વિશ્વ ISISની બર્બરતા અંગેની વાર્તાઓ સાંભળી રહ્યું હતું, ત્યારે આ આતંકી સંગઠન માત્ર લોકોની હત્યા સુધી સીમિત નહોતું, પરંતુ મહિલાઓને ગુલામ બનાવી તેમની સાથે કેવી રીતે વ્યવહાર કરવો તે અંગે નિયમો પણ તૈયાર કરતું હતું. હવે એક અદાલતમાં આવા દસ્તાવેજોનો ઉલ્લેખ થયો છે, જેમણે ફરી એકવાર ISISની ક્રૂર વિચારધારાને દુનિયા સામે ઉજાગર કરી છે.

‘ડેઇલી મેઇલ’ની એક રિપોર્ટ મુજબ, ઓસ્ટ્રેલિયાની એક અદાલતમાં “ISISની દુલ્હન” તરીકે ઓળખાતી એક મહિલાના કેસની સુનાવણી દરમિયાન આવા દસ્તાવેજો અને હેન્ડબુકનો ખુલાસો થયો છે. આ દસ્તાવેજોમાં ISIS દ્વારા મહિલા કેદીઓ અને ગુલામો સાથે કરવામાં આવતી ક્રૂરતાને લઈને તથાકથિત “નિયમો” લખવામાં આવ્યા હતા. આમાંથી સ્પષ્ટ થાય છે કે સંગઠન મહિલાઓને માનવી તરીકે નહીં પરંતુ ખરીદી-વેચાણની વસ્તુ તરીકે જોતું હતું.

અદાલતમાં રજૂ થયેલી માહિતી મુજબ ISISના રિસર્ચ અને ફતવા વિભાગ દ્વારા એક પુસ્તિકા પ્રકાશિત કરવામાં આવી હતી. તેમાં કેદીઓ અને ગુલામો સંબંધિત પ્રશ્નો અને જવાબો સામેલ હતા. તપાસ અધિકારીઓના જણાવ્યા અનુસાર આ દસ્તાવેજમાં મહિલાઓને ગુલામ બનાવવા, તેમને ખરીદવા-વેચવા, ભેટ તરીકે આપવી અથવા અન્ય લોકો સાથે આપલે કરવા તેમજ તેમના પર જાતીય અત્યાચારને “કાયદેસર” બતાવવાનો પ્રયાસ કરવામાં આવ્યો હતો.

આ સિવાય તેમાં મહિલા કેદીઓ સાથે વ્યવહાર કરવાની રીતો અને તેમને સજા આપવા સંબંધિત માર્ગદર્શિકાઓ પણ આપવામાં આવી હતી.

અદાલતમાં રજૂ થયેલી માહિતી મુજબ ISISએ પોતાની પ્રચાર સામગ્રીમાં પણ આ પ્રથાઓનું સમર્થન કર્યું હતું. સંગઠનની મેગેઝિનમાં એવા લેખો પ્રકાશિત થતા હતા જેમાં યઝીદી મહિલાઓને બંધક બનાવવું, તેમના પર યૌન અત્યાચાર કરવો અને તેમને ગુલામ બનાવવું યોગ્ય ઠરાવવાનો પ્રયાસ કરવામાં આવતો હતો. તપાસકર્તાઓનું કહેવું છે કે બાદમાં સંગઠને ગુલામી અને બંધક બનાવવાની પ્રથાને “ધાર્મિક અને વૈચારિક આધાર” આપવા માટે અલગથી પુસ્તિકાઓ પણ બહાર પાડી હતી.

અદાલતમાં જણાવાયું કે ઓગસ્ટ 2014માં ઇરાકના સિન્જાર વિસ્તારમાં ISISના હુમલા બાદ યઝીદી સમુદાયને નિશાન બનાવવામાં આવ્યો હતો. અંદાજ મુજબ આ હુમલામાં હજારો લોકોની હત્યા કરવામાં આવી હતી અને લગભગ 6800 યઝીદી મહિલાઓ અને બાળકો ISISના કબજામાં પહોંચી ગયા હતા. આ પૈકી અનેક આજે પણ લાપતા છે.

તપાસ એજન્સીઓ મુજબ આ મહિલાઓ અને બાળકોને અલગ-અલગ લડાકાઓ વચ્ચે ખરીદવામાં અને વેચવામાં આવતા હતા. તેમને વારંવાર એક સ્થળેથી બીજા સ્થળે ખસેડવામાં આવતા હતા અને સતત યૌન અત્યાચારનો સામનો કરવો પડતો હતો.

સુનાવણી દરમિયાન એક યઝીદી યુવતીનો કેસ પણ રજૂ થયો. આરોપ મુજબ જ્યારે તે માત્ર 15 વર્ષની હતી ત્યારે ISISના લડાકાઓએ તેના પરિવાર પર હુમલો કર્યો હતો. તેની માતા અને ભાઈની હત્યા કરવામાં આવી હતી અને તેને બંધક બનાવવામાં આવી હતી.

અદાલતમાં જણાવાયું કે ત્યારબાદના ઘણા વર્ષો સુધી તેને અલગ-અલગ લોકો પાસે વેચવામાં આવી અને તેના પર સતત યૌન અત્યાચાર કરવામાં આવ્યો. તેને ગંભીર યાતનાઓ પણ આપવામાં આવી હતી. બાદમાં તેને એક પરિવાર દ્વારા લગભગ 10,000 અમેરિકી ડોલરમાં ખરીદવામાં આવી હોવાનું કહેવાય છે.

તપાસકર્તાઓના આરોપ મુજબ તેને ઘરકામ માટે રાખવામાં આવી હતી, પરંતુ તેના પર સતત જાતીય અત્યાચાર થતો હતો. તેની ગતિવિધિ પર સંપૂર્ણ પ્રતિબંધ હતો અને તેને બહાર જવાની કોઈ સ્વતંત્રતા નહોતી. તેના પાસે ફોન પણ નહોતો અને તે વિસ્તારથી અજાણ હતી.

વિશેષજ્ઞોનું માનવું છે કે ISISના નિયંત્રણવાળા વિસ્તારોમાં મહિલાઓ, ખાસ કરીને યઝીદી મહિલાઓની સ્થિતિ અત્યંત ભયાનક હતી. તેમને તેમની ઇચ્છા વિરુદ્ધ બંધક બનાવી રાખવામાં આવતી હતી અને તેમના મૂળભૂત અધિકારો છીનવી લેવાતા હતા. તેમને યૌન દાસી તરીકે વર્તન કરવામાં આવતું હતું.

આ જ કારણ છે કે સંયુક્ત રાષ્ટ્ર સહિત અનેક આંતરરાષ્ટ્રીય સંસ્થાઓએ ISIS પર માનવતા વિરુદ્ધના ગુનાઓ, ગુલામી અને યૌન હિંસા જેવા ગંભીર આરોપો મૂક્યા છે.

અદાલતમાં રજૂ થયેલા દસ્તાવેજો અને સાક્ષીઓ ફરી એકવાર સ્પષ્ટ કરે છે કે ISISની હિંસા માત્ર યુદ્ધ કે હત્યા સુધી સીમિત નહોતી. આ સંગઠને મહિલાઓને ગુલામ બનાવવાની અને તેમના પર અમાનવીય અત્યાચારને વિચારધારાત્મક રીતે યોગ્ય ઠેરવવાનો પ્રયાસ કર્યો હતો.

આજેય ISISના અત્યાચારની કહાનીઓ દુનિયાને ઝંઝોડી નાખે છે અને હજારો પીડિત પરિવારો ન્યાયની રાહ જોઈ રહ્યા છે.