નવી દિલ્હી : કેન્દ્ર સરકારે સંસદમાં એક અત્યંત મહત્વપૂર્ણ ખુલાસો કરતા જણાવ્યું છે કે જો પેટ્રોલમાં ઇથેનોલ મિશ્રિત કરવાની સ્વદેશી પદ્ધતિ અપનાવવામાં ન આવી હોત, તો દેશમાં ક્રૂડ ઓઇલના વધતા ભાવને કારણે પેટ્રોલની કિંમત પ્રતિ લિટર ₹૧૨૫ સુધી પહોંચી શકી હોત. સરકારના આ સમયસરના પગલા અને સસ્તા ઇથેનોલના ઉપયોગથી સામાન્ય નાગરિકોને મોંઘવારીના મોટા ફટકાથી બચાવી શકાયા છે, જ્યારે દિલ્હીમાં પેટ્રોલના ભાવ આશરે ₹94 ની આસપાસ જળવાઈ રહ્યા છે.

પશ્ચિમ એશિયામાં તણાવના કારણે જ્યારે ક્રૂડ ઓઇલના ભાવ પ્રતિ બેરલ ₹૧૩૫ ના ખતરનાક સ્તરે પહોંચી ગયા હતા, ત્યારે સરકારે મોંઘા વિદેશી તેલ પરની નિર્ભરતા ઘટાડવા માટે ખેડૂતો પાસેથી શેરડી અને મકાઈમાંથી બનેલું ઇથેનોલ ખરીદીને પેટ્રોલમાં ભેળવ્યું હતું. પેટ્રોલિયમ રાજ્યમંત્રી સુરેશ ગોપીએ લોકસભામાં માહિતી આપી હતી કે આ વર્ષે ઇથેનોલની સરેરાશ ખરીદી કિંમત પ્રતિ લિટર ₹૭૧.૫૫ રહી છે. આ સ્વદેશી મિશ્રણને કારણે વિદેશી હૂંડિયામણની મોટી બચત થઈ છે અને સીધા ખેડૂતોના ખિસ્સામાં નાણાં પહોંચ્યા છે.

તેલ કંપનીઓને નુકસાન છતાં જનતાને ફુગાવાથી સુરક્ષિત રાખવાનો પ્રયાસ

સરકારે સંસદમાં એ પણ સ્વીકાર્યું છે કે આંતરરાષ્ટ્રીય બજારની સરખામણીમાં પેટ્રોલના ભાવ ન વધારવાને કારણે માર્ચ અને જૂન ૨૦૨૬ વચ્ચે સરકારી તેલ કંપનીઓને પ્રતિ લિટર ₹૧૧ સુધીનું નુકસાન સહન કરવું પડ્યું છે, જેનો કુલ આંકડો આશરે ₹૨૧,૩၀၀ કરોડ જેટલો થાય છે. આમ, જનતાને ફુગાવાથી બચાવવા માટે આખું આર્થિક ભારણ કંપનીઓએ ઉઠાવ્યું છે. આ યોજનાથી માત્ર વિદેશી તેલ પરની નિર્ભરતા ઘટી નથી પરંતુ વાહનોમાંથી થતા કાર્બન ઉત્સર્જનમાં પણ મોટો ઘટાડો નોંધાયો છે.