નવી દિલ્હી: તા.૦૭: દિલ્હી હાઈકોર્ટે શુક્રવારે રાજધાનીમાં વિરોધ પ્રદર્શન માટે નિયુક્ત જંતર-મંતર સ્થળને કાયમ માટે બંધ કરવા અંગે કેન્દ્ર સરકારને તીખા સવાલો કર્યા છે. જસ્ટિસ અમિત મહાજને સુનાવણી દરમિયાન મહત્વપૂર્ણ અવલોકન કરતા જણાવ્યું હતું કે, કોઈ પણ પ્રદર્શન કે વિરોધના નામે સમગ્ર શહેરને બિનજરૂરી રીતે બંધક બનાવી શકાય નહીં અને સામાન્ય નાગરિકો તેમજ એમ્બ્યુલન્સ જેવી આવશ્યક સેવાઓને અસુવિધા ન થવી જોઈએ.

આ બાબત ત્યારે સામે આવી જ્યારે ઓલ ઈન્ડિયા દલિત ખ્રિસ્તી અધિકાર સંરક્ષણ સમિતિ દ્વારા દિલ્હી પોલીસ પાસે જંતર-મંતર પર શાંતિપૂર્ણ વિરોધ પ્રદર્શનની પરવાનગી માંગતી પેન્ડિંગ અરજી પર નિર્ણય લેવડાવવા હાઈકોર્ટના દ્વાર ખટખટાવવામાં આવ્યા હતા. અરજદારના વરિષ્ઠ વકીલ સંજય ઘોષે રજૂઆત કરી હતી કે માત્ર ૭૫ લોકોના શાંતિપૂર્ણ વિરોધ માટે જુલાઈ મહિનાથી આપેલી અરજી પર દિલ્હી પોલીસે કોઈ નિર્ણય લીધો નથી. જેના જવાબમાં જસ્ટિસ મહાજને એડિશનલ સોલિસિટર જનરલ (ASG) ચેતન શર્માને પૂછ્યું કે સરકાર આ વિસ્તારને વિરોધ સ્થળ તરીકે બંધ કેમ નથી કરતી?

કેન્દ્ર સરકાર તરફથી હાજર રહેલા એએસજી ચેતન શર્માએ સુપ્રીમ કોર્ટના અગાઉના ચુકાદાઓ અને ૧૫મી ઓગસ્ટ નજીક હોવાથી વિસ્તારમાં લાગુ કલમ ૧૪૪ (CrPC) તથા સુરક્ષા ચિંતાઓનો હવાલો આપ્યો હતો. તેમણે ઉમેર્યું હતું કે જ્યારે ૭૫ લોકોનો વિરોધ અચાનક ૭૫,૦૦૦ લોકોમાં ફેરવાઈ જાય છે ત્યારે કાયદો અને વ્યવસ્થા જાળવવી મુશ્કેલ બની જાય છે. વકીલો વચ્ચેની આ બહેસ દરમિયાન બંધારણીય અધિકારો અને જાહેર જનતાની સુવિધા વચ્ચેના તણાવનો મુદ્દો મુખ્ય કેન્દ્ર સ્થાને રહ્યો હતો.

દિલ્હી હાઈકોર્ટે આખરે જંતર-મંતરને ધર્ણા સ્થળ તરીકે ચાલુ રાખવું કે નહીં તે મોટા પ્રશ્ન પર કોઈ આખરી ચુકાદો આપ્યા વિના, દિલ્હી પોલીસને સ્પષ્ટ આદેશ આપ્યો છે કે અરજદાર સંસ્થાની પેન્ડિંગ વિનંતી પર ૮ ઓગસ્ટ સુધીમાં ગમે તે નિર્ણય લેવામાં આવે. આ સ્પષ્ટ નિર્દેશ સાથે કોર્ટે અરજીનો નિકાલ કર્યો હતો.