ચરખી દાદરી: તા.૦૭: હરિયાણાના ચરખી દાદરીમાં શુક્રવારે બપોરે કાયદો અને વ્યવસ્થાના લીરેલીરા ઉડાવતી એક ભયાનક ઘટના સામે આવી છે. કોર્ટમાં કેસની સુનાવણીમાં હાજરી આપવા જઈ રહેલા ગુનાહિત પૃષ્ઠભૂમિ ધરાવતા પુરુષોની સ્કોર્પિયો એસયુવી (SUV) કાર પર અજાણ્યા સશસ્ત્ર હુમલાખોરોએ દિન-દહાડે અંધાધૂંધ ગોળીબાર કર્યો હતો. સદર દાદરી પોલીસ સ્ટેશન નજીક બનેલી આ સનસનાટીભરી ઘટનામાં સાત લોકો ગંભીર રીતે ઘાયલ થયા છે.

પોલીસ તરફથી મળતી માહિતી મુજબ, બપોરે આશરે ૧૨ વાગ્યાના સુમારે પગપાળા આવેલા ત્રણ હુમલાખોરોએ કારને નિશાન બનાવીને તાબડતોબ ૧૦ થી ૧૫ રાઉન્ડ ગોળીબાર કર્યો હતો. આ હુમલામાં અમિત, અંકિત, સૂરજ, વિજય અને કીર્તિમાન સહિત સાત લોકો લોહીલુહાણ થયા હતા. ઘટના બાદ તમામ ઘાયલોને તુરંત સ્થાનિક હોસ્પિટલમાં ખસેડવામાં આવ્યા હતા, જ્યાંથી બે લોકોની હાલત અત્યંત નાજુક હોવાથી તેમને વધુ સારવાર અર્થે પીજીઆઈએમએસ (PGIMS) રોહતક રિફર કરવામાં આવ્યા છે.

આ સનસનાટીભર્યા હુમલા બાદ સોશિયલ મીડિયા પર એક કથિત ઓડિયો ક્લિપ વાયરલ થઈ છે, જેમાં ગેંગસ્ટર નવીન બોક્સરે કુખ્યાત રોહિત ગોદારા ગેંગ વતી આ ગોળીબારની જવાબદારી સ્વીકારી છે. વાયરલ ઓડિયોમાં દાવો કરવામાં આવ્યો છે કે તેમનો મુખ્ય ટાર્ગેટ અનિલ ફતેહગઢી હતો. બીજી તરફ, ઘટના સ્થળના સીસીટીવી (CCTV) ફૂટેજ પણ સામે આવ્યા છે, જેમાં હથિયારો સાથે હુમલાખોરો ભાગતા નજરે પડે છે.

ચરખી દાદરીના નાયબ પોલીસ અધિક્ષક (મુખ્ય મથક) ધીરજ કુમારે જણાવ્યું હતું કે, હુમલાખોરોને પકડવા માટે CIA યુનિટ, સાયબર ટીમ અને સ્થાનિક પોલીસની અલગ-અલગ ટીમ બનાવીને તપાસ હાથ ધરવામાં આવી છે. વાહનમાં સવાર લોકોનો અગાઉનો ગુનાહિત રેકોર્ડ રહ્યો છે, પરંતુ આ હુમલો અંગત દુશ્મનાવટનો છે કે ગેંગવોરનો, તેની તપાસ ચાલુ છે. દિવસના અજવાળામાં કોર્ટ સંકુલ નજીક થયેલા આ હુમલાએ હરિયાણામાં કાયદો અને વ્યવસ્થાની સ્થિતિ સામે ફરી એકવાર ગંભીર પ્રશ્નાર્થ ચિહ્ન ઊભું કર્યું છે.