અમદાવાદ : વિશ્વભરમાં કલા અને સિનેમા જગતના સૌથી પ્રતિષ્ઠિત ગણાતા બ્રિટિશ એકેડેમી ફિલ્મ એવોર્ડ્સ (BAFTA) ની રેસમાં એક ગુજરાતી નામે વૈશ્વિક સ્તરે ડંકો વગાડીને ભારતનું ગૌરવ વધાર્યું છે. મૂળ ગુજરાતના અને હાલ અમેરિકાના લોસ એન્જલસ (LA) ખાતે સ્થાયી થયેલા જાણીતા ફિલ્મમેકર અને પ્રોડ્યુસર શ્રેયા ઝા દ્વારા નિર્મિત ડોક્યુમેન્ટ્રી ફિલ્મ 'સોંગ્સ ધે બરીડ' (Songs They Buried) ને પ્રતિષ્ઠિત બાફ્ટા (BAFTA) ના લોંગલિસ્ટમાં સત્તાવાર સ્થાન મળ્યં' છે. કિકી કુહાકાન દ્વારા ગતિશીલ રીતે નિર્દેશિત આ ફિલ્મને આંતરરાષ્ટ્રીય કક્ષાના વિવેચકોએ તેની હૃદયસ્પર્શી સંવેદનાઓ અને અદ્ભુત સ્ટોરીટેલીંગ (વાર્તા શૈલી) માટે મુક્ત મને વખાણી છે, જેના કારણે આ ફિલ્મ અત્યારે હોલીવુડમાં ચર્ચાનું કેન્દ્ર બની છે.
વર્ષ ૨૦૨૫ માં શ્રેયા ઝાના પ્રોડક્શન હેઠળ બનેલી આ ડોક્યુમેન્ટ્રી ફિલ્મની વાર્તા અત્યંત હૃદયદ્રાવક અને વાસ્તવિક ઘટનાઓ પર આધારિત છે. આ ફિલ્મ ભારતના પાડોશી દેશ મ્યાનમારમાં થયેલા સૈન્ય બળવા (Military Coup) પછી અમેરિકામાં દેશનિકાલ (Exile) તરીકે જીવન જીવવા મજબૂર બનેલા એક બર્મીઝ રોક સ્ટારની સંઘર્ષગાથા દર્શાવે છે. આ સંગીતકારને બળવા દરમિયાન જેલમાં કેદ કરવામાં આવે છે અને ત્યાર બાદ દેશનિકાલ કરાય છે. ફિલ્મમાં દર્શાવાયું છે કે કેવી રીતે તેનું સંગીત પોતાના માતૃદેશમાં ગુંજતું રહે છે, જ્યાં તે હવે ક્યારેય કાયદાકીય રીતે પાછો ફરી શકે તેમ નથી.
વૈશ્વિક મંચ પર શ્રેયાએ માન્યો આખી ટીમનો આભાર
આંતરરાષ્ટ્રીય સ્તરે આટલી મોટી માન્યતા અને સન્માન મળ્યા બાદ ગૌરવ અનુભવતા નિર્માતા શ્રેયા ઝાએ ફિલ્મ સાથે જોડાયેલી આખી ટીમનો હૃદયપૂર્વક આભાર માન્યો હતો. તેમણે પોતાના પ્રોડ્યુસિંગ પાર્ટનર ઉહોમાન મોલટોક, સિનેમેટોગ્રાફર એન્ડ્રુ બાંસલ, એડિટર્સ ઉત્કર્ષ કુમાર અને ટિયામી ઝિઆંગ તેમજ સાઉન્ડ ડિઝાઇનર્સ જેફરી જિયાન્ગ અને ટોસિન ઓમોલોલાની મહેનતને બિરદાવી હતી. ખાસ કરીને ફિલ્મમાં સંગીત આપનાર કમ્પોઝર વિક્રાંત મુથુસામીના સંગીતની વિશેષ પ્રશંસા થઈ રહી છે, જે ફિલ્મના ઈમોશનલ સીન્સમાં પ્રેક્ષકોની આંખો ભીની કરવા માટે મહત્વનું સાબિત થયું છે.
નવા પ્રોજેક્ટ સાથે હોલીવુડમાં ગુજરાતી પ્રતિભાનો દબદબો
બાફ્ટા (BAFTA) ના લોંગલિસ્ટમાં સ્થાન મળવાની સાથે જ આંતરરાષ્ટ્રીય ડોક્યુમેન્ટ્રી ક્ષેત્રે "સોંગ્સ ધે બરીડ" મજબૂત દાવેદાર તરીકે ઉભરી આવી છે. આ સિદ્ધિ હોલીવુડ અને ભારતીય પ્રાદેશિક સિનેમા એમ બંને ક્ષેત્રે એક સફળ મહિલા પ્રોડ્યુસર તરીકે શ્રેયા ઝાની વધતી જતી ધાકને સ્પષ્ટપણે રેખાંકિત કરે છે.
સિનેમા રસિકો માટે વધુ એક આનંદના સમાચાર એ છે કે, શ્રેયા ઝા અને ડાયરેક્ટર કિકી કુહાકાનની જોડી ફરી એકવાર એક નવી આંતરરાષ્ટ્રીય ડોક્યુમેન્ટ્રી ફીચર ફિલ્મ માટે સાથે કામ કરવા તૈયાર થઈ ગઈ છે. આ આગામી નવા પ્રોજેક્ટનું ઓફિશિયલ પ્રોડક્શન અને શૂટિંગ આ વર્ષના અંતિમ ભાગમાં (૨૦૨૬ ના ઉત્તરાર્ધમાં) શરૂ થવાનું સત્તાવાર રીતે નક્કી કરવામાં આવ્યું છે.