નવી દિલ્હી :આગામી અઠવાડિયે બેંકને લગતું કોઈ જરૂરી કામ પતાવવાનું હોય, તો ઘરની બહાર નીકળતા પહેલા બેંકની રજાઓની યાદી ચોક્કસ જોઈ લો. 15 જૂનથી 21 જૂન 2026 વચ્ચે દેશના કેટલાક રાજ્યોમાં અલગ-અલગ કારણોસર બેંકો બંધ રહેવાની છે. ભારતીય રિઝર્વ બેંક  દ્વારા જાહેર કરાયેલા રજાઓના કેલેન્ડર મુજબ, જૂન મહિનામાં શનિવાર, રવિવાર અને વિવિધ તહેવારો મળીને કુલ 11 દિવસ બેંકો બંધ રહેશે.

જો કે, તમામ રાજ્યોમાં એકસરખી રજાઓ હોતી નથી. ઘણી રજાઓ પ્રાદેશિક તહેવારો અને સ્થાનિક કાર્યક્રમોના કારણે માત્ર અમુક ખાસ રાજ્યોમાં જ લાગુ પડે છે. આવી સ્થિતિમાં બેંક જતાં પહેલાં એ જાણી લેવું જરૂરી છે કે તમારા શહેરમાં કે રાજ્યમાં બેંક ખુલ્લી રહેશે કે નહીં.

15 જૂન 2026, સોમવારના રોજ દેશભરમાં બેંકો બંધ નહીં રહે, પરંતુ કેટલાક રાજ્યોમાં રજા જાહેર કરવામાં આવી છે. મિઝોરમની રાજધાની આઈઝોલમાં 'યંગ મિઝો એસોસિએશન' (YMA) ડે મનાવવામાં આવશે, જેના કારણે ત્યાંની તમામ બેંકો બંધ રહેશે. જ્યારે ઓડિશાની રાજધાની ભુવનેશ્વરમાં 'રાજા સંક્રાંતિ' તહેવાર નિમિત્તે બેંકિંગ સેવાઓ પ્રભાવિત રહેશે અને બેંકો બંધ રહેશે. દેશના બાકીના રાજ્યોમાં આ દિવસે બેંકો સામાન્ય રીતે ખુલ્લી રહેશે.

21 જૂન 2026ના રોજ રવિવાર છે. રવિવાર હોવાને કારણે દેશની તમામ સરકારી અને ખાનગી બેંકો બંધ રહેશે. આ દિવસે કોઈપણ બેંક શાખામાં કેશ ડિપોઝિટ, ચેક ક્લિયરન્સ કે અન્ય કામકાજ થઈ શકશે નહીં.

જૂન મહિનાના છેલ્લા અઠવાડિયામાં પણ તહેવારોના કારણે ઘણી જગ્યાએ બેંકો બંધ રહેશે

25 જૂન: મોહરમ નિમિત્તે વિજયવાડામાં બેંકો બંધ રહેશે.

26 જૂન: મોહરમના કારણે દેશના ઘણા મોટા શહેરો જેવા કે નવી દિલ્હી, મુંબઈ, કોલકાતા, ચેન્નાઈ, બેંગલુરુ, લખનૌ, પટના, રાંચી, ભોપાલ, જમ્મુ અને શ્રીનગરમાં બેંકો બંધ રહેશે.

29 જૂન: સંત ગુરુ કબીર જયંતિ નિમિત્તે શિમલામાં બેંકોમાં રજા રહેશે.

30 જૂન: 'રેમનાની' નામના પ્રાદેશિક અવકાશના કારણે આઈઝોલમાં બેંકો બંધ રહેશે.

બેંક શાખાઓ બંધ હોવા છતાં ગ્રાહકોએ વધુ ચિંતા કરવાની જરૂર નથી. એટીએમ, ઈન્ટરનેટ બેંકિંગ, મોબાઈલ બેંકિંગ અને યુપીઆઈ જેવી ડિજિટલ સેવાઓ હંમેશની જેમ 24 કલાક ચાલુ રહેશે. ગ્રાહકો ઘરે બેઠા પૈસા ટ્રાન્સફર કરી શકે છે, બિલ ભરી શકે છે અને બેલેન્સ ચેક કરી શકે છે.