નવી દિલ્હી: જ્યારે ઉત્તર ભારતમાં સૂર્યનારાયણ કોપાયમાન થાય છે અને દિલ્હીની આકરી ગરમી તેમજ કાળઝાળ 'લૂ' (ગરમ પવન) ને કારણે લોકો પોતાના એસી ઘરોમાંથી બહાર નીકળતા પણ ડરે છે, ત્યારે દિલ્હીના રસ્તાઓ પર એક ૭૬ વર્ષના બઝુર્ગ 'તારણહાર' બનીને ઉતરે છે. આ શખ્સનું નામ છે અલગરથનમ નટરાજન, જેમને આખું દિલ્હી આજે આદરપૂર્વક 'મટકા મેન' (Matka Man) તરીકે ઓળખે છે. કેન્સર જેવા જીવલેણ રોગને મ્હાત આપીને નવું જીવન મેળવનાર નટરાજને બીજાની સેવા કરવાને જ પોતાના જીવનનું અંતિમ લક્ષ્ય બનાવી લીધું છે. છેલ્લા ૮ વર્ષથી તેઓ કોઈ સરકારી કે ખાનગી આર્થિક મદદ વગર, પોતાના પેન્શનના પૈસાથી દિલ્હીના રસ્તાઓ પર તરસ્યા મજૂરો, રિક્ષાચાલકો અને રાહદારીઓને મફત ઠંડુ પાણી પીવડાવી રહ્યા છે.
૩૪ વર્ષ લંડનમાં રહ્યા, કેન્સરે બદલી નાખી જિંદગીની દિશા
નટરાજનની જીવન સફર કોઈ ફિલ્મી વાર્તાથી કમ નથી. તેઓ લગભગ ૩૪ વર્ષ સુધી બ્રિટનની રાજધાની લંડનમાં એક સફળ ઉદ્યોગપતિ (Businessman) તરીકે વૈભવી જીવન જીવતા હતા. પરંતુ આશરે ૩૪ વર્ષ પહેલાં તેમના જીવનમાં ભૂકંપ આવ્યો જ્યારે તેમને ખબર પડી કે તેઓ કેન્સરથી પીડિત છે. આ જીવલેણ બીમારી સામે લાંબી જંગ લડ્યા બાદ તેઓ સંપૂર્ણપણે સ્વસ્થ થયા અને ભારત પરત ફર્યા. આ બીમારીએ તેમને જીવનનો અસલી અર્થ સમજાવી દીધો. તેમણે વિચાર્યું કે ભગવાને જો તેમને નવું જીવન આપ્યું છે, તો તે માત્ર પૈસા કમાવવા માટે નથી. બસ, ત્યારથી તેમણે ગરીબોની સેવા કરવાનું નક્કી કરી લીધું.
દિલ્હીના ખૂણે-ખૂણે માટલાં ગોઠવ્યા, રોજ જાતે કરે છે મોનિટરિંગ
દિલ્હીમાં ઉનાળા દરમિયાન સૌથી ખરાબ હાલત રસ્તા પર કાળી મજૂરી કરતા શ્રમિકો, સિક્યોરિટી ગાર્ડ અને રિક્ષાવાળાઓની થાય છે, જેઓ મોંઘી મિનરલ વોટરની બોટલો ખરીદી શકતા નથી. આ બાબતને ધ્યાનમાં રાખીને નટરાજને દિલ્હીના અલગ-અલગ વિસ્તારો અને ફૂટપાથ પર વિશેષ 'મટકા સ્ટેન્ડ' તૈયાર કરાવ્યા છે, જ્યાં માટીના પરંપરાગત ઘડા મૂકવામાં આવ્યા છે. આ કામ માત્ર માટલાં મૂકવા પૂરતું મર્યાદિત નથી, નટરાજન રોજ વહેલી સવારે પોતે સુનિશ્ચિત કરે છે કે દરેક માટલું એકદમ સ્વચ્છ હોય અને તેમાં શુદ્ધ તેમજ ઠંડુ પાણી ભરેલું હોય.
૪,૦૦૦ લિટર પાણીવાળી સ્પેશિયલ વાન અને ૨૦ નળ
પોતાના આ મિશનને પૂરું કરવા માટે નટરાજને એક ખાસ વાન (ગાડી) તૈયાર કરાવી છે. આ વાનની અંદર ૪,૦૦૦ લિટર પાણીની ક્ષમતા ધરાવતી ટાંકી ફિટ કરેલી છે, જેની બહારની તરફ ૨૦ નળ અને ૨૦ ગ્લાસ હોલ્ડર લગાવવામાં આવ્યા છે. નટરાજન પોતે આ ગાડી ચલાવીને દિવસમાં બે વાર તમામ મટકા સ્ટેન્ડ પર જાય છે અને ખાલી થયેલા ઘડાને ફરીથી ઠંડા પાણીથી ભરી દે છે.
પોતાની કમાણી અને પેન્શનથી ઉઠાવે છે બધો ખર્ચ
સૌથી પ્રેરણાદાયી બાબત એ છે કે આટલો મોટો પ્રોજેક્ટ ચલાવવા માટે તેઓ કોઈની પાસે એક પણ રૂપિયો દાન (Donation) લેતા નથી. આ ભગીરથ કાર્યનો તમામ ખર્ચ તેઓ પોતાની જિંદગીભરની બચત અને દર મહિને મળતા પેન્શનમાંથી ખુશી-ખુશી ભોગવે છે. પાણી પીવડાવવાની સાથે-સાથે તેઓ ગરીબો માટે ખોરાકનું વિતરણ પણ કરે છે, તેમજ ગંભીર કેન્સરના દર્દીઓ અને અનાથ લોકોના અંતિમ સંસ્કાર માટે પણ આર્થિક મદદ કરે છે. નટરાજનની આ કહાની સાબિત કરે છે કે દુનિયામાં માનવતાની સેવા કરવા માટે કરોડો રૂપિયાની નહીં, પણ માત્ર એક સાફ દિલ અને અડગ જુસ્સાની જરૂર હોય છે.