કેનબરા: તા.05: ઓસ્ટ્રેલિયા જવા ઈચ્છતા અને ત્યાં સેટલ થવાના સ્વપ્ન જોતા હજારો ભારતીય પ્રોફેશનલ્સ અને સ્કિલ વર્કર્સ માટે એક અત્યંત મહત્વના સમાચાર સામે આવ્યા છે. ઓસ્ટ્રેલિયન સરકારે સ્કિલ અને એમ્પ્લોયર-સ્પોન્સર્ડ (નોકરીદાતા-પ્રાયોજિત) વિઝા અરજીઓ માટે નવી પ્રોસેસિંગ પ્રાયોરિટી સિસ્ટમ રજૂ કરી છે. નવા માળખા અનુસાર, દેશમાં કૌશલ્યની તીવ્ર અછત ધરાવતા ચોક્કસ ક્ષેત્રોની અરજીઓને પ્રાથમિકતા આપીને ઝડપથી મંજૂરી આપવામાં આવશે. આ નવો નિયમ ૨૫ જુલાઈ, ૨૦૨૬થી લાગુ કરી દેવામાં આવ્યો છે અને હાલમાં પેન્ડિંગ રહેલી તમામ જૂની અરજીઓ પર પણ આ જ નીતિ લાગુ પડશે.
વૈશ્વિક વિઝા કન્સલ્ટન્સી ફર્મ 'ફ્રેગોમેન'ના અહેવાલ મુજબ, નવી વ્યવસ્થા હેઠળ ઓસ્ટ્રેલિયાના સંરક્ષણ (Defence & Law Enforcement), હેલ્થકેર, શિક્ષણ (Education) અને બાંધકામ (Construction) ક્ષેત્રમાં કામ કરતા અરજદારોને સૌથી પહેલી પ્રાથમિકતા આપવામાં આવશે. આ ઉપરાંત, દેશની બહારથી અરજી કરનારાઓની સરખામણીએ જે અરજદારો હાલમાં ઓસ્ટ્રેલિયામાં જ હાજર છે, તેમની અરજીઓ ઝડપથી પ્રોસેસ કરવામાં આવશે. આ ફેરફાર પાછળનો મુખ્ય હેતુ દેશના મહત્વપૂર્ણ ઉદ્યોગોને મજબૂત કરવાનો અને AUKUS સુરક્ષા ભાગીદારી હેઠળની આંતરરાષ્ટ્રીય પ્રતિબદ્ધતાઓને પૂર્ણ કરવાનો છે.
જોકે, આ નિર્ણયથી પ્રાદેશિક (Regional) ક્ષેત્રો માટે અરજી કરનારા કેટલાક વર્ગને ફટકો પડી શકે છે. સરકારે પ્રાદેશિક નોમિનેશન અને માન્યતા પ્રાપ્ત નોકરીદાતાઓ દ્વારા સ્પોન્સર કરાયેલી અરજીઓને અગાઉ મળતી વિશિષ્ટ પ્રાથમિકતા દૂર કરી દીધી છે. આના પરિણામે, એમ્પ્લોયર નોમિનેશન સ્કીમ (સબક્લાસ ૧૮૬) સહિતની કેટેગરીમાં અરજી કરનારા જે વ્યાવસાયિકો આ પ્રાથમિકતા ક્ષેત્રોમાં નથી આવતા, તેમણે વિઝા મેળવવા માટે હવે ૧૨ થી ૧૫ મહિના કે તેથી વધુ સમય સુધી રાહ જોવી પડી શકે છે.
ઉલ્લેખનીય છે કે આ ફેરફારો સબક્લાસ ૧૮૬, ૪૮૨, ૧૮૯, ૧૯૦, ૪૯૧ અને ૪૯૪ જેવી તમામ મુખ્ય સ્કિલ વિઝા શ્રેણીઓને વ્યાપકપણે અસર કરશે. તે જ સમયે, સરકારે 'નેશનલ ઇનોવેશન વિઝા' અને ફેમિલી માઇગ્રેશન માટે પણ સુધારેલી નીતિ અમલી બનાવી છે, જેમાં આર્ટિફિશિયલ ઇન્ટેલિજન્સ, રિન્યુએબલ એનર્જી અને હેલ્થ ઇન્ડસ્ટ્રી ક્ષેત્રના વૈશ્વિક નિષ્ણાતોને આવકારવા માટે ખાસ ફાસ્ટ-ટ્રેક જોગવાઈ રાખવામાં આવી છે.