નવી દિલ્હી :કેન્દ્ર સરકારના લાખો કર્મચારીઓ અને પેન્શનર્સ માટે એક મહત્વપૂર્ણ અપડેટ સામે આવ્યું છે. 8મા પગાર પંચે દિલ્હીમાં વિવિધ કર્મચારી સંગઠનો અને પેન્શનર્સના પ્રતિનિધિઓ સાથે મહત્વપૂર્ણ બેઠકોનો સિલસિલો શરૂ કર્યો છે. 7 ઓગસ્ટથી 10 ઓગસ્ટ સુધી યોજાનારી આ બેઠકોમાં કર્મચારીઓના પગાર, પેન્શન અને અન્ય લાભો અંગે સીધા સૂચનો મેળવવામાં આવી રહ્યા છે.

આ 4 દિવસીય બેઠકો દરમિયાન વિવિધ કર્મચારી મંડળો અને પેન્શનર્સ એસોસિએશન પોતાની વિવિધ માંગણીઓ અને સૂચનો પગાર પંચ સમક્ષ રજૂ કરશે. વિવિધ ભાગીદારોના મંતવ્યો સાંભળ્યા બાદ પગાર પંચ પોતાની ભલામણોનો અંતિમ ડ્રાફ્ટ તૈયાર કરવાની પ્રક્રિયા આગળ ધપાવશે.

સરકારી કર્મચારીઓ માટે ફિટમેન્ટ ફેક્ટર સૌથી મહત્વનો વિષય છે, કારણ કે તેના આધારે જ નવા બેઝિક પગારની ગણતરી કરવામાં આવે છે. જોકે, અત્યાર સુધી સરકારે કે પંચે કોઈપણ ચોક્કસ ફિટમેન્ટ ફેક્ટરને સત્તાવાર મંજૂરી આપી નથી.

આ બેઠકોમાં પેન્શનર્સ સંગઠનો પણ સક્રિય રીતે ભાગ લઈ રહ્યા છે. તેઓ પેન્શન વધારા સાથે નિવૃત્ત કર્મચારીઓને મળતા અન્ય નાણાકીય લાભો અંગે પંચ સમક્ષ રજૂઆત કરી રહ્યા છે.

 દિલ્હી ખાતે શરૂ થયેલી આ બેઠકો માત્ર કર્મચારીઓ અને પેન્શનર્સ પાસેથી મંતવ્યો અને સૂચનો મેળવવાની પ્રાથમિક પ્રક્રિયાનો એક ભાગ છે. આ તબક્કે નવા પગાર માળખા કે ફિટમેન્ટ ફેક્ટર અંગે કોઈ આખરી જાહેરાત કરવામાં આવી નથી. પંચ તમામ સૂચનોની ચકાસણી કર્યા બાદ પોતાનો અહેવાલ તૈયાર કરશે અને તે કેન્દ્ર સરકારને સોંપશે. ત્યારબાદ જ કેબિનેટ મંજૂરી મેળવીને આખરી નિર્ણય અમલમાં આવશે.

નાણા મંત્રાલયની અગાઉની સ્પષ્ટતા મુજબ, 8મા પગાર પંચને પોતાનું કામ પૂર્ણ કરી રિપોર્ટ તૈયાર કરવા માટે આશરે 18 મહિનાનો સમય આપવામાં આવ્યો છે. નિયત સમયમર્યાદા અનુસાર, પંચ પોતાનો સત્તાવાર રિપોર્ટ મે 2027ની આસપાસ કેન્દ્ર સરકાર સમક્ષ રજૂ કરે તેવી શક્યતા છે. રિપોર્ટ સોંપાયા બાદ કેન્દ્ર સરકાર તેની ભલામણોની સમીક્ષા કરીને અંતિમ મંજૂરી આપશે.