​વોશિંગ્ટન, તા. ૪ : ​અમેરિકી સરકારે દેશની નાગરિકતા પ્રક્રિયાની પવિત્રતા અને કાયદાનું શાસન જાળવી રાખવાના ભાગરૂપે ગેરકાયદેસર તેમજ છેતરપિંડી આચરીને સિટિઝનશિપ મેળવનારા વિદેશીઓ સામે અભૂતપૂર્વ અને આક્રમક ઝુંબેશ શરૂ કરી છે. અમેરિકાના ન્યાય વિભાગે (ડિપાર્ટમેન્ટ ઓફ જસ્ટિસ) વિદેશથી આવીને વસેલા ૨૫ જેટલા નાગરિકોની યુએસ નાગરિકતા રદ કરવા માટે સંયુક્ત કાનૂની કાર્યવાહી હાથ ધરી છે, જેમાં ૬૫ વર્ષીય ભારતીય મૂળના નરેન્દર સિંહનો પણ સમાવેશ થાય છે. નરેન્દર સિંહ પર ખોટી અને બનાવટી ઓળખ ઊભી કરી અમેરિકામાં પ્રવેશ મેળવવાનો અને સત્યો છુપાવી નાગરિકતા હડપ કરવાનો ગંભીર આરોપ મૂકવામાં આવ્યો છે.

​ન્યાય વિભાગ દ્વારા ડેલાવેર જિલ્લાની ફેડરલ અદાલતમાં દાખલ કરવામાં આવેલી ફરિયાદ અનુસાર, ભારતીય મૂળના નરેન્દર સિંહે વર્ષ ૧૯૯૬થી બે અલગ-અલગ કૌટુંબિક અને વ્યક્તિગત ઓળખનો ઉપયોગ કરીને અમેરિકામાં પ્રવેશ મેળવ્યો હતો. ત્યાર બાદ તમામ સાચા તથ્યો અને કાનૂની વિગતો છુપાવીને ૧ મે, ૨૦૦૮ના રોજ તેઓ અમેરિકાના નૈસર્ગિક (નેચરલાઇઝ્ડ) નાગરિક બની ગયા હતા. અદાલતી અરજીમાં તેમના વિરુદ્ધ ખોટા નિવેદનો આપવા, માહિતી છુપાવવી અને ગેરકાયદેસર કૃત્યો આચરવા બદલ કલમ-૭ હેઠળ ગંભીર આક્ષેપો મૂકવામાં આવ્યા છે, જે તેમના સદાચાર અને નૈતિક ચરિત્ર સામે મોટા પ્રશ્નાર્થ ઊભા કરે છે.

​આ સંયુક્ત કાનૂની ઝુંબેશમાં ભારત ઉપરાંત પાકિસ્તાન, મેક્સિકો, કોલંબિયા, નાઇજીરિયા, લાઇબેરીયા, ઘાના, જમૈકા, તાઇવાન, હોન્ડુરાસ, કૅમરૂન, જોર્ડન, ક્યુબા, અલ સલ્વાડોર, હૈતી, મોલ્દોવા અને સ્વીડન સહિત કુલ ૧૭ દેશોના મૂળ નિવાસીઓનો સમાવેશ થાય છે. આ ૨૫ શંકાસ્પદોમાં પાકિસ્તાની મૂળના ઝિયા મુરાદ ભટ્ટી અને મોહમ્મદ વાસિફ નામના બે વ્યક્તિઓનો પણ સમાવેશ થાય છે, જેમણે પણ પોતાની સાચી ઓળખ છુપાવીને નાગરિકતા હાંસલ કરી હતી.

​અમેરિકાના એક્ટિંગ અટોર્ની જનરલ ટોડ બ્લેન્ચે એક સત્તાવાર નિવેદનમાં જણાવ્યું હતું કે, "અમેરિકાની નાગરિકતા એ આ દેશનું સૌથી ઉચ્ચ સન્માન અને વિશેષાધિકાર છે, જે માત્ર કાયદેસર અને પ્રામાણિક માર્ગે જ મેળવી શકાય છે. જે લોકોએ ગંભીર ગુનાઓ, બાળકો સામેના જાતીય અપરાધો, હિંસક કૃત્યો અને બોગસ ઓળખપત્રો છુપાવીને સિટિઝનશિપ મેળવી છે, તેમની સામે આ કાર્યવાહી કરવામાં આવી રહી છે." તેમણે ઉમેર્યું હતું કે ન્યાય વિભાગના ઇતિહાસમાં આ અત્યાર સુધીનો સૌથી મોટો સંકલિત ડીનેચરલાઇઝેશન (નાગરિકતા રદ કરવાનો) પ્રયાસ છે અને આ તો માત્ર શરૂઆત છે.

​ઉલ્લેખનીય છે કે ટ્રમ્પ પ્રશાસને સત્તા સંભાળ્યા બાદ ૨૦ જાન્યુઆરી, ૨૦૨૫થી અત્યાર સુધીમાં કુલ ૧૨૩ જેટલા શંકાસ્પદ નાગરિકોની સિટિઝનશિપ રદ કરવા માટે અદાલતમાં કેસો દાખલ કર્યા છે. જે લોકો સામે કેસ દાખલ થયા છે તેમાં હત્યાનો પ્રયાસ, બાળ જાતીય શોષણ, ઘરેલું હિંસા, લગ્ન કૌભાંડ (મેરેજ ફ્રોડ), પાસપોર્ટ અને આઇડેન્ટિટી ફ્રોડ, બેંક તથા ક્રેડિટ કાર્ડ ફ્રોડ અને લાયસન્સ વગર તબીબી પ્રેક્ટિસ કરવા જેવા ગંભીર અને સજાપાત્ર ગુનાઓ સામેલ છે.

​સિવિલ ડિવિઝનના આસિસ્ટન્ટ અટોર્ની જનરલ બ્રેટ શૂમેટે આ ગતિવિધિને અમેરિકી ઇતિહાસમાં ડીનેચરલાઇઝેશનનો સૌથી મોટો સળંગ તબક્કો ગણાવ્યો છે. કાયદાકીય નિષ્ણાતોના મતે જો અદાલત આ ફરિયાદોને ગ્રાહ્ય રાખશે તો સંબંધિત વ્યક્તિઓની યુએસ નાગરિકતા તાત્કાલિક અસરથી નાબૂદ થશે અને તેમને દેશનિકાલ (ડિપોટેશન) કરવાની પ્રક્રિયા પણ હાથ ધરવામાં આવી શકે છે.