નવી દિલ્હી:  દેશમાં કાળઝાળ ગરમીની વચ્ચે હવે મોંઘવારીએ પણ સામાન્ય જનતાના પરસેવા છોડાવવાનું શરૂ કરી દીધું છે. મે 2026 માં છૂટક ફુગાવાનો દર તીવ્ર ઉછાળા સાથે 3.93% ની સપાટીએ પહોંચી ગયો છે, જે અગાઉના એપ્રિલ મહિનામાં 3.48% હતો. સતત પાંચમા મહિને આ આંકડામાં થયેલો વધારો દર્શાવે છે કે બજાર પરથી મોંઘવારીનો અંકુશ સરકી રહ્યો છે. ચાલુ વર્ષના જાન્યુઆરી મહિનામાં જે ફુગાવો માત્ર 2.74% હતો, તે હવે 4% ની ભયજનક સપાટીની તદ્દન નજીક આવી ગયો છે. છેલ્લા 16 મહિનામાં આ એક મહિનાની અંદર નોંધાયેલો સૌથી મોટો ભાવવધારો છે, જેણે ગૃહિણીઓથી લઈને મધ્યમ વર્ગના તમામ આર્થિક સમીકરણો બગાડી નાખ્યા છે.

આ આકરા ભાવવધારા પાછળનું સૌથી મુખ્ય અને ચિંતાજનક કારણ રસોડાનું બજેટ ખોરવતા ખાદ્ય પદાર્થોના ભાવ છે. મે મહિનામાં ખાદ્ય ફુગાવો એપ્રિલના 4.2% થી વધીને સીધો 4.78% પર પહોંચી ગયો છે, જેમાં શહેરી વિસ્તારો (4.66%) કરતા ગ્રામીણ વિસ્તારોમાં (4.85%) મોંઘવારીની અસર વધુ જોવા મળી છે. આ ઉપરાંત, પશ્ચિમ એશિયામાં ચાલી રહેલા ભૌગોલિક-રાજકીય તણાવ અને ક્રૂડ ઓઈલની આંતરરાષ્ટ્રીય કિંમતો વધવાને કારણે માલસામાનના પરિવહન (ટ્રાન્સપોર્ટેશન) ખર્ચમાં 7.63% નો મોટો ઉછાળો આવ્યો છે. બહાર ખાવાના શોખીનોને પણ હવે મોટો ફટકો પડ્યો છે કારણ કે રેસ્ટોરન્ટ અને હોટેલ સેવાઓમાં ફુગાવો 5.75% ને પાર થઈ ગયો છે.

સામાન્ય જરૂરિયાતો સિવાય કિંમતી ધાતુઓ અને શિક્ષણ ક્ષેત્રે પણ મોટો આંચકો લાગ્યો છે. વૈશ્વિક સ્તરે સોના-ચાંદીના ભાવો રેકોર્ડ બ્રેક વધતા દાગીનાની શ્રેણીમાં 56.35% નો અકલ્પનીય ઉછાળો જોવા મળ્યો છે, જ્યારે ઉચ્ચ શિક્ષણના ખર્ચમાં પણ 3.64% નો વધારો નોંધાયો છે. આ સતત વધતા આંકડા હવે રિઝર્વ બેંક ઓફ ઇન્ડિયા (RBI) ની નાણાકીય નીતિ સમિતિ માટે મોટી માથાભારે ચિંતા ઉભી કરી શકે તેમ છે. આર્થિક નિષ્ણાતોનું માનવું છે કે જો આગામી દિવસોમાં પણ ક્રૂડ ઓઇલ અને હવામાનની સ્થિતિ અનુકૂળ નહીં રહે, તો લોન ધારકો પર વ્યાજના દરમાં 0.25% થી 0.50% નો વધારો ઝીંકાઈ શકે છે, જેનાથી તમારી હોમ કે કાર લોનની EMI સીધી વધી જશે.