મુંબઈ: ભારતીય શેરબજારના અગ્રણી એક્સચેન્જો BSE અને NSE દ્વારા આગામી સોમવાર, ૧૫ જૂનથી લાગુ પડે તે રીતે ૨૭ પસંદગીના શેરો સામે કડક સર્વેલન્સ પગલાં લઈને તેમના ટ્રેડિંગ નિયમો તેમજ પ્રાઇસ બેન્ડમાં મોટા ફેરફારો કરવામાં આવ્યા છે. બજારના સર્વેલન્સ સેલ દ્વારા પ્રારંભિક તબક્કે સંભવિત બજાર અનિયમિતતાઓ શોધવા, અસામાન્ય હિલચાલ, વોલ્યુમમાં અચાનક વધારો અને અફવાઓના આધારે થતી ખરીદીને રોકવા માટે આ એક્શન લેવામાં આવી છે. આ મહત્વના નિર્ણયને કારણે સોમવારથી સંબંધિત શેરોમાં રોકાણકારો માટે ઇન્ટ્રાડે વોલેટિલિટી અને ટ્રેડિંગ વ્યૂહરચના પર સીધી અસર જોવા મળશે.

આ પ્રક્રિયાના ભાગ રૂપે, એમવિલ હેલ્થ કેર, જેમ એરોમેટિક્સ, શીતલ કૂલ પ્રોડક્ટ્સ અને M.R. મણિવેની ફૂડ્સની પ્રાઇસ બેન્ડ ૫ ટકાથી વધારીને ૨૦ ટકા કરવામાં આવી છે, જ્યારે મનોરંજન કંપની મુક્તા આર્ટ્સની બેન્ડ મર્યાદા ૧૦% થી વધારીને ૨૦% કરાતા આ શેરોમાં વધુ અસ્થિરતા આવી શકે છે. બીજી તરફ, જોખમ ઘટાડવા માટે DCM લિમિટેડની પ્રાઇસ બેન્ડ ૨૦% થી ઘટાડીને ૫% અને જયંત ઇન્ફ્રાટેકની બેન્ડ ૨૦% થી ઘટાડીને ૧૦% કરવામાં આવી છે. ઉપરાંત યુરોટેક્સ ઇન્ડસ્ટ્રીઝ, ક્રિષ્ના વેન્ચર્સ અને મોબાવેન્યુ AI ટેકની મર્યાદા ૧૦% થી ઘટાડીને ૫% કરવામાં આવી છે, જ્યારે અક્ષ ઓપ્ટીફાઇબર, ઇમામી રિયલ્ટી અને સાધના નાઇટ્રો કેમ સહિત અન્ય ૧૪ જેટલા શેરોની બેન્ડ ૨% થી વધારીને ૫% કરવામાં આવી છે.

એક્સચેન્જે કૈરોસોફ્ટ એઆઈ, કોબો બાયોટેક અને પર્વેસિવ કોમોડિટીઝ જેવા શેરોની અસ્થિરતા મર્યાદા વધુ કડક કરીને ૫% થી ઘટાડીને ૨% કરી દીધી છે. BSE ના સત્તાવાર નિવેદન અનુસાર, બજારમાં અટકળો રોકવા માટે જરૂર પડ્યે ૨૫%, ૫૦% અથવા ૭૫% સુધીના ખાસ માર્જિન પણ લાદવામાં આવી શકે છે. આ ઉપરાંત, જે શેરોને 'ટ્રેડ-ટુ-ટ્રેડ' સેગમેન્ટમાં મૂકવામાં આવશે, તેમાં ઇન્ટ્રાડે ટ્રેડિંગ સંપૂર્ણપણે બંધ થઈ જશે અને રોકાણકારોએ ફરજિયાતપણે ૧૦૦% ડિલિવરી આધારિત સોદા જ કરવા પડશે, એટલે કે તે જ દિવસે ખરીદ-વેચાણ સદંતર બંધ રહેશે.

બજાર નિયમનકારો દ્વારા અવારનવાર લેવાતા આવા કડક આર્થિક પગલાં નાના રોકાણકારોને મોટી નુકસાનીથી બચાવવામાં મહત્વની ભૂમિકા ભજવે છે. હવે પછીના આગામી દિવસોમાં એક્સચેન્જના શંકાસ્પદ યાદીમાં સામેલ આ તમામ ૨૭ શેરોના દૈનિક ટ્રેડિંગ વોલ્યુમ અને પ્રાઇસ મુવમેન્ટ પર સેબી (SEBI) અને સર્વેલન્સ સેલ દ્વારા સતત ઝીણવટભરી નજર રાખવામાં આવશે. જો આગામી સપ્તાહોમાં આ કંપનીઓના ટ્રેડિંગ પેટર્નમાં કોઈ શંકાસ્પદ કે મેનીપ્યુલેશન જેવી પ્રવૃત્તિ જણાશે, તો એક્સચેન્જ દ્વારા મામલો વધુ તપાસ સેલને સોંપીને ટ્રેડિંગ સસ્પેન્ડ કરવા સુધીની આકરી કાનૂની કાર્યવાહી પણ કરવામાં આવી શકે છે.