નવી દિલ્હી: તા.07: સંસદના વર્તમાન સત્રમાં વિપક્ષી દળોના સતત હંગામા અને વિરોધ પ્રદર્શન વચ્ચે વડાપ્રધાન નરેન્દ્ર મોદીએ એક મહત્વપૂર્ણ રાજકીય પગલું ભર્યું છે. પીએમ મોદીએ નવા ચૂંટાયેલા એનડીએ (NDA) સાંસદો તેમજ ટીએમસી (TMC) અને ઉદ્ધવ ઠાકરે જૂથના બળવાખોર સાંસદો સાથે ચા-નાસ્તા પર એક ખાસ બેઠક યોજી હતી. સંસદીય પરિસરમાં યોજાયેલી આ બેઠક દરમિયાન વડાપ્રધાને તમામ સાંસદોને હિંમત આપતા કહ્યું હતું કે, "બિલકુલ ચિંતા કરવાની જરૂર નથી, હું તમારી સાથે ઊભો છું." તેમણે નવા સાંસદોને ગૃહના વિરોધ પ્રદર્શનથી અસ્વસ્થ થયા વિના સંસદીય ચર્ચાઓમાં ઉત્સાહપૂર્વક ભાગ લેવા માટે ખાસ પ્રોત્સાહિત કર્યા હતા.

સૂત્રોના જણાવ્યા અનુસાર, વડાપ્રધાન મોદીએ બેઠક દરમિયાન સંસદને લોકશાહીનું સર્વોચ્ચ મંદિર ગણાવ્યું હતું અને વિપક્ષ દ્વારા કરવામાં આવતા સતત વિઘ્નો પર ઊંડી ચિંતા વ્યક્ત કરી હતી. પીએમ મોદીએ ભારપૂર્વક જણાવ્યું હતું કે, ગૃહમાં થતા સતત હોબાળા અને વિક્ષેપના કારણે સૌથી વધુ નુકસાન પ્રથમ વખત ચૂંટાઈને આવેલા નવા સાંસદોને થઈ રહ્યું છે. તેઓ પોતાના વિસ્તારના અને જનહિતના મહત્વના મુદ્દાઓ ગૃહ સમક્ષ રજૂ કરવાના પોતાના અધિકાર અને તકથી વંચિત રહી જાય છે, જે તેમની સાથે અન્યાય સમાન છે.

પીએમ મોદીએ બેઠકમાં ઉપસ્થિત તમામ સાંસદોને અપીલ કરી હતી કે લોકશાહીની ગરિમા જાળવી રાખવા માટે સંસદીય કામકાજ સરળતાથી ચાલે તે અત્યંત જરૂરી છે. વિપક્ષી ખેમાના બળવાખોર સાંસદોની હાજરીથી રાજકીય ગરમાવો વધી ગયો છે, જ્યારે પીએમ મોદીના આ આશ્વાસન અને માર્ગદર્શનથી એનડીએના નવા સાંસદોમાં ભારે ઉત્સાહ જોવા મળ્યો હતો. વડાપ્રધાને સાંસદોને સંસદના નિયમો અને પ્રક્રિયાઓનો ઊંડો અભ્યાસ કરીને ગૃહની ચર્ચાઓમાં સકારાત્મક યોગદાન આપવાની સલાહ પણ આપી હતી.