ન્યૂયોર્ક: ટેક્નોલોજી અને સ્પેસ સેક્ટરમાં ક્રાંતિ લાવનારા અબજોપતિ એલોન મસ્કે વૈશ્વિક નાણાકીય ઇતિહાસમાં એક એવો રેકોર્ડ બનાવ્યો છે જે આજ સુધી કોઈ માનવી વિચારી પણ શક્યો નહોતો. વોલ સ્ટ્રીટ પર તેમની દિગ્ગજ કંપની 'સ્પેસએક્સ' (SpaceX) ના ઐતિહાસિક લિસ્ટિંગ સાથે જ એલોન મસ્ક સત્તાવાર રીતે પૃથ્વીના પ્રથમ 'ટ્રિલિયનર' (૧ લાખ કરોડ ડોલરના માલિક) બની ગયા છે. ફોર્બ્સના તાજેતરના અહેવાલ મુજબ, આ ધમાકેદાર આઈપીઓ બાદ મસ્કની કુલ નેટવર્થ વધીને આશરે ₹૯૫ લાખ કરોડ ($૧.૧ ટ્રિલિયન) ને પાર પહોંચી ગઈ છે, જે સામાન્ય માનવીની કલ્પના શક્તિની બહાર છે.

આ અકલ્પનીય સંપત્તિનું કદ સમજાવતા નિષ્ણાતો કહે છે કે જો એલોન મસ્કના આ એક ટ્રિલિયન ડોલરને $૧ ની નોટોમાં ફેરવીને એક સીધી લાઈન બનાવવામાં આવે, તો તે ૧,૦૯,૨૦૦ કિલોમીટર લાંબી થશે, જે સમગ્ર પૃથ્વીની આસપાસ એક કે બે નહીં પણ પૂરા ત્રણ આંટા મારી શકે છે. એટલું જ નહીં, જો આ અઢળક નાણાંને $૧૦૦ ની નોટોની ગદ્દીઓમાં ફેરવવામાં આવે તો ઓલિમ્પિક કદના સાડા ચાર મોટા સ્વિમિંગ પુલ છલોછલ ભરાઈ જાય. જો કોઈ વ્યક્તિ દર કલાકે ₹૯૫ કરોડ ($૧ મિલિયન) જેવી માતબર રકમ સતત ખર્ચવાનું શરૂ કરે, તો પણ મસ્કની આ સંપત્તિને પૂરી કરતા ૧૦૦ વર્ષથી વધુનો સમય લાગી જશે.

આ વૈશ્વિક ધનકુબેરની તાકાત દુનિયાના મોટાભાગના સમૃદ્ધ દેશો કરતાં પણ વધી ગઈ છે. એલોન મસ્ક એકલા જ તાઇવાન, આયર્લેન્ડ, સ્વીડન, સિંગાપોર અને દક્ષિણ આફ્રિકા જેવા આધુનિક દેશોના વાર્ષિક જીડીપી (GDP) કરતાં વધુ અમીર છે. વિશ્વના આશરે ૧૭૦ દેશો એવા છે જેમનું આખું અર્થતંત્ર મસ્કની વ્યક્તિગત સંપત્તિ સામે વામણું સાબિત થાય છે. જોકે, બજારના નિષ્ણાતોનું કહેવું છે કે આ કોઈ બેંક ખાતામાં પડેલી રોકડ રકમ નથી, પરંતુ ટેસ્લા અને સ્પેસએક્સના શેરના ભાવ પર આધારિત 'પેપર વેલ્થ' છે. આગામી સમયમાં જ્યારે ટેસ્લાનું માર્કેટ કેપ $૨ ટ્રિલિયન પહોંચશે ત્યારે મસ્કને મળનારા કરોડો વધારાના શેર તેમની આ સંપત્તિને ક્યાંય આગળ લઈ જશે.