ગુરુગ્રામ: તા.05: હરિયાણાના ફરીદાબાદ જિલ્લા હેઠળના મિરઝાપુર ગામમાં એક અત્યંત ચોંકાવનારી અને સનસનાટીભરી ઘટના સામે આવી છે, જ્યાં એક સનકી સ્ટૉકર (પીછો કરનાર યુવક) દ્વારા ખાનગી શાળાની મહિલા શિક્ષિકા પર જાહેરમાં ચાકુ વડે ઘાતક હુમલો કરવામાં આવ્યો છે. આ ભયાનક ઘટના પાછળ છેલ્લા બે વર્ષથી ચાલી રહેલી એકતરફી પ્રેમની ઘેલછા, અપહરણનો અગાઉનો પ્રયાસ અને બાદમાં ગ્રામીણ પંચાયતમાં થયેલી સમાધાનની વાતો જવાબદાર હોવાનું બહાર આવ્યું છે. ગંભીર રીતે ઘવાયેલી શિક્ષિકાને તાત્કાલિક સારવાર અર્થે નજીકની હોસ્પિટલમાં ખસેડવામાં આવી છે.
મળતી વિગતો મુજબ, આરોપી યુવક છેલ્લા બે વર્ષથી આ શિક્ષિકાનો સતત પીછો કરતો હતો અને તેને હેરાન-પરેશાન કરતો હતો. અગાઉ પણ આરોપીએ મહિલા શિક્ષિકાનું અપહરણ કરવાનો નિષ્ફળ પ્રયાસ કર્યો હતો, જે અંગે સ્થાનિક સ્તરે મોટો વિવાદ ઊભો થયો હતો. જોકે, તે સમયે બંને પક્ષો વચ્ચે કાનૂની કાર્યવાહી કરવાને બદલે સામાજિક રીતે અને ગ્રામ પંચાયતમાં આ મામલે સમાધાન કરી લેવામાં આવ્યું હતું. પરંતુ આ સમાધાન બાદ પણ સનકી યુવકની માનસિકતામાં કોઈ સુધારો આવ્યો ન હતો અને તેની વિકૃત નજર શિક્ષિકા પર મંડાયેલી રહી હતી.
ઘટનાના દિવસે શિક્ષિકા જ્યારે પોતાના ઘરેથી શાળાએ જવા માટે નીકળી ત્યારે અગાઉથી જ ઘાત લગાવીને બેઠેલા આરોપીએ તેનો રસ્તો રોક્યો હતો. તે કંઈ સમજે તે પહેલાં જ આરોપીએ તેની સાથે ઝઘડો શરૂ કર્યો હતો અને પોતાના ખિસ્સામાંથી તીક્ષ્ણ ચાકુ કાઢીને શિક્ષિકા પર એક પછી એક અનેક ઘા ઝીંકી દીધા હતા. શિક્ષિકાની ચીસાચીસ સાંભળીને આસપાસના લોકો દોડી આવતા આરોપી ઘટનાસ્થળેથી ફરાર થઈ ગયો હતો. પોલીસ કંટ્રોલ રૂમને જાણ થતાં જ પોલીસ કાફલો ઘટનાસ્થળે પહોંચી ગયો હતો. હાલમાં પોલીસે ગુનો નોંધીને ફરાર આરોપીને ઝડપી પાડવા માટે જુદી જુદી ટીમો બનાવીને ચક્રગતિમાન કર્યા છે.