નવી દિલ્હી : ભારતની રાષ્ટ્રીય સુરક્ષા અને સરહદી વિસ્તારોની અખંડિતતાને લઈને કેન્દ્ર સરકાર દ્વારા એક અત્યંત મોટો અને મહત્વનો વ્યુહાત્મક નિર્ણય લેવામાં આવ્યો છે. કેન્દ્રીય ગૃહમંત્રી અમિતભાઈ શાહે દેશના સરહદી જિલ્લાઓમાં થઈ રહેલા અસામાન્ય વસ્તી વિષયક ફેરફારો (Demographic Changes) અને વાતાવરણની સમીક્ષા કરવા માટે રચાયેલી ખાસ ઉચ્ચ સ્તરીય સમિતિને એક મહત્વપૂર્ણ નિર્દેશ આપ્યો છે. ગૃહમંત્રીએ સમિતિને આદેશ આપ્યો છે કે તેઓ આંતરરાષ્ટ્રીય સરહદોને અડીને આવેલા તમામ સંવેદનશીલ જિલ્લાઓનો ગ્રાઉન્ડ લેવલ પર જઈને ઝીણવટભર્યો અભ્યાસ કરે અને તેનો વિગતવાર અહેવાલ વહેલી તકે ગૃહ મંત્રાલયને સુપરત કરે.
અહેવાલો અનુસાર, નવી દિલ્હી ખાતે યોજાયેલી ઉચ્ચ સ્તરીય સુરક્ષા સમીક્ષા બેઠક દરમિયાન ગૃહમંત્રીએ આ બાબત પર વિશેષ ભાર મૂક્યો હતો. કેન્દ્ર સરકારને લાંબા સમયથી એવા ઇનપુટ્સ મળી રહ્યા છે કે દેશના કેટલાક ચોક્કસ સરહદી વિસ્તારોમાં વસ્તીના પરંપરાગત સમીકરણો ઝડપથી બદલાઈ રહ્યા છે, જે ભવિષ્યમાં રાષ્ટ્રીય સુરક્ષા માટે મોટો પડકાર સાબિત થઈ શકે છે.
સરહદ પારની ઘૂસણખોરી અને સુરક્ષા પર કેન્દ્રનું ફોકસ
ગૃહમંત્રી અમિતભાઈ શાહના આ તાજેતરના નિર્દેશ પાછળનો મુખ્ય હેતુ સરહદી વિસ્તારોમાં ગેરકાયદેસર ઘૂસણખોરી, વસ્તીના બદલાતા માળખા અને તેના કારણે સ્થાનિક સામાજિક-આર્થિક પરિસ્થિતિ પર પડતી અસરોની વાસ્તવિકતા તપાસવાનો છે. સમિતિ ખાસ કરીને પાકિસ્તાન, બાંગ્લાદેશ, મ્યાનમાર અને ચીનની સરહદોને સ્પર્શતા ભારતીય રાજ્યોના સરહદી ગામો અને જિલ્લાઓ પર પોતાનું ધ્યાન કેન્દ્રિત કરશે.
આ અભ્યાસ દ્વારા એ જાણવાનો પ્રયાસ કરવામાં આવશે કે શું આ વિસ્તારોમાં વસ્તીના ફેરફાર પાછળ કોઈ સુનિયોજિત બાહ્ય પરિબળો કામ કરી રહ્યા છે કે કેમ. આ સમિતિ સ્થાનિક વહીવટીતંત્ર અને સુરક્ષા એજન્સીઓ (જેવી કે BSF, SSB અને આસામ રાઇફલ્સ) સાથે મળીને ડેટા એકત્રિત કરશે.
સુરક્ષા વ્યવસ્થા વધુ લોખંડી કરાશે
કેન્દ્રીય ગૃહ મંત્રાલયના સૂત્રોના જણાવ્યા મુજબ, આ સમિતિનો અહેવાલ આવ્યા બાદ સરકાર સરહદી વિસ્તારોના વિકાસ અને સુરક્ષાને લઈને નવી નીતિઓ ઘડી શકે છે. 'વાઇબ્રન્ટ વિલેજ પ્રોગ્રામ' હેઠળ સરહદી ગામડાઓમાં સ્થાનિક લોકોને રોજગારી અને આધુનિક સુવિધાઓ આપીને ત્યાંથી થતું પલાયન અટકાવવાના પ્રયાસો પણ તેજ કરવામાં આવશે.
અમિતભાઈ શાહે સ્પષ્ટ કર્યું છે કે વસ્તી વિષયક ફેરફારો એ માત્ર સામાજિક વિષય નથી પરંતુ તે સીધો દેશની આંતરિક સુરક્ષા સાથે જોડાયેલો ગંભીર મુદ્દો છે, તેથી આ બાબતમાં કોઈ પણ પ્રકારની ઢીલાશ સહન કરવામાં આવશે નહીં. આ હાઇ-લેવલ કવાયત શરૂ થતાં જ સરહદી રાજ્યોના રાજકારણ અને સુરક્ષા બેડામાં ભારે હલચલ મચી ગઈ છે.