ અગાઉ બે દિવસ પહેલા જ ઈરાની બંદરો પર અમેરિકાના નાકાબંધીથી બચવાનો પ્રયાસ કરી રહેલા ૨૪ ભારતીયો સવાર પલાઉ-ધ્વજવાળા જહાજ પર અમેરિકી નૌકાદળ દ્વારા હુમલો કરવામાં આવ્યો હતો, જેનાથી ભારત સરકાર ભારે નારાજ છે.
૧ કરોડ ભારતીયોની સુરક્ષા અને અર્થતંત્ર દાવ પર
રાજદૂત પાર્વથાનેનીએ યુએનએસસીમાં મધ્ય પૂર્વની સ્થિતિ પર ચિંતા વ્યક્ત કરતા કહ્યું કે, ગલ્ફ (અખાતી) ક્ષેત્રમાં લગભગ ૧૦ મિલિયન (૧ કરોડ) ભારતીય નાગરિકો રહે છે અને કામ કરે છે. તેમની સુરક્ષા નવી દિલ્હી માટે સર્વોચ્ચ પ્રાથમિકતા છે. પશ્ચિમ એશિયામાં અસ્થિરતાના કારણે ભારતની વેપાર અને ઊર્જા પુરવઠા શૃંખલા (ક્રૂડ ઓઇલ સપ્લાય) ખોરવાઈ જવાની ભીતિ છે, જે ભારતીય અર્થતંત્ર માટે અત્યંત ગંભીર પરિણામો લાવી શકે છે. ભારતે તમામ પક્ષોને તાત્કાલિક લશ્કરી હુમલાઓ બંધ કરવા, મુક્ત નૌકાપરિવહનની સ્વતંત્રતા જાળવવા અને મુત્સદ્દીગીરી તથા સંવાદ દ્વારા વિવાદનો શાંતિપૂર્ણ ઉકેલ લાવવા હાકલ કરી છે.
ગાઝા માટે સહાયની જાહેરાત અને યુએન (UN) ના જૂના માળખા પર આકરા પ્રહારો
ગાઝાની ગંભીર માનવતાવાદી પરિસ્થિતિ પર બોલતા ભારતે 'ટુ-સ્ટેટ સોલ્યુશન' (બે-રાજ્ય ઉકેલ) ના રોડમેપ સાથે કાયમી યુદ્ધવિરામની માંગ કરી છે. આ સાથે જ ભારતે પેલેસ્ટાઈન શરણાર્થીઓ માટે કામ કરતી યુએનની સંસ્થા (UNRWA) ને તેની વાર્ષિક $૫ મિલિયનની સહાયના ભાગરૂપે ૨.૫ મિલિયન ડોલર (આશરે ૨૦ કરોડથી વધુ રૂપિયા) નો પ્રથમ હપ્તો મોકલવાની જાહેરાત કરી છે. લેબનોનમાં સંયુક્ત રાષ્ટ્રના શાંતિ રક્ષક દળ (UNIFIL) માં તૈનાત ભારતીય સૈનિકોની સુરક્ષા અંગે પણ ભારતે ચિંતા વ્યક્ત કરી અને લેબનોનને તબીબી સહાય મોકલવાનું વચન આપ્યું છે.
વિશ્વભરમાં વધી રહેલી યુદ્ધની કટોકટીઓને રોકવામાં સંયુક્ત રાષ્ટ્રની અસમર્થતા પર ભારતે આકરા પ્રહારો કર્યા હતા. રાજદૂતે સ્પષ્ટ શબ્દોમાં કહ્યું કે, વૈશ્વિક સ્તરે યુએનની વિશ્વસનીયતા ઘટી રહી છે કારણ કે તેનું મુખ્ય અંગ એટલે કે સુરક્ષા પરિષદ (UNSC) આઠ દાયકા જૂના અને નકામા થઈ ગયેલા સ્થાપત્ય પર ચાલી રહ્યું છે. ભારતે વર્તમાન ભૂ-રાજકીય વાસ્તવિકતાઓને ધ્યાનમાં રાખીને સુરક્ષા પરિષદના કાયમી અને બિન-કાયમી સભ્યપદમાં તાત્કાલિક વ્યાપક સુધારા (વિસ્તરણ) કરવાની ભારપૂર્વક વકીલાત કરી છે.