ન્યૂયોર્ક: વૈશ્વિક સ્તરે ક્વિક-સર્વિસ રેસ્ટોરન્ટ ચેઈન ચલાવતી દુનિયાની અગ્રણી કંપની યમ! બ્રાન્ડ્સે (Yum! Brands) પોતાના પોર્ટફોલિયોને વધુ મજબૂત કરવા અને મુખ્ય ગ્રોથ બ્રાન્ડ્સ પર ધ્યાન કેન્દ્રિત કરવાના હેતુથી પિઝા હટ (Pizza Hut) બિઝનેસને બે અલગ-અલગ સોદાઓ હેઠળ કુલ ૨.૭ અબજ ડોલર (આશરે ૨૨,૪૦૦ કરોડ રૂપિયા) માં વેચવાની સત્તાવાર જાહેરાત કરી છે. આ મોટા વિભાજનની સાથે જ કંપનીના બોર્ડ ઓફ ડિરેક્ટર્સે શેરધારકોને મૂડી પરત કરવાના સંકલ્પ સાથે વધારાના ૪ અબજ ડોલર (આશરે ૩૩,૨૦૦ કરોડ રૂપિયા) ના શેર પુનઃખરીદી (શેર બાયબેક) કાર્યક્રમને પણ મંજૂરી આપી દીધી છે. કંપની દ્વારા લેવાયેલા આ આર્થિક નિર્ણયની અસર ભારતીય શેરબજાર પર પણ જોવા મળી હતી, જેમાં પિઝા હટના ફ્રેન્ચાઇઝી ઓપરેટર્સ સેફાયર ફૂડ્સ ઇન્ડિયા લિમિટેડના શેર ૧.૦૫ ટકા ઘટીને ૧૭૯.૭૭ રૂપિયા અને દેવયાની ઇન્ટરનેશનલ લિમિટેડના શેર ૧.૪૦ ટકા ઘટીને ૧૧૨.૫૮ રૂપિયા પર ટ્રેડ થતા જોવા મળ્યા હતા.

બે અલગ-અલગ સોદા હેઠળ પિઝા હટનું વેચાણ અને આર્થિક સમીકરણઓ:

લુઇસવિલે, કેન્ટુકી સ્થિત યમ! બ્રાન્ડ્સના વહીવટીતંત્રે સ્પષ્ટતા કરી છે કે નવેમ્બર ૨૦૨૫ માં શરૂ કરાયેલી વ્યૂહાત્મક સમીક્ષા બાદ આ આખરી કરાર કરવામાં આવ્યા છે. આ સોદા અંતર્ગત મેઇનલેન્ડ ચાઇના (મુખ્ય ચીન) સિવાયના તમામ વૈશ્વિક પિઝા હટ ઓપરેશન્સ ખાનગી ઇક્વિટી ફર્મ લોન્ગરેન્જ કેપિટલને આશરે ૧.૫ અબજ ડોલર (આશરે ૧૨,૪૫૦ કરોડ રૂપિયા) માં વેચવામાં આવશે. જ્યારે પિઝા હટ ચાઇનાનો સંપૂર્ણ કારોબાર યમ ચાઇના હોલ્ડિંગ્સ દ્વારા ૧.૨ અબજ ડોલર (આશરે ૯,૯૬૦ કરોડ રૂપિયા) માં હસ્તગત કરવામાં આવશે. કંપનીને આશા છે કે તમામ નિયમનકારી મંજૂરીઓ અને શરતો પૂર્ણ થયા બાદ, વર્ષ ૨૦૨૬ ના ત્રીજા ક્વાર્ટરમાં આ ટ્રાન્ઝેક્શન સંપૂર્ણપણે બંધ થઈ જશે. આ સોદા બાદ યમ! બ્રાન્ડ્સ ભવિષ્યના નાણાકીય અહેવાલોમાં પિઝા હટને અલગ બિઝનેસ ડિવિઝન તરીકે દર્શાવવાનું બંધ કરશે.

ટેક્સ બાદ ૨.૩ અબજ ડોલર મળશે અને વધારાના કમાણીના વિકલ્પો ખુલ્લા રહેશે:

યમ! બ્રાન્ડ્સના જણાવ્યા અનુસાર, કરવેરા, ટ્રાન્ઝેક્શન ફી અને ક્લોઝિંગ એડજસ્ટમેન્ટ્સ બાદ કંપનીને આશરે ૨.૩ અબજ ડોલર (આશરે ૧૯,૦૯૦ કરોડ રૂપિયા) ની ચોખ્ખી રકમ પ્રાપ્ત થશે, જેમાં સંભવિત અર્ન-આઉટ પેમેન્ટનો સમાવેશ થતો નથી. સોદાના ભાગરૂપે, જો અમુક ચોક્કસ વ્યાપારી શરતો પૂર્ણ થશે, તો કંપનીને વર્ષ ૨૦૩૦ સુધીમાં લોન્ગરેન્જ કેપિટલ પાસેથી વધારાના ૭૫ મિલિયન ડોલર (આશરે ૬૨૨ કરોડ રૂપિયા) મળી શકે છે. જોકે, આ સમગ્ર પ્રક્રિયાને પૂર્ણ કરવા માટે કંપની વર્ષ ૨૦૨૬ ના બાકીના મહિનાઓ દરમિયાન આશરે ૮૫ મિલિયન ડોલર (આશરે ૭૦૫ કરોડ રૂપિયા) નો વન-ટાઇમ સેપરેશન (અલગ થવાનો) ખર્ચ પણ ભોગવશે. યમ! બ્રાન્ડ્સના ચીફ એક્ઝિક્યુટિવ ઓફિસર ક્રિસ ટર્નરે જણાવ્યું હતું કે, આ વ્યવહારો યમ! ને વધુ કેન્દ્રિત કંપની બનવામાં મદદ કરશે જે પોતાની સ્કેલ, ટેકનોલોજી અને પ્રતિભાનો લાભ ઉઠાવીને હિતધારકોને સતત મૂલ્ય પ્રદાન કરતી રહેશે. લોન્ગરેન્જ અને યમ ચાઇના હેઠળ પિઝા હટ ભવિષ્યના વિકાસ માટે વધુ મજબૂત સ્થિતિમાં રહેશે.

૪ અબજ ડોલરનો શેર બાયબેક પ્રોગ્રામ અને વૈશ્વિક વ્યાપ:

વેચાણની જાહેરાતની સાથે જ કંપનીએ તેના શેરધારકોને વધારાની મૂડી પરત કરવાના હેતુથી ૪ અબજ ડોલર (આશરે ૩૩,૨૦૦ કરોડ રૂપિયા) ના શેર બાયબેક કાર્યક્રમની જાહેરાત કરી છે. ટેક્સ પછીની ચોખ્ખી રકમનો ઉપયોગ કંપનીની મૂડી ફાળવણી વ્યૂહરચના અનુસાર બિઝનેસમાં રોકાણ કરવા અને શેરધારકોને વળતર આપવા માટે કરવામાં આવશે. ટ્રાન્ઝિશન પિરિયડ દરમિયાન વ્યવસાય સરળતાથી ચાલે તે માટે યમ! બ્રાન્ડ્સ પિઝા હટના ચીન બહારના વ્યવસાયને પ્લેટફોર્મ ટેકનોલોજી ‘બાઇટ બાય યમ!’ (Byte by Yum!) અને કોર્પોરેટ સપોર્ટ સેવાઓ પૂરી પાડવાનું ચાલુ રાખશે. આ સાથે જ યમ ચાઇના સાથેની ભાગીદારી વધુ મજબૂત કરીને ચીનમાં કેએફસી (KFC) ના વેચાણમાં વધારો કરવા અને ટેકો બેલ (Taco Bell) ના લાંબાગાળાના વિસ્તરણ માટે બંને કંપનીઓ સાથે મળીને કામ કરશે.

યમ! બ્રાન્ડ્સ હાલમાં કેએફસી, ટેકો બેલ, પિઝા હટ અને હેબિટ બર્ગર એન્ડ ગ્રીલ સહિતની અગ્રણી બ્રાન્ડ્સ ધરાવે છે, જે વિશ્વના ૧૫૫ દેશોમાં ૬૩,૦૦૦ થી વધુ રેસ્ટોરન્ટ્સ ચલાવે છે. ભારતમાં પણ ફ્રેન્ચાઇઝી ભાગીદારો અને કંપનીની માલિકી હેઠળ કેએફસી, પિઝા હટ અને ટેકો બેલના ૨,૦૦૦ થી વધુ આઉટલેટ્સ કાર્યરત છે. કંપની આ વ્યવહારોની નાણાકીય અસરો અને વર્ષ ૨૦૨૬ ના સુધારેલા આઉટલુક અંગેની વધુ વિગતો આગામી ૩૦ જુલાઈ ૨૦૨૬ ના રોજ યોજાનારી સેકન્ડ-ક્વાર્ટર અર્નિંગ કોલ દરમિયાન સત્તાવાર રીતે જાહેર કરશે.