ભગવાન શિવના પવિત્ર ધામ કૈલાશ માનસરોવર યાત્રા માટે તૈયાર થઈ રહેલા ભક્તો માટે વિદેશ મંત્રાલયે મહત્વપૂર્ણ ચેતવણી જાહેર કરી છે. તાજેતરમાં સોશિયલ મીડિયા અને ઇન્ટરનેટ પર યાત્રાની નોંધણી અને બુકિંગ સંબંધિત અનેક જાહેરાતો વાયરલ થઈ રહી છે. મંત્રાલયે જણાવ્યું છે કે આમાંથી ઘણી જાહેરાતો નકલી છે અને લોકો સાથે છેતરપિંડી કરવા માટે બનાવવામાં આવી છે. તેથી યાત્રાળુઓએ કોઈપણ અજાણી લિંક અથવા વેબસાઇટ પર વિશ્વાસ ન કરવાની સલાહ આપવામાં આવી છે.

વિદેશ મંત્રાલયના જણાવ્યા મુજબ કેટલાક તત્વો સરકાર અથવા મંત્રાલય સાથે જોડાયેલા હોવાનો ખોટો દાવો કરીને કૈલાશ માનસરોવર યાત્રાના નામે લોકોને લલચાવી રહ્યા છે. સોશિયલ મીડિયા પોસ્ટ્સ, વોટ્સએપ મેસેજ અને અન્ય ઓનલાઈન માધ્યમો દ્વારા લોકો સુધી પહોંચીને તેઓ નોંધણી અને બુકિંગની સુવિધા આપવાનો દાવો કરે છે. મંત્રાલયે સ્પષ્ટ કર્યું છે કે આવી જાહેરાતો પર વિશ્વાસ કરવો જોખમી સાબિત થઈ શકે છે.

વિદેશ મંત્રાલયે જણાવ્યું છે કે કૈલાશ માનસરોવર યાત્રા માટે માત્ર સત્તાવાર પોર્ટલ kmy.gov.in જ માન્ય છે. જો કોઈ અન્ય વેબસાઇટ, ટ્રાવેલ એજન્સી અથવા સોશિયલ મીડિયા એકાઉન્ટ સત્તાવાર નોંધણી કરવાની ઓફર કરે તો તેની સત્યતા ચકાસ્યા વગર કોઈ માહિતી કે ચુકવણી ન કરવી. યાત્રા સંબંધિત તમામ માહિતી અને નોંધણી પ્રક્રિયા માટે ભક્તોએ માત્ર સરકારી પોર્ટલનો જ ઉપયોગ કરવો જોઈએ.

 સાયબર ઠગો ઘણી વખત ધાર્મિક યાત્રાઓ અને સરકારી યોજનાઓના નામે નકલી વેબસાઇટ્સ બનાવી લોકોને નોંધણી ફી અથવા અન્ય ચાર્જના નામે પૈસા ચૂકવવા પ્રેરિત કરે છે. ઘણીવાર લોકો ઉતાવળમાં પોતાની વ્યક્તિગત માહિતી અને બેંકિંગ વિગતો શેર કરી દેતા હોય છે, જેના કારણે આર્થિક નુકસાન થઈ શકે છે. કૈલાશ માનસરોવર યાત્રા હિન્દુ ધર્મની સૌથી પવિત્ર યાત્રાઓમાંની એક માનવામાં આવે છે. માન્યતા મુજબ કૈલાશ પર્વત ભગવાન શિવનું નિવાસસ્થાન છે અને દર વર્ષે હજારો ભક્તો આ યાત્રા માટે અરજી કરે છે. આ સમગ્ર યાત્રાનું સંચાલન અને દેખરેખ ભારત સરકારના વિદેશ મંત્રાલય દ્વારા કરવામાં આવે છે.