નવી દિલ્હી : ભારતના નાણાકીય અને ફિનટેક ક્ષેત્રમાં આર્ટિફિશિયલ ઇન્ટેલિજન્સ (AI) ના ઝડપથી વધી રહેલા ઉપયોગ વચ્ચે દેશના મુખ્ય આર્થિક સલાહકાર (CEA) વી. અનંત નાગેશ્વરને એક અત્યંત મહત્વપૂર્ણ ચેતવણી આપી છે. શુક્રવારે 'ASSOCHAM ઇન્ડિયા ઇન્ટરનેશનલ ફિનટેક ફેસ્ટિવલ' ને સંબોધતા તેમણે ભારપૂર્વક જણાવ્યું હતું કે, ભારતે નાણાકીય ક્ષેત્રમાં AI ના ઉપયોગથી ઉદ્ભવતા જોખમો સામે અગાઉથી જ સક્રિય થઈને સલામતી અને સુરક્ષાના કડક પગલાં લેવા પડશે. કોઈપણ મોટી નાણાકીય કટોકટી સર્જાય ત્યાં સુધી રાહ જોવાના બદલે અત્યારથી જ જવાબદાર AI માળખું તૈયાર કરવું અનિવાર્ય છે.

નાગેશ્વરને સ્વીકાર્યું હતું કે AI ટેકનોલોજી ફિનટેક ઉદ્યોગને રૂપાંતરિત કરવાની મોટી ક્ષમતા ધરાવે છે. તે ધિરાણ લેનારની ક્ષમતાનું વધુ સચોટ વિશ્લેષણ કરવામાં, જોખમોને વહેલા ઓળખવામાં અને નાણાકીય તણાવના સંકેતો અગાઉથી શોધવામાં બેંકો તથા ફિનટેક કંપનીઓને મદદરૂપ થઈ શકે છે. જોકે, તેમણે સ્પષ્ટ કર્યું કે આર્થિક લાભ મેળવવાની ઉતાવળમાં ગ્રાહકોના સંવેદનશીલ ડેટા અને નાણાકીય સુરક્ષા સાથે કોઈપણ પ્રકારની બાંધછોડ કરી શકાય નહીં.

હાલમાં AI ની આસપાસ વધી રહેલા બજારના ઉત્સાહ અને પ્રચાર (Hype) અંગે ચેતવણી આપતા CEA એ ઉમેર્યું હતું કે, "જ્યારે AI ને લગતો વર્તમાન નાણાકીય બજારનો પરપોટો (Bubble) શાંત થશે, ત્યારે જ આપણે આ નવી ટેકનોલોજીનું વાસ્તવિક ખર્ચ-લાભ વિશ્લેષણ કરી શકીશું." તેમણે નાણાકીય સંસ્થાઓને AI ના અતિશય હાઇપથી દૂર રહીને તકો અને પડકારો બંનેનું સંતુલિત રીતે મૂલ્યાંકન કરવાની સલાહ આપી છે.