નવી દિલ્હી : કહેવાય છે કે કાયદો કાનૂની વિવાદોના ઉકેલ લાવી શકે છે, પરંતુ તૂટેલા દિલ અને સંબંધોને જોડી શકતો નથી. દિલ્હીની પ્રખ્યાત તીસ હજારી કોર્ટ (Tis Hazari Court) ની બહાર તાજેતરમાં એક એવો નજારો જોવા મળ્યો, જેણે ત્યાં હાજર વકીલો, જજ અને સામાન્ય જનતા સહિત સૌ કોઈની આંખો ભીની કરી દીધી હતી. છેલ્લા કેટલાય સમયથી જે દંપતી એકબીજાનું મોઢું જોવા નહોતું માંગતું અને જેમની વચ્ચે દહેજ, ઘરેલુ હિંસા અને છૂટાછેડાની કડવી કાનૂની જંગ ચાલી રહી હતી, તેઓ અચાનક કોર્ટની બહાર જ બધું ભૂલીને એકબીજાને વળગી પડ્યા. પત્નીના આ એક 'જાદુઈ આલિંગન' (Magical Hug) એ મહિનાઓ લાંબી કાનૂની લડાઈ પર હંમેશ માટે પૂર્ણવિરામ મૂકી દીધું છે.
વર્ષ ૨૦૨૦ ના લગ્ન અને દહેજની કડવાશ
આ અદ્ભુત વાર્તા દિલ્હીની રહેવાસી શિખા સિંહ અને તેના પતિ સૌરભ સિંહની છે. બંનેના લગ્ન વર્ષ ૨૦૨૦ માં હિન્દુ રીતિરિવાજ મુજબ ખૂબ જ ધામધૂમથી થયા હતા. દીકરીના પરિવારે પોતાની ક્ષમતા કરતાં વધુ ખર્ચ કરીને મોંઘી ભેટો અને દાગીના આપ્યા હતા, પરંતુ લગ્નના થોડા જ સમયમાં સંબંધોમાં તિરાડ પડી ગઈ. શિખાનો આરોપ હતો કે ઓછું દહેજ લાવવા બાબતે સાસરિયાઓ તેને ટોણા મારતા, માનસિક ત્રાસ આપતા અને તેના પતિને બીજા લગ્ન કરવાની ધમકી આપતા હતા. આ વિવાદ એટલો વધ્યો કે શિખાએ પતિ સૌરભ અને સાસરિયાઓ સામે ઘરેલુ હિંસા અધિનિયમ, ૨૦૦૫ ની કલમ ૧૨ હેઠળ ગંભીર કેસ દાખલ કરી દીધો.
કેસના બોજ હેઠળ પિતા રસ્તા પર આવી ગયા હતા
બંને પરિવારો કોર્ટના ચક્કરમાં ફસાયા અને વકીલોની ફી તેમજ કાર્યવાહી પાછળ લાખો રૂપિયા પાણીની જેમ વહી ગયા. પોતાની દીકરીને ન્યાય અપાવવાની કાનૂની લડાઈમાં શિખાના પિતાની આર્થિક સ્થિતિ એટલી હદ સુધી કફોડી બની ગઈ કે તેમની પાસે પોતાની બીમારીની સારવાર કરાવવાના પણ પૈસા બચ્યા નહોતા. પરિવાર માનસિક અને આર્થિક રીતે તૂટી ચૂક્યો હતો.
સસરા પર આવેલી આફત અને જમાઈનું હૃદયપરિવર્તન
આ ભયંકર તણાવ વચ્ચે, આશરે ૧૦ દિવસ પહેલા શિખાના પિતાને અચાનક ગંભીર હાર્ટ સ્ટ્રોક (પેરાલિસિસ એટેક) આવ્યો અને તેમને સરકારી હોસ્પિટલમાં દાખલ કરવામાં આવ્યા. આ સમાચાર મળતાં જ કાનૂની લડાઈ લડી રહેલો જમાઈ સૌરભ બધું જ ભૂલીને તાત્કાલિક હોસ્પિટલ પહોંચ્યો. ત્યાં સસરાની ગંભીર હાલત અને પરિવારની લાચારી જોઈને તેનું દિલ પીગળી ગયું. સૌરભે સમય બગાડ્યા વિના પોતાના સસરાને સરકારી હોસ્પિટલમાંથી શિફ્ટ કરીને ગુડગાંવની દેશની સર્વોચ્ચ ખાનગી હોસ્પિટલ 'મેદાંતા' (Medanta) માં દાખલ કર્યા અને સારવારનો તમામ ખર્ચ પોતે ઉપાડી લીધો. જમાઈની તત્પરતા અને શ્રેષ્ઠ સારવારના કારણે શિખાના પિતા મરણપથારીમાંથી પાછા ફર્યા અને હવે સંપૂર્ણ સ્વસ્થ છે.
કોર્ટની તારીખે બદલી નાખ્યો ઈતિહાસ
પતિની આ અણધારી માનવતા અને કરુણાએ શિખાના હૃદયમાં રહેલો બધો જ ગુસ્સો અને નફરત ઓગાળી નાખી. શુક્રવારે એડિશનલ સેશન્સ જજ અભિષેક ગોયલની કોર્ટમાં આ કેસની સુનાવણીની તારીખ હતી. કોર્ટ રૂમની બહાર નીકળતા જ શિખાએ બધાની સામે છૂટાછેડા અને કોર્ટ કેસના તમામ કાગળોના ટુકડે-ટુકડા કરી હવામાં ફગાવી દીધા. ત્યારબાદ, કોઈપણ ખચકાટ વિના, તે દોડીને પોતાના પતિ સૌરભને વળગી પડી અને ધ્રુસકે-ધ્રુસકે રડી પડી.
કોર્ટ પરિસરમાં હાજર કોઈ વ્યક્તિએ આ અદ્ભુત ક્ષણને પોતાના મોબાઈલ કેમેરામાં કેદ કરી લીધી હતી, જે વીડિયો અત્યારે સોશિયલ મીડિયા પર જોરદાર વાયરલ થઈ રહ્યો છે. ઇન્ટરનેટ પર લોકો આ પ્રેમાળ અને સુખદ અંતની મુક્ત કંઠે પ્રશંસા કરી રહ્યા છે અને કહી રહ્યા છે કે, દુનિયા ગમે તેટલી બદલાય, પણ પ્રેમ અને માનવતા આજે પણ સૌથી મોટો ન્યાય કરે છે.