પુણે:ભારતની અગ્રણી પવન ઊર્જા કંપની સુઝલોન એનર્જીએ શુક્રવારે તેના વિઝન "સુઝલોન ૨.૦" અંતર્ગત રોકાણકારોની પ્રેઝન્ટેશનમાં આગામી પાંચ વર્ષનો આક્રમક વિકાસ રોડમેપ રજૂ કર્યો છે, જે અખાતી દેશો સહિત વૈશ્વિક સ્તરે અક્ષય ઊર્જા ક્ષેત્રે મોટો સાબિત થશે. કંપનીએ વૈશ્વિક સુપર-સાયકલ અને નવીનીકરણીય ઊર્જાની વધતી માંગ વચ્ચે સ્થાનિક બજારમાં પોતાનો ૪૦% હિસ્સો જાળવી રાખવાની સાથે આંતરરાષ્ટ્રીય સ્તરે પણ મજબૂત હાજરી સ્થાપિત કરવાનો વ્યૂહાત્મક પ્લાન જાહેર કર્યો છે. ઔદ્યોગિકીકરણ, ડેટા સેન્ટર વિસ્તરણ અને વીજળીકરણને કારણે સર્જાયેલી ઊર્જા સુરક્ષાની જરૂરિયાત આ અતિ મહત્વકાંક્ષી પ્રોજેક્ટનો મુખ્ય આધાર સ્તંભ છે.

આ આયોજન હેઠળ સુઝલોન આગામી પાંચ વર્ષમાં ૨block% થી વધુ આવક CAGR પ્રાપ્ત કરવા ઉપરાંત નાણાકીય વર્ષ ૨૦૩૧ સુધીમાં તેના સહ-વિકાસ બિઝનેસનું યોગદાન ૬૦% થી વધુ વધારવા માંગે છે. તેમજ કંપનીએ ૩ ગીગાવોટથી વધુ નિકાસ ઓર્ડર મેળવવાનું અને તેના રિન્યુએબલ એનર્જી AUM પોર્ટફોલિયોને ૭૦ ગીગાવોટથી ઉપર લઈ જવાનું લક્ષ્ય રાખ્યું છે. ભારતમાં કુલ ૧,૧૬૪ ગીગાવોટ પવન ઊર્જાની ક્ષમતા છે, જેમાં રાજસ્થાન ૨૮૪ ગીગાવોટ અને ગુજરાત ૧૮૧ ગીગાવોટની વ્યાપક ક્ષમતા સાથે મોખરે છે, પરંતુ હાલમાં દેશમાં માત્ર ૫૬ ગીગાવોટ પવન ક્ષમતા કાર્યરત હોવાથી આશરે ૧,૧૦૮ ગીગાવોટ ક્ષમતા હજુ પણ બિનઉપયોગી છે.

કંપનીએ આગામી ચાર વર્ષમાં આ આર્થિક વૃદ્ધિને વેગ આપવા માટે ચાર મુખ્ય માળખાકીય વલણોની ઓળખ કરી છે, જેમાં પવન + સૌર + સંગ્રહ મોડેલ અને ૨૦૩૦ સુધીમાં નોન-સોલાર પીક માંગને પહોંચી વળવા જરૂરી ૧૩૦ ગીગાવોટ પવન ક્ષમતાનો સમાવેશ થાય છે. આ ઉપરાંત, કેન્દ્ર સરકારનું ALMM માળખું સ્થાનિક ઉત્પાદનને મજબૂત સપ્લાય ચેઇન ધરાવતી OEM કંપનીઓ માટે ફાયદાકારક બનાવશે. વળી, વૈશ્વિક સ્તરે ચાલી રહેલી 'ચાઇના પ્લસ વન' વ્યૂહરચના અને ઊર્જા સુરક્ષા વૈવિધ્યકરણને કારણે ભારતીય પવન ઉપકરણ ઉત્પાદકો માટે આંતરરાષ્ટ્રીય નિકાસના નવા અને મોટા બજારો ખૂબ જ ઝડપથી ખૂલી રહ્યા છે.

સુઝલોનનો આ નવો વ્યૂહાત્મક રોડમેપ સ્પષ્ટ કરે છે કે કંપની હવે માત્ર પવન ટર્બાઇન ઉત્પાદક મટીને એક એન્ડ-ટુ-એન્ડ રિન્યુએબલ એનર્જી પ્લેટફોર્મ બનવા તરફ આગળ વધી રહી છે. આગામી સમયમાં, બજારના વિશ્લેષકો અને સંસ્થાકીય રોકાણકારો કંપની દ્વારા નક્કી કરાયેલા આ ભગીરથ લક્ષ્યોના ત્રિમાસિક અમલીકરણ પર ઝીણવટભરી નજર રાખશે. જો કંપની ભારતીય પવન ઊર્જા ક્ષમતાને ૨૦૪૭ સુધીમાં ૪૦૦ ગીગાવોટ સુધી લઈ જવાના લાંબાગાળાના અંદાજો સાથે તાલ મિલાવીને સમયસર લક્ષ્યાંકો હાંસલ કરશે, તો ગ્રીન એનર્જી ક્ષેત્રે આત્મનિર્ભરતા વધવાની સાથે કંપનીના બિઝનેસ સ્કેલમાં અભૂતપૂર્વ પરિવર્તન આવી શકે છે.