બાલોત્રા:: રાજસ્થાનના બાલોત્રાના પટોડી વિસ્તારમાં મંગળવારે એક એવો ભયાનક માર્ગ અકસ્માત સર્જાયો, જેણે સમગ્ર વિસ્તારને હચમચાવી દીધો છે. એક રોડવેઝ બસ અને કાર વચ્ચે થયેલી સામસામેની ટક્કરમાં એક જ પરિવારના ચાર સગા ભાઈઓના મોત નિપજતા શોકનું મોજું ફરી વળ્યું છે. આ અકસ્માત એટલો ગંભીર હતો કે કારનો કચ્ચરઘાણ નીકળી ગયો હતો અને મુસાફરો અંદર જ ફસાઈ ગયા હતા.
શું હતી કરુણ ઘટના?
મળતી માહિતી મુજબ, કોડુકા ગામના રહેવાસી ઉદારામ, રેખા રામ, વિષ્ણ રામ અને જોગારામ (ભંવરરામના પુત્રો) કોઈ કામકાજ અર્થે પોતાની કાર લઈને પટોડી તરફ જઈ રહ્યા હતા. આ દરમિયાન સામેથી પૂરપાટ ઝડપે આવતી રોડવેઝ બસ સાથે તેમની કારની ટક્કર થઈ. અકસ્માતનો અવાજ એટલો પ્રચંડ હતો કે આસપાસના ગ્રામજનો તાત્કાલિક ઘટનાસ્થળે દોડી આવ્યા હતા. ગ્રામજનોએ ભારે જહેમત ઉઠાવી કારના દરવાજા તોડીને અંદર ફસાયેલા યુવાનોને બહાર કાઢ્યા હતા, પરંતુ કમનસીબે બે ભાઈઓએ ઘટનાસ્થળે જ દમ તોડી દીધો હતો, જ્યારે અન્ય બે ભાઈઓને બાલોત્રા રિફર કરવામાં આવ્યા હતા, જ્યાં સારવાર દરમિયાન તેમણે પણ અંતિમ શ્વાસ લીધા હતા.
પરિવારનો આધાર છીનવાયો
આ અકસ્માતમાં મૃત્યુ પામેલા ચારેય ભાઈઓ મજૂરી કામ કરીને પોતાના વૃદ્ધ માતા-પિતાનું ગુજરાન ચલાવતા હતા. પરિવારના ચાર કમાઉ દીકરાઓ એકસાથે છીનવાઈ જતાં વૃદ્ધ માતા-પિતા સંપૂર્ણપણે નિરાધાર બન્યા છે. ગામમાં અને સમગ્ર મેઘવાલ સમુદાયમાં આ સમાચાર વાયુવેગે ફેલાતા અરેરાટી વ્યાપી ગઈ હતી.
તંત્ર પર આક્રોશ અને પોલીસ તપાસ
ઘટના બાદ મોટી સંખ્યામાં ગ્રામજનો અને સમુદાયના લોકો પટોડી સામુદાયિક આરોગ્ય કેન્દ્ર ખાતે એકઠા થયા હતા. પરિવારે યોગ્ય વળતરની માંગણી સાથે હોસ્પિટલ પરિસરમાં ભારે વિરોધ પ્રદર્શન કર્યું હતું, જેના પગલે પોલીસ અધિકારીઓ દ્વારા ઘટનાસ્થળે ચુસ્ત પોલીસ બંદોબસ્ત ગોઠવી દેવામાં આવ્યો છે. હાલ પોલીસ દ્વારા સમગ્ર મામલે ગુનો નોંધીને અકસ્માત કયા કારણોસર સર્જાયો અને તેમાં કોની બેદરકારી હતી, તે અંગેની તપાસ હાથ ધરવામાં આવી છે. બાલોત્રાના આ અકસ્માતે એક હસતા-રમતા પરિવારના સપનાઓ કાયમ માટે રોડ પર રોળી દીધા છે.