બોકારો : ઝારખંડના બોકારો જિલ્લામાંથી ગત ૬ જૂને ટ્યુશન ક્લાસ જવાના નામે અચાનક ગુમ થયેલા એક સગીર બાળકનો ભેદ ઉકેલાતાં સમગ્ર વિસ્તારમાં ભારે ચર્ચા જાગી છે. બાલિડીહ પોલીસ સ્ટેશન વિસ્તારમાંથી ગાયબ થયેલા આ કિશોરને પોલીસે સખત જહેમત બાદ છેક ઓડિશાના ધાર્મિક નગરી પુરીથી હેમખેમ શોધી કાઢ્યો છે. શુક્રવારે જ્યારે પોલીસ ટીમ આ માસૂમ બાળકને લઈને બોકારો રેલ્વે સ્ટેશન પર પહોંચી, ત્યારે છેલ્લા ૬ દિવસથી આંસુ સારતા પરિવારના જીવમાં જીવ આવ્યો હતો અને તેમણે રાહતનો શ્વાસ લીધો હતો. જોકે, પોલીસ તપાસમાં જે સત્ય બહાર આવ્યું છે તે જોઈને વાલીઓ અને પોલીસ બંને ચોંકી ગયા છે. આ કોઈ અપહરણ (Kidnapping) નો ગુનો નહોતો, પરંતુ કિશોર પોતાની મરજીથી જ ટ્રેનોની લાંબી સફર એટલે કે 'જોયરાઈડ' (Joyride) નો રોમાંચ માણવા નીકળી પડ્યો હતો!
એસપીના નેતૃત્વમાં બની ૪ સ્પેશિયલ ટીમો, સીસીટીવી બન્યા ગેમ-ચેન્જર
આ હાઈ-પ્રોફાઈલ કેસની ગંભીરતાને જોતાં બોકારોના એસપી નાથુ સિંહ મીણા, હેડક્વાર્ટર ડીએસપી પવન કુમાર અને સિટી ડીએસપી રાજીવ રંજનના સીધા માર્ગદર્શન હેઠળ એક મોટું ઓપરેશન શરૂ કરવામાં આવ્યું હતું. ઇન્સ્પેક્ટર નવીન કુમાર સિંહે જણાવ્યું કે, ૬ જૂનના રોજ ગોપાલ ભગત નામના વૃદ્ધે તેમના સગીર પૌત્રના અચાનક ગુમ થવા અંગે પોલીસમાં ફરિયાદ નોંધાવી હતી. પોલીસે તાત્કાલિક ગુનો (કેસ નંબર ૧૦૧/૨૬) નોંધીને બાળકને શોધવા માટે ૪ અલગ-અલગ સ્પેશિયલ ટીમો બનાવી હતી. આ ટીમોમાં સબ-ઇન્સ્પેક્ટર ચંદ્રદેવ કુમાર, નિત્યાનંદ ભોક્તા અને ફાગુ રામ ઓરાંવ જેવા તેજતરાળ અધિકારીઓ સામેલ હતા. તપાસને ઝડપી બનાવવા માટે પોલીસે રેલ્વે સ્ટેશનોના સીસીટીવી (CCTV) અને ટેકનિકલ સેલના લોકેશનનો સહારો લીધો, જે આ ઓપરેશનમાં ગેમ-ચેન્જર સાબિત થયા.
એક પછી એક ટ્રેનો બદલીને પોલીસને હંફાવતો રહ્યો કિશોર
રેલ્વે સ્ટેશનોના સીસીટીવી ફૂટેજ ખંગાળતા પોલીસ પણ માથું ખંજવાળવા મજબૂર થઈ ગઈ હતી. ઘરેથી ટ્યુશનનું કહીને નીકળેલો આ છોકરો સીધો બોકારો રેલ્વે સ્ટેશન પહોંચ્યો અને ત્યાંથી મુરી જતી ટ્રેનમાં બેસી ગયો. મુરી સ્ટેશન પર થોડો સમય રખડ્યા પછી તે ફરી પાછો ટ્રેન પકડીને બોકારો આવ્યો. પરંતુ નવાઈની વાત એ છે કે, તે ઘરે જવાના બદલે સ્ટેશન પરથી જ ધનબાદ જતી બીજી ટ્રેનમાં સવાર થઈ ગયો! બીજા દિવસે તે ધનબાદથી ઉપડીને બિહારના ગયા (Gaya) સ્ટેશન થઈને છેક ઓડિશાના જગન્નાથ પુરી સુધીની લાંબી સફરે નીકળી પડ્યો. પોલીસ ટીમો પણ હિંમત હાર્યા વગર બોકારો, મુરી, ધનબાદ, ચંદ્રપુરા, ગોમોહ અને ગયા સ્ટેશન સુધી સીસીટીવીના આધારે તેનો પીછો કરતી રહી અને અંતે ઓડિશાના પુરી દરિયાકિનારેથી તેને સુરક્ષિત રીતે ઝડપી પાડ્યો હતો.
સોશિયલ મીડિયા અને રીલ્સના રોમાંચથી પ્રેરાઈને લીધું પગલું: માતા-પિતાને લાલબત્તી
જ્યારે પોલીસે આ કિશોરની પ્રેમથી પૂછપરછ કરી ત્યારે તેણે જણાવ્યું કે, તે કોઈનાથી નારાજ નહોતો, બસ તેને કોઈને કહ્યા વગર એકલા લાંબી મુસાફરી કરવાનો અને ટ્રેનોમાં રખડવાનો ચસકો લાગ્યો હતો, તેથી તે નીકળી પડ્યો હતો.
આ સફળ રેસ્ક્યુ ઓપરેશન બાદ બોકારો જિલ્લા વહીવટીતંત્ર અને વરિષ્ઠ પોલીસ અધિકારીઓએ તમામ માતા-પિતાને એક ખૂબ જ મહત્વપૂર્ણ અપીલ કરી છે. પોલીસે જણાવ્યું છે કે આજકાલના બાળકો સોશિયલ મીડિયા, યુટ્યુબ વ્લોગ્સ અથવા રીલ્સ પર મુસાફરીના રોમાંચથી અંજાઈને કે પ્રભાવિત થઈને ઘણીવાર કોઈપણ વિચાર વગર આવા જોખમી પગલાં ભરી લે છે. તેથી, દરેક પરિવારે પોતાના બાળકો સાથે મિત્રતાભર્યું વાતાવરણ રાખવું જોઈએ, તેમની સાથે સતત સંવાદ સાધવો જોઈએ અને તેમની રોજિંદી પ્રવૃત્તિઓ પર કડક નજર રાખવી જોઈએ જેથી ભવિષ્યમાં આવી કોઈ મોટી દુર્ઘટના ન ઘટે.