મુંબઈના બોરીવલી પશ્ચિમમાં જન્મદિવસની પાર્ટી દરમિયાન જાહેર રસ્તા પર હોબાળો મચાવવા, ટ્રાફિક જામ કરવા અને એરગનથી ફાયરિંગ કરવાનો મામલો સામે આવ્યો છે. પોલીસે મુખ્ય આરોપી સહિત 10 લોકોની અટકાયત કરી છે અને તેમની સામે વિવિધ કલમો હેઠળ ગુનો નોંધવાની પ્રક્રિયા શરૂ કરી દીધી છે.

ઘટના 5 ઓગસ્ટની રાત્રે અંદાજે 12:30 વાગ્યે બોરીવલી પશ્ચિમના ગોરાઈ-2 સ્થિત ઘરકુલ કો-ઓપરેટિવ હાઉસિંગ સોસાયટી, સુવિધા સ્કૂલ પાસે બની હતી. પોલીસના જણાવ્યા અનુસાર, 26 વર્ષીય આકાશ રામકૃપાલ ગુપ્તાએ પોતાના જન્મદિવસ નિમિત્તે મિત્રોને બોલાવીને જાહેર રસ્તા પર ગેરકાયદેસર રીતે ભીડ એકત્ર કરી હતી. આક્ષેપ છે કે તમામ લોકોએ ભારે મોટેથી શોરબકોર મચાવ્યો હતો અને પોલીસના પ્રતિબંધાત્મક આદેશોનું ઉલ્લંઘન કર્યું હતું.

પોલીસના જણાવ્યા મુજબ, આરોપીઓએ એક ઈનોવા કાર રસ્તાની વચ્ચે ઊભી રાખી દીધી હતી અને તેના જ બોનેટ પર જન્મદિવસનું કેક કાપ્યું હતું, જેના કારણે ટ્રાફિક જામ થયો હતો. આ દરમિયાન જતિન નવીન શર્મા પોતાની બેબી એરગન લઈને આવ્યો હતો, જેમાં સાઉન્ડ બીબી અને છર્યાનો ઉપયોગ કરવામાં આવ્યો હતો. આક્ષેપ છે કે વિજેશ ઉપાધ્યાયે એરગનથી ફાયરિંગ કરીને વિસ્તારમાં દહેશત ફેલાવવાનો અને જાહેર શાંતિ ડહોળવાનો પ્રયાસ કર્યો હતો.

બોરીવલી પોલીસે આકાશ ગુપ્તા સહિત કુલ 10 આરોપીઓની અટકાયત કરી છે. તેમની સામે ભારતીય ન્યાય સંહિતા (BNS)ની કલમ 125, 126, 189(2), 285, મોટર વાહન અધિનિયમની કલમ 122, 177, 201, મહારાષ્ટ્ર પોલીસ અધિનિયમની કલમ 37(1)(E), 135 તથા ફોજદારી કાનૂન સંશોધન અધિનિયમની કલમ 7 હેઠળ ગુનો નોંધવાની કાર્યવાહી ચાલુ છે.

આ મામલાની તપાસ પોલીસ ઉપાયુક્ત સંદીપ ઘુગે, સહાયક પોલીસ આયુક્ત સંતોષ ધનવટે અને વરિષ્ઠ પોલીસ નિરીક્ષક પુષ્પલતા મંડલેના માર્ગદર્શન હેઠળ બોરીવલી પોલીસની ક્રાઈમ ડિટેક્શન ટીમ કરી રહી છે.

અડધી રાત્રે રસ્તા પર જન્મદિવસની ઉજવણી, ટ્રાફિક જામ અને એરગનથી ફાયરિંગ... બોરીવલીની આ ઘટનાએ જાહેર સુરક્ષા સામે અનેક સવાલો ખડા કરી દીધા છે. પોલીસે સમગ્ર મામલાની તપાસ હાથ ધરી છે.