સિઓલ : વૈશ્વિક રાજનીતિ અને એશિયા ખંડના સંરક્ષણ ઇતિહાસમાં આજે એક બહુ મોટો અને ઐતિહાસિક ચુકાદો આવ્યો છે. દક્ષિણ કોરિયા (South Korea) ની રાજધાની સિઓલની એક અદાલતે દેશના પૂર્વ રાષ્ટ્રપતિ યૂન સુક યેઓલ (Yoon Suk Yeol) ને સત્તાનો ઘોર દુરુપયોગ કરવા અને દુશ્મન દેશને ફાયદો પહોંચાડવાના ગંભીર આરોપો હેઠળ દોષિત ઠેરવીને ૩૦ વર્ષની જેલની સજા ફટકારી છે. પૂર્વ રાષ્ટ્રપતિ પર આરોપ છે કે તેમણે વર્ષ ૨૦૨૪ ના અંતમાં પોતાના દેશમાં 'માર્શલ લો' એટલે કે લશ્કરી શાસન લાદવા માટે જાણીજોઈને પાડોશી દેશ ઉત્તર કોરિયામાં ગુપ્ત ડ્રોન ઘૂસણખોરી કરાવવાનો સનસનાટીભર્યો આદેશ આપ્યો હતો.
માર્શલ લો લગાવવા માટે પોતે જ રચી હતી આખી સ્ક્રિપ્ટ
સિઓલ સેન્ટ્રલ ડિસ્ટ્રિક્ટ કોર્ટમાં ચાલેલી હાઈ-પ્રોફાઈલ સુનાવણી દરમિયાન ચોંકાવનારા ખુલાસા થયા હતા. કોર્ટે પોતાના ચુકાદામાં સ્પષ્ટ કર્યું કે, પૂર્વ રાષ્ટ્રપતિ યૂને ઓક્ટોબર ૨૦૨૪ માં જાણીજોઈને ઉત્તર કોરિયાના સરમુખત્યાર કિમ જોંગ ઉનને ઉશ્કેરવા માટે દક્ષિણ કોરિયાના સૈન્ય ડ્રોનને સરહદ પાર મોકલવાના મિશનને લીલી ઝંડી આપી હતી. આ ઘૂસણખોરીનો અસલી મકસદ બંને દેશો વચ્ચે યુદ્ધ જેવો તણાવ ઊભો કરવાનો હતો, જેથી ડિસેમ્બર ૨૦૨૪ માં દેશની અંદર ઇમરજન્સી અને માર્શલ લો (લશ્કરી કાનૂન) લાગુ કરવાના પોતાના વિવાદાસ્પદ નિર્ણયને તેઓ જનતા અને સંસદ સામે યોગ્ય ઠેરવી શકે.
પૂર્વ સંરક્ષણ મંત્રી અને ઇન્ટેલિજન્સ ચીફ પણ જેલ ભેગા
અદાલતે આ કાળા ષડયંત્રમાં સામેલ અન્ય ઉચ્ચ અધિકારીઓ સામે પણ ચાબુક ચલાવી છે. પૂર્વ રાષ્ટ્રપતિના આ આદેશને ગ્રાઉન્ડ લેવલ પર લાગુ કરનાર તત્કાલીન સંરક્ષણ મંત્રી (Defense Minister) કિમ યોંગ-હ્યુનને પણ આ ગુનાહિત કૃત્યમાં બરાબરના ભાગીદાર ગણીને ૩૦ વર્ષની જેલની સજા ફટકારી છે. આ ઉપરાંત, પૂર્વ ડિફેન્સ કાઉન્ટર ઇન્ટેલિજન્સ કમાન્ડના ચીફ યેઓ ઇન-હ્યુંગને આ કાવતરામાં મદદ કરવા બદલ ૧૫ વર્ષની જેલની સજા ફટકારવામાં આવી છે. જ્યારે પૂર્વ ડ્રોન ઓપરેશન્સ કમાન્ડના ચીફ કિમ યોંગ-ડેને ૩ વર્ષની જેલની સજા સંભળાવવામાં આવી છે, જોકે તેમની સજા હાલ ૫ વર્ષ માટે મુલતવી રાખવામાં આવી છે.
લોકશાહીના ઇતિહાસમાં કાળો અધ્યાય
દક્ષિણ કોરિયાની અદાલતે આ કડક આદેશ આપતા ટિપ્પણી કરી કે, પોતાના જ રાજકીય સ્વાર્થ અને સત્તા પર પકડ જાળવી રાખવા માટે દેશની સુરક્ષાને દાવ પર લગાવવી એ માફી લાયક ગુનો નથી. આ ચુકાદા બાદ સમગ્ર દક્ષિણ કોરિયામાં ભારે રાજકીય ગરમાવો આવી ગયો છે અને વિશ્વભરની સુપરપાવર મહાસત્તાઓ આ આખા ઘટનાક્રમ પર ચાંપતી નજર રાખી રહી છે. આ કેસે સાબિત કર્યું છે કે કાયદાની નજરમાં રાષ્ટ્રપતિ પદ પર બેઠેલી વ્યક્તિ પણ દેશની સુરક્ષાથી મોટી હોઈ શકે નહીં.