લખનૌ : ઉત્તર પ્રદેશના શૈક્ષણિક કેમ્પસોમાં વિદ્યાર્થીઓને પ્રલોભન આપીને કે માનસિક દબાણ હેઠળ લાવીને થતા કથિત ધર્માંતરણ (Religious Conversion) ના નેટવર્કને તોડી પાડવા માટે રાજ્યપાલ આનંદીબેન પટેલે એક અત્યંત મોટો અને અભૂતપૂર્વ નિર્ણય લીધો છે. ઉત્તર પ્રદેશના રાજ્યપાલ અને રાજ્યની યુનિવર્સિટીઓના ચાન્સેલર (કુલાધિપતિ) આનંદીબેન પટેલે યુપીની તમામ સરકારી અને ખાનગી મેડિકલ, ડેન્ટલ અને અન્ય ઉચ્ચ શૈક્ષણિક સંસ્થાઓમાં તાત્કાલિક ધોરણે 'ધર્માંતરણ વિરોધી કોષ' (Anti-Conversion Cells) સ્થાપિત કરવાનો કડક નિર્દેશ આપ્યો છે. અધિકારીઓ દ્વારા જાહેર કરાયેલી માહિતી મુજબ, કેમ્પસની અંદર કોઈપણ પ્રકારની ગેરકાયદેસર કે અનૈતિક પ્રવૃત્તિઓ ચલાવી લેવામાં આવશે નહીં.
પ્રતિષ્ઠિત મેડિકલ સંસ્થાઓમાં બનેલી ઘટનાઓ બાદ લેવાયો નિર્ણય
રાજભવન દ્વારા આટલું કડક પગલું લેવા પાછળ તાજેતરમાં બનેલી કેટલીક ચોંકાવનારી ઘટનાઓ જવાબદાર છે. લખનૌની પ્રખ્યાત કિંગ જ્યોર્જ મેડિકલ યુનિવર્સિટી (KGMU) અને સંજય ગાંધી પોસ્ટગ્રેજ્યુએટ ઇન્સ્ટિટ્યૂટ ઓફ મેડિકલ સાયન્સ (SGPGIMS) જેવી ટોચની સંસ્થાઓમાં વિદ્યાર્થીઓ પર ધર્માંતરણ માટે દબાણ કરવાના ગંભીર આરોપો અને અહેવાલો સામે આવ્યા હતા. આ ઘટનાઓને પગલે રાજ્યપાલ સચિવાલય દ્વારા ગત ૨૮ મેના રોજ જ એક અત્યંત ગુપ્ત અને મહત્વપૂર્ણ પત્ર જારી કરવામાં આવ્યો હતો. આ પત્રના આધારે, અટલ બિહારી વાજપેયી મેડિકલ યુનિવર્સિટીએ ૬ જૂને એક હાઇ-પ્રાયોરિટી સર્ક્યુલર જારી કરીને પોતાની તમામ સંલગ્ન કોલેજોને આ આદેશનું અક્ષરશઃ પાલન કરવા તાકીદ કરી છે.
કેમ્પસ માત્ર જ્ઞાનના કેન્દ્રો નહીં, યુવાનોના નૈતિક પાયા છે
રાજ્યપાલ કાર્યાલય દ્વારા જારી કરાયેલા સત્તાવાર પત્રમાં શૈક્ષણિક સંસ્થાઓની જવાબદારી નક્કી કરતા સ્પષ્ટપણે જણાવાયું છે કે, કોલેજો અને યુનિવર્સિટીઓ માત્ર ડિગ્રી આપવા કે નવીનતાના કેન્દ્રો નથી, પરંતુ તે દેશના યુવાનોના નૈતિક, બૌદ્ધિક અને સામાજિક વિકાસનો પાયો છે. તેથી દરેક કેમ્પસમાં શૈક્ષણિક શ્રેષ્ઠતા, બૌદ્ધિક સ્વતંત્રતા અને સામાજિક સંવાદિતા જળવાઈ રહે તે અનિવાર્ય છે. કોઈપણ વિદ્યાર્થીને ભય, લાલચ, નૈતિક કે માનસિક દબાણ હેઠળ લાવીને બળજબરીથી ધાર્મિક પરિવર્તન તરફ વાળવાનો પ્રયાસ દેશના કાયદાની વિરુદ્ધ અને સંપૂર્ણપણે અસ્વીકાર્ય છે.
બહારના તત્વો પર પ્રતિબંધ અને હોસ્ટેલ પર કડક નજર
નવા આદેશો મુજબ, રાજ્યપાલ આનંદીબેન પટેલે તમામ સંસ્થાઓને કટ્ટરપંથી વિરોધી (Anti-Radicalization Cells) અથવા વિદ્યાર્થી કલ્યાણ સમિતિઓને તાત્કાલિક સક્રિય કરવા જણાવ્યું છે. આ ઉપરાંત:
•    કોલેજના કાઉન્સેલિંગ મિકેનિઝમને વધુ મજબૂત કરવામાં આવશે જેથી કોઈ વિદ્યાર્થી તણાવમાં ન આવે.
•    કોલેજ હોસ્ટેલ (છાત્રાલયો) અને કેમ્પસના અન્ય સંવેદનશીલ વિસ્તારો પર સીસીટીવી અને સિક્યુરિટી દ્વારા નજીકથી નજર રાખવામાં આવશે.
•    કેમ્પસમાં બિનસત્તાવાર અથવા બહારના અજાણ્યા લોકોના પ્રવેશ પર સંપૂર્ણ પ્રતિબંધ મૂકવામાં આવશે.
શંકાસ્પદ પ્રવૃત્તિ દેખાય તો સીધી પોલીસને જાણ કરવા આદેશ
આ નવા વટહુકમમાં તમામ કોલેજ વહીવટીતંત્રને વિદ્યાર્થીઓ અને સ્ટાફ માટે વિશેષ જાગૃતિ કાર્યક્રમોનું આયોજન કરવાની સૂચના આપવામાં આવી છે, જેથી તેઓ આવા કોઈ પણ ષડયંત્રનો ભોગ ન બને. પત્રમાં સ્પષ્ટ આદેશ છે કે જો કેમ્પસમાં કોઈ પણ શંકાસ્પદ વ્યક્તિ કે પ્રવૃત્તિ નજરે પડે, તો સ્થાનિક મેનેજમેન્ટે સંસ્થાની આબરૂ બચાવવા બાબત છુપાવવાના બદલે સીધી જ પોલીસ અને સ્થાનિક પ્રશાસનને સત્તાવાર જાણ કરવાની રહેશે. અટલ બિહારી વાજપેયી મેડિકલ યુનિવર્સિટીએ તમામ મેડિકલ કોલેજો પાસેથી આ સુરક્ષા વ્યવસ્થા ગોઠવ્યા અંગેનો સત્તાવાર 'પાલન અહેવાલ' (Compliance Report) વહેલામાં વહેલી તકે મંગાવી લીધો છે.