મુંબઈ: ભારતના નાના અને મધ્યમ ઉદ્યોગો (MSME) તેમજ નિકાસકારો માટે ગ્લોબલ માર્કેટમાં ડંકો વગાડવાના દિવસો હવે વધુ નજીક આવી ગયા છે. ભારતીય રિઝર્વ બેંક (RBI) તેના 'પેમેન્ટ્સ વિઝન 2028' હેઠળ આંતરરાષ્ટ્રીય સ્તરે થતી નાણાકીય લેવડ-દેવડને અત્યંત સરળ અને અવરોધમુક્ત બનાવવાની ભવ્ય તૈયારી કરી રહી છે. પ્રખ્યાત કન્સલ્ટન્સી ફર્મ EY (અર્ન્સ્ટ એન્ડ યંગ) ના તાજેતરના અહેવાલ "પેમેન્ટ્સ વિઝન 2028: પ્રિપેરીંગ ટુ શેપ ઇન્ડિયાઝ પેમેન્ટ ફ્રન્ટીયર" અનુસાર, કેન્દ્રીય બેંક હવે માત્ર સ્થાનિક ડિજિટલ પેમેન્ટ પર જ નહીં, પરંતુ ક્રોસ-બોર્ડર એટલે કે વિદેશી ચુકવણી પ્રક્રિયાને સુપરફાસ્ટ, પારદર્શક અને વધુ કાર્યક્ષમ બનાવવા પર પોતાનું ધ્યાન કેન્દ્રિત કરી રહી છે.

આગામી સમયમાં અમલી બનનારા આ ક્રાંતિકારી ફેરફારોમાં સૌથી આકર્ષક પાસું "સિંગલ-વિન્ડો એપ્લિકેશન પ્રક્રિયા" છે. અત્યાર સુધી વિદેશમાંથી પેમેન્ટ મેળવવા કે મોકલવા માટે ઉદ્યોગસાહસિકોએ અલગ-અલગ વિભાગોની મંજૂરીઓ માટે ધક્કા ખાવા પડતા હતા. પરંતુ હવે, ચુકવણી અને સમાધાન પ્રણાલીઓ  અધિનિયમ અને ફોરેન એક્સચેન્જ મેનેજમેન્ટ એક્ટ  હેઠળની તમામ મંજૂરીઓને એક જ પ્લેટફોર્મ પર લાવી દેવામાં આવશે. આ ઐતિહાસિક સુધારાને કારણે નાના નિકાસકારોનો સમય અને ઓફિશિયલ કાગળકામનો બોજ અડધો થઈ જશે, જેનાથી બિઝનેસ પાછળ થતો વધારાનો ખર્ચ ઘટશે અને વૈશ્વિક બજારમાં ભારતીય પ્રોડક્ટ્સ વધુ સ્પર્ધાત્મક બનશે.

આ આધુનિક પેમેન્ટ ઇકોસિસ્ટમને સુરક્ષિત અને વધુ સ્માર્ટ બનાવવા માટે RBI આર્ટિફિશિયલ ઇન્ટેલિજન્સ (AI) અને એડવાન્સ ડેટા એનાલિટિક્સનો હથિયાર તરીકે ઉપયોગ કરશે. આ ટેક્નોલોજીના કારણે ઓનલાઈન ફ્રોડ અને સાયબર છેતરપિંડી પર રીઅલ-ટાઇમ નજર રાખી શકાશે, જેનાથી ગ્રાહકો અને વેપારીઓ બંનેની સુરક્ષા મજબૂત બનશે. EY ના રિપોર્ટ મુજબ, ભારતનો લક્ષ્યાંક માત્ર ડિજિટલ ટ્રાન્ઝેક્શનની સંખ્યા વધારવાનો નથી, પરંતુ પેમેન્ટ સિસ્ટમની ડિઝાઈન અને વૈશ્વિક નવીનતામાં દુનિયાનું નેતૃત્વ કરવાનો છે. આ નવી પહેલ ભારતના કરોડો નાના ઉદ્યોગો માટે વૈશ્વિક સ્તરે વેપાર કરવાના નવા દ્વાર ખોલશે તેમાં કોઈ શંકા નથી.