સ્ટેનફોર્ડ, અમેરિકા તા.૧૫ : ગૂગલના CEO સુંદર પિચાઈ જ્યારે તેમના જૂના કેમ્પસ સ્ટેનફોર્ડ યુનિવર્સિટીમાં ભાષણ આપવા પહોંચ્યા ત્યારે કાર્યક્રમ દરમિયાન અચાનક હોબાળો મચી ગયો. ભાષણની વચ્ચે જ વિદ્યાર્થીઓના એક જૂથે ઉભા થઈને 'પ્રોજેક્ટ નિમ્બસ' બંધ કરોના નારા લગાવ્યા અને વિરોધ પ્રદર્શન શરૂ કરી દીધું. સુરક્ષા કર્મચારીઓએ તરત જ હસ્તક્ષેપ કરીને વિરોધ કરી રહેલા વિદ્યાર્થીઓને હોલમાંથી બહાર કાઢ્યા હતા.

'પ્રોજેક્ટ નિમ્બસ' એ ગૂગલ અને એમેઝોનનો સંયુક્ત 1.2 બિલિયન ડોલરનો કરાર છે જે ઈઝરાયેલ સરકાર અને તેની સેનાને ક્લાઉડ કમ્પ્યુટિંગ અને આર્ટિફિશિયલ ઈન્ટેલિજન્સ સેવાઓ પૂરી પાડે છે. આ કરાર 2021માં થયો હતો. વિદ્યાર્થીઓ અને માનવાધિકાર સંગઠનો આક્ષેપ છે કે આ ટેકનોલોજીનો ઉપયોગ પેલેસ્ટાઈનમાં સર્વેલન્સ, ડેટા સંગ્રહ અને લશ્કરી કામગીરીઓ માટે થઈ રહ્યો છે. તેથી ગૂગલે આ કરાર તાત્કાલિક રદ કરવો જોઈએ તેવી તેમની માંગ છે.

હોબાળા વચ્ચે પણ સુંદર પિચાઈએ પોતાનું ભાષણ ચાલુ રાખ્યું હતું. તેમણે કહ્યું કે યુનિવર્સિટી કેમ્પસમાં અભિપ્રાયની સ્વતંત્રતા હોવી જોઈએ, પરંતુ તે શાંતિપૂર્ણ રીતે વ્યક્ત થવી જોઈએ. તેમણે ટેકનોલોજીની નૈતિકતા અને તેના જવાબદાર ઉપયોગ પર પણ વાત કરી. ગૂગલે અગાઉ પણ સ્પષ્ટતા કરી છે કે 'પ્રોજેક્ટ નિમ્બસ'નો હેતુ ઈઝરાયેલની સરકારી વેબસાઈટ્સ, હેલ્થકેર અને અન્ય નાગરિક પ્રોજેક્ટ્સ માટે ક્લાઉડ સેવાઓ આપવાનો છે, અને તે હથિયારો કે લક્ષ્ય નિર્ધારિત કરતી સિસ્ટમો માટે નથી.

આ પહેલા પણ ગૂગલના અનેક ઓફિસમાં કર્મચારીઓએ આ પ્રોજેક્ટના વિરોધમાં વોકઆઉટ અને પ્રદર્શન કર્યા હતા. સ્ટેનફોર્ડની ઘટના એ બતાવે છે કે ટેકનોલોજી કંપનીઓના સંરક્ષા અને સરકારી કરારોને લઈને વિદ્યાર્થીઓ અને યુવા પેઢીમાં કેટલો અસંતોષ છે.