મુંબઈ :મહારાષ્ટ્રના રાજકીય આકાશમાં ફરી એકવાર વાદળો ઘેરાયા છે, જેમાં આજે રવિવારે ઉદ્ધવ ઠાકરે દ્વારા બોલાવવામાં આવેલી શિવસેના (UBT) ના સાંસદોની ઈમરજન્સી બેઠક દરમિયાન ત્રણ સાંસદો ગેરહાજર રહેતા સનસનાટી મચી ગઈ છે. આગામી રાજકીય વ્યુહરચના અને સંસદના સત્રની તૈયારીઓ માટે 'માતોશ્રી' ખાતે આ બેઠકનું આયોજન કરાયું હતું, પરંતુ સાંસદ ભાઉસાહેબ વાકચૌરે સમેત અન્ય સાંસદોની ગેરહાજરીએ પક્ષમાં મોટા પાયે ભંગાણના સંકેતો આપ્યા છે.

'માતોશ્રી' પર કટોકટીની બેઠક અને સાંસદો ગાયબ! મળતી માહિતી અનુસાર, ઉદ્ધવ ઠાકરેએ દિલ્હીમાં હાજર પોતાના તમામ સાંસદોને તાત્કાલિક મુંબઈ પહોંચવા આદેશ આપ્યો હતો. આગામી રાજકીય પરિસ્થિતિઓ અને સંસદના આગામી સત્રને લઈને વ્યુહરચના ઘડવા માટે બપોરે 12:30 વાગ્યે આ બેઠકનું આયોજન કરાયું હતું. ફોન બંધ, પીએ પણ ગાયબ: શિરડીના સાંસદ ભાઉસાહેબ વાકચૌરેનો મોબાઇલ ફોન સવારથી જ સતત બંધ આવી રહ્યો છે. તેઓ છેલ્લા બે દિવસથી પરિવાર સાથે ક્યાંક બહાર ગયા છે અને આશ્ચર્યની વાત એ છે કે તેમના પર્સનલ આસિસ્ટન્ટ(PA)નો પણ કોઈ પત્તો નથી. અન્ય બે સાંસદોની પણ ગેરહાજરી: સૂત્રોના જણાવ્યા મુજબ, સાંસદ સંજય જાધવ અને નાગેશ પાટીલ અષ્ટિકરે પણ પક્ષને જાણ કરી દીધી છે કે તેઓ કોઈ અંગત કારણોસર આજે ઉદ્ધવ ઠાકરેની આ ઈમરજન્સી બેઠકમાં હાજર રહી શકશે નહીં.

મુખ્યમંત્રી શિંદેનું 'ઓપરેશન ટાઇગર': શું ફરી ભંગાણ પડશે? મહારાષ્ટ્રના રાજકીય વર્તુળોમાં આ સમયે મુખ્યમંત્રી એકનાથ શિંદેના 'ઓપરેશન ટાઇગર' ને લઈને ભારે ચર્ચાઓ ચાલી રહી છે. રાજકીય વિશ્લેષકોનું માનવું છે કે આ જ ઓપરેશનના ડરથી ઉદ્ધવ ઠાકરેએ ઉતાવળે આ બેઠક બોલાવવી પડી છે. 9માંથી 7 સાંસદો સંપર્કમાં હોવાનો દાવો હાલમાં લોકસભામાં ઉદ્ધવ જૂથ (UBT) પાસે કુલ 9 સાંસદો છે અને રાજ્યસભામાં માત્ર સંજય રાઉત બચ્યા છે. પાછલા કેટલાક દિવસોથી શિંદે જૂથ અને સત્તાધારી પક્ષના નેતાઓ સતત એવો દાવો કરી રહ્યા છે કે ઉદ્ધવ જૂથના 9માંથી ઓછામાં ઓછા 7 સાંસદો મુખ્યમંત્રી એકનાથ શિંદેના સીધા સંપર્કમાં છે. આ સાંસદો ગમે ત્યારે પક્ષપલટો કરીને શિંદે જૂથમાં જોડાઈ શકે છે તેવી અટકળોએ જોર પકડ્યું છે.

હાલમાં મહારાષ્ટ્રના રાજકારણમાં ચાલી રહેલી આ હલચલ ઉદ્ધવ ઠાકરે માટે એક મોટી અગ્નિપરીક્ષા સમાન છે. જો આ સાંસદો પક્ષ છોડશે, તો શિવસેના (UBT) નું સંગઠન વધુ નબળું પડી શકે છે. આગામી દિવસોમાં રાજ્યમાં સત્તાપલટો થાય છે કે ઠાકરે જૂથ પોતાના સાંસદોને ફરી મનાવવામાં સફળ રહે છે, તે જોવું રસપ્રદ રહેશે. પોલીસ અને ગુપ્તચર એજન્સીઓ પણ આ રાજકીય ઘટનાક્રમ પર ચાંપતી નજર રાખી રહી છે.