ચેન્નાઈ : કાવેરી નદીના પાણીની વહેંચણી અને પ્રસ્તાવિત મેકેદાતુ ડેમને લઈને કર્ણાટક સાથે ચાલી રહેલા વિવાદ વચ્ચે તમિલનાડુના મુખ્યમંત્રી સી. જોસેફ વિજયે વિધાનસભામાં અત્યંત મહત્ત્વપૂર્ણ નિવેદન આપ્યું છે. કર્ણાટક સરકાર સાથે સીધી વાતચીત કરવાના પોતાના પ્રસ્તાવનો સખત બચાવ કરતા વિજયે રાજદ્વારી દલીલ આપી હતી કે જ્યારે પરસ્પર કટ્ટર દુશ્મન ગણાતા દેશો પણ જટિલ મુદ્દાઓ ઉકેલવા ટેબલ પર બેસી શકે છે, તો પછી બે પાડોશી રાજ્યો વચ્ચે ચર્ચા કરવામાં કંઈ જ ખોટું નથી.

વિધાનસભામાં બોલતા મુખ્યમંત્રીએ સ્પષ્ટ કર્યું કે બેંગલુરુ જઈને કર્ણાટક સરકાર સાથે વાટાઘાટો કરવાનો વિચાર સંપૂર્ણપણે તેમનો પોતાનો હતો અને તે રાજ્યના ભલા માટે લેવાયેલો એક નિષ્ઠાવાન પ્રયાસ હતો. તેમણે કહ્યું કે, "આ પ્રસ્તાવ સામે અનેક રાજકીય ટીકાઓ થઈ હતી, પરંતુ મેં તેને સમસ્યાના ઉકેલ તરફના એક સકારાત્મક પગલા તરીકે જોયું હતું. જો તમિલનાડુના લોકોના હિત અને કાવેરીના રક્ષણ માટે મારે કોઈ અપમાનનો સામનો કરવો પડે તો પણ હું તેના માટે તૈયાર હતો." તેમણે ઉમેર્યું કે કાવેરી નદી તમિલનાડુની જીવનરેખા છે અને આ સંવેદનશીલ મુદ્દાનું રાજકીયકરણ કરવાનો તેમનો કોઈ જ ઈરાદો નથી.

જોકે, વાતચીતના સમર્થનની સાથે મુખ્યમંત્રી વિજયે આકરી સ્પષ્ટતા પણ કરી હતી કે તેમની સરકાર તમિલનાડુના કાયદાકીય અને ભૌગોલિક અધિકારો સાથે ક્યારેય કોઈ સસ્તી રાજનીતિ કે સમાધાન કરશે નહીં. તેમણે પ્રધાનમંત્રી નરેન્દ્ર મોદીને પત્ર લખીને કર્ણાટકના મેકેદાતુ સંતુલિત જળાશય પ્રોજેક્ટનો વિરોધ નોંધાવ્યો છે અને કાવેરી ટ્રિબ્યુનલ તથા સુપ્રીમ કોર્ટના ચુકાદાઓનો હવાલો આપીને કેન્દ્ર સરકારને આ બંધ માટે કોઈ પણ વહીવટી મંજૂરી ન આપવા અપીલ કરી છે.