બેંગલુરુ:  ભારતીય સરહદોની હવાઈ સુરક્ષાને અભેદ્ય બનાવવાના દિશામાં આગામી 25 જૂનનો દિવસ સુવર્ણ અક્ષરે લખાવા જઈ રહ્યો છે. સંરક્ષણ સંશોધન અને વિકાસ સંગઠન  દ્વારા સંપૂર્ણ સ્વદેશી ટેકનોલોજીથી વિકસિત કરાયેલી અદ્યતન એરબોર્ન અર્લી વોર્નિંગ એન્ડ કંટ્રોલ સિસ્ટમ 'નેત્રા' ને બેંગલુરુમાં એક વિશેષ સમારોહ દરમિયાન 'અંતિમ ઓપરેશનલ ક્લિયરન્સ'  આપવામાં આવશે. આ ઐતિહાસિક સિદ્ધિનો સીધો અર્થ એ થાય છે કે હવે આ ઉડતું રડાર અને કમાન્ડ સેન્ટર કોઈપણ પ્રકારના યુદ્ધ કે લશ્કરી કટોકટી દરમિયાન સરહદ પર ફ્રન્ટલાઈન તૈનાતી માટે સત્તાવાર રીતે સજ્જ થઈ ગયું છે, જે ભારતીય વાયુસેનાની ચોકસાઈ અને પ્રહાર ક્ષમતાને નવી ઊંચાઈએ લઈ જશે.

બ્રાઝિલિયન એમ્બ્રેર એરક્રાફ્ટ પર સ્થાપિત કરવામાં આવેલી આ 'નેત્રા' સિસ્ટમ માત્ર એક વિમાન નથી, પરંતુ આકાશમાં ભારતની એક એવી જાગતી આંખ છે જે દુશ્મનના ફાઈટર જેટ, ડ્રોન, ગુપ્ત મિસાઈલ કે દરિયાઈ જોખમોને સેકન્ડોમાં શોધી કાઢે છે. આ સિસ્ટમની સૌથી મોટી વિશેષતા એ છે કે તે દુશ્મન દેશના ગુપ્ત ઇલેક્ટ્રોનિક સિગ્નલો અને રડાર ઉત્સર્જનને પકડીને યુદ્ધના મેદાનમાં તેમની ચોક્કસ સ્થિતિ ટ્રેક કરી શકે છે. વાયુસેનાના ફાઈટર એરક્રાફ્ટ માટે એક અદ્યતન 'ફોર્સ મલ્ટિપ્લાયર' તરીકે કામ કરતી આ પ્રણાલી હવામાં જ લશ્કરી ઓપરેશન્સનું નેટવર્ક-કેન્દ્રિત સંચાલન કરવાની અદ્ભુત ક્ષમતા ધરાવે છે.

હાલમાં ભારતીય વાયુસેના પાસે આવા છ અત્યાધુનિક સર્વેલન્સ વિમાનોનો કાફલો છે, જેમાંથી ત્રણ રશિયન બનાવટના IL-76 એરફ્રેમ પર આધારિત ઇઝરાયેલી 'ફાલ્કન' રડારથી સજ્જ છે, જ્યારે બાકીના ત્રણ વિમાનો સંપૂર્ણપણે ભારતીય ટેકનોલોજી આધારિત 'નેત્રા' સિસ્ટમથી સજ્જ છે. અગાઉ આ ત્રણેય સ્વદેશી વિમાનોને પ્રારંભિક મંજૂરી સાથે વાયુસેનાના જાંબાઝ પાઇલોટ્સ અને ટેકનિકલ નિષ્ણાતો દ્વારા આકરી અને વાસ્તવિક ઓપરેશનલ પરિસ્થિતિઓમાં ચકાસવામાં આવ્યા હતા. આ સફળ પરીક્ષણોથી મળેલો આત્મવિશ્વાસ અને મૂલ્યવાન તકનીકી જ્ઞાન હવે DRDO ને ભવિષ્યમાં આનાથી પણ મોટા અને વધુ શક્તિશાળી એરબોર્ન કમાન્ડ પ્લેટફોર્મ વિકસાવવામાં મદદ કરશે, જે આત્મનિર્ભર ભારતની નવી ઓળખ બનશે.