નવી દિલ્હી: તા.૦૬: સ્વર્ગસ્થ જાણીતા ઉદ્યોગપતિ સંજય કપૂરની સંપત્તિ અને કૌટુંબિક ટ્રસ્ટને લઈને પરિવારમાં ચાલી રહેલા હાઈ-પ્રોફાઈલ વિવાદમાં સુપ્રીમ કોર્ટે એક અત્યંત મહત્વપૂર્ણ નિર્દેશ આપ્યો છે. સર્વોચ્ચ અદાલતે આ પારિવારિક ઝઘડાનો સૌહાર્દપૂર્ણ અને કાયમી ઉકેલ લાવવા માટે ભારતના ભૂતપૂર્વ મુખ્ય ન્યાયાધીશ (CJI) ડી.વાય. ચંદ્રચૂડની મધ્યસ્થી તરીકે નિમણૂક કરી છે. કોર્ટે આ મામલે અત્યાર સુધીની પ્રગતિ પર સંતોષ વ્યક્ત કરતાં આશા વ્યક્ત કરી છે કે બંને પક્ષો ટૂંક સમયમાં જ સમાધાન પર પહોંચી શકે છે.

આ કાનૂની લડાઈ સ્વર્ગસ્થ સંજય કપૂરની ૮૦ વર્ષીય માતા રાની કપૂર અને તેમની પત્ની પ્રિયા કપૂર વચ્ચે સંપત્તિના હકને લઈને ચાલી રહી છે. સુપ્રીમ કોર્ટમાં સુનાવણી દરમિયાન સામે આવ્યું હતું કે પૂર્વ CJI ડી.વાય. ચંદ્રચૂડની આગેવાની હેઠળ અત્યાર સુધી મધ્યસ્થીના છ મહત્વના સત્રો યોજાઈ ચૂક્યા છે, જેમાં પરિવારના તમામ સભ્યો સાથે વિગતવાર વાતચીત કરવામાં આવી છે.

નાણાકીય મુશ્કેલીઓ અને મધ્યસ્થી ફીનો મુદ્દો

સુનાવણી દરમિયાન રાની કપૂર તરફથી હાજર રહેલા વરિષ્ઠ વકીલ સિદ્ધાર્થ દવેએ કોર્ટને જણાવ્યું હતું કે મધ્યસ્થી પ્રક્રિયા યોગ્ય દિશામાં આગળ વધી રહી છે, પરંતુ મધ્યસ્થી ફીને લઈને કેટલીક મુશ્કેલીઓ છે. તેમણે ઉમેર્યું કે ૮૦ વર્ષની વયે પહોંચેલા રાની કપૂર હાલમાં નાણાકીય મુશ્કેલીઓનો સામનો કરી રહ્યા છે. સામે પક્ષે પ્રિયા કપૂરના વકીલ શેરિલ ત્રેહને તાજેતરમાં યોજાયેલા સત્રની માહિતી આપતાં કોર્ટને સકારાત્મક વલણ અંગે વાકેફ કર્યા હતા. મધ્યસ્થી ફીના પ્રશ્ને કોર્ટે સૂચવ્યું હતું કે આ કામચલાઉ ખર્ચ કૌટુંબિક ટ્રસ્ટમાંથી વહાવવામાં આવી શકે છે અને તે અંગે અલગથી વિચારણા કરાશે.

વરિષ્ઠ CA ની મદદ અને વહેલી સુનાવણીની વિનંતી

સર્વોચ્ચ અદાલતે નોંધ્યું કે આ જટિલ નાણાકીય અને ટ્રસ્ટ વિવાદને ઉકેલવા માટે મધ્યસ્થી પૂર્વ CJI એ એક વરિષ્ઠ ચાર્ટર્ડ એકાઉન્ટન્ટ (CA) ની પણ મદદ લીધી છે, જેથી તમામ દાવાઓનું પારદર્શક રીતે મૂલ્યાંકન કરી શકાય. રાની કપૂરના વકીલે તેમની મોટી ઉંમર અને સ્વાસ્થ્યની ચિંતાઓ દર્શાવીને વિનંતી કરી હતી કે આ કેસમાં વધુ વિલંબ ન થાય અને ઝડપથી પરિણામ લાવવામાં આવે, જેના પર કોર્ટે પક્ષકારોને જરૂરી તમામ સહયોગ અને ઝડપી પગલાં લેવાની ખાતરી આપી હતી.

સુપ્રીમ કોર્ટે પરિવારના તમામ સભ્યોને વર્ષો સુધી ચાલતી લાંબી અને ખર્ચાળ કાનૂની લડાઈ ટાળવા વિનંતી કરી છે, જેથી કરીને પરિવારની પ્રતિષ્ઠા અને સંપત્તિ બંનેનું રક્ષણ થઈ શકે.