ઓર્લાન્ડો (ફ્લોરિડા): અમેરિકાની ધરતી પર 'જ્યાં જ્યાં વસે એક ગુજરાતી, ત્યાં ત્યાં સદાકાળ ગુજરાત' ની ઉક્તિ ફરી એકવાર અક્ષરશઃ સાબિત થઈ છે. યુએસએના ફ્લોરિડા રાજ્યના સુંદર શહેર ઓર્લાન્ડોમાં 'ફેડરેશન ઓફ ગુજરાતી એસોસિએશન્સ ઓફ યુએસએ' (FOGAUSA) દ્વારા મેમોરિયલ ડે વીકેન્ડના પાવન અવસરે "યુનાઇટેડ ગુજરાતી સંમેલન ૨૦૨૬" નું અતિ ભવ્ય આયોજન કરવામાં આવ્યું હતું. ઉત્તર અમેરિકાના ખૂણે-ખૂણેથી આવેલા ૧૦૦ થી વધુ અગ્રણી ગુજરાતી સંગઠનોના પ્રતિનિધિઓ અને હજારો ઉત્સાહી પ્રવાસી ગુજરાતીઓએ આ મહાસંમેલનમાં ભાગ લઈને અમેરિકામાં લઘુ-ગુજરાત જેવો માહોલ ઊભો કરી દીધો હતો.
આ ત્રિ-દિવસીય મહોત્સવમાં માત્ર પરંપરાગત સંસ્કૃતિની જ ઝલક નહોતી જોવા મળી, પરંતુ નવી પેઢીના જોડાણ, વ્યાપારિક સંબંધો અને સામાજિક નેતૃત્વનો અદ્ભુત સમન્વય જોવા મળ્યો હતો.
ગૃહરાજ્ય અને નાયબ મુખ્યમંત્રી હર્ષ સંઘવીનું પ્રેરણાદાયી સંબોધન
આ ગૌરવશાળી સંમેલનમાં માતૃભૂમિ પ્રત્યેનો સ્નેહ પણ છલકાયો હતો. ગુજરાતના નાયબ મુખ્યમંત્રી હર્ષ સંઘવીએ ભારતથી ખાસ વર્ચ્યુઅલ માધ્યમ (વીડિયો કોન્ફરન્સિંગ) દ્વારા આ કાર્યક્રમને સંબોધિત કર્યો હતો. તેમણે પોતાના વક્તવ્યમાં સાત સમુદાય પાર વિદેશમાં રહીને પણ પોતાની સંસ્કૃતિ, અસ્મિતા, સંસ્કાર અને માતૃભાષા ગુજરાતીને જીવંત રાખવા બદલ સમુદાયના નેતાઓની પીઠ થાબડી હતી. હર્ષ સંઘવીએ ગુજરાતના વિકાસમાં અને વિશ્વ સ્તરે ભારતની છબી મજબૂત કરવામાં પ્રવાસી ગુજરાતીઓના અમૂલ્ય યોગદાન અને તેમની સામાજિક સેવાઓની મુક્તકંઠે પ્રશંસા કરી હતી.
દિગ્ગજ સ્થાપકોના નેતૃત્વમાં ભવિષ્યની પેઢીનું ઘડતર
કાર્યક્રમના પ્રારંભમાં FOGAUSA ના મુખ્ય સ્થાપકો ડૉ. વાસુદેવ પટેલ, હર્ષદભાઈ પાકજી પટેલ અને પ્રકાશભાઈ પી.વી. પટેલની સાથે સહ-સ્વપ્નદ્રષ્ટા ચિરાગ દવે અને દિવ્યેશ ત્રિપાઠીએ દીપ પ્રાગટ્ય કરીને તમામ અતિથિઓનું ભાવભર્યું સ્વાગત કર્યું હતું. આયોજકોએ જણાવ્યું હતું કે આ કન્વેન્શનનો મુખ્ય ઉદ્દેશ્ય અમેરિકામાં ઉછરી રહેલી યુવા પેઢીને ભારતીય સંસ્કારો સાથે જોડવાનો, નેતૃત્વ ગુણો વિકસાવવાનો અને વ્યાપારી ક્ષેત્રે નવી ઊંચાઈઓ સર કરવાનો છે.
સંમેલન દરમિયાન ખાસ બિઝનેસ ફોરમ, હાઈ-ટેક નેટવર્કિંગ સત્રો, શૈક્ષણિક સેમિનારો અને આધ્યાત્મિક ચર્ચાઓ યોજાઈ હતી, જેમાં ભારત અને અમેરિકાના ટોચના સામાજિક કાર્યકરો, બિઝનેસ એક્ઝિક્યુટિવ્સ, ધાર્મિક સંતો અને ચૂંટાયેલા અમેરિકી લોકપ્રતિનિધિઓએ હાજરી આપીને પોતાના વિચારો શેર કર્યા હતા.
ગરબા અને લોકનૃત્યોની રમઝટે જમાવ્યું આકર્ષણ
આ મહોત્સવની સૌથી મનમોહક ક્ષણ સાંસ્કૃતિક કાર્યક્રમોની હતી. અમેરિકામાં જ જન્મેલા અને ઉછરેલા ભારતીય-અમેરિકન યુવા કલાકારોએ મંચ પર જ્યારે ગુજરાતના પરંપરાગત લોકનૃત્યો, પ્રાચીન-અર્વાચીન ગરબા અને ક્લાસિકલ સંગીતની પ્રસ્તુતિ કરી, ત્યારે આખું ઓર્લાન્ડો ઓડિટોરિયમ તાળીઓના ગડગડાટથી ગુંજી ઉઠ્યું હતું. આ અદ્ભુત પર્ફોર્મન્સે સાબિત કર્યું કે વિદેશી વાતાવરણમાં પણ યુવાનોના હૃદયમાં ગુજરાત ધબકે છે. આ તકે જાહેર સેવા અને સમુદાયના ઉત્થાન માટે ઉત્કૃષ્ટ કાર્ય કરનારી અનેક વિભૂતિઓ અને સંસ્થાઓને વિશેષ એવોર્ડ આપીને સન્માનિત કરવામાં આવ્યા હતા. ત્રિ-દિવસીય ઉર્જા અને ઉત્સાહ બાદ, આ સંમેલન ભવિષ્યમાં પણ આવી જ રીતે એકતાના તાંતણે બંધાયેલા રહેવાના સંકલ્પ સાથે સંપન્ન થયું હતું.