નવી દિલ્હી :  દિલ્હીમાં ઉચ્ચ શિક્ષણ મેળવવાનું સ્વપ્ન સેવતા સ્થાનિક વિદ્યાર્થીઓ માટે કેબિનેટે એક અત્યંત મહત્વપૂર્ણ અને રાહતરૂપ નિર્ણય લીધો છે. દિલ્હી કેબિનેટે બહુપ્રતિક્ષિત 'દિલ્હી પ્રાઇવેટ યુનિવર્સિટી બિલ'ના ડ્રાફ્ટને સત્તાવાર મંજૂરી આપી દીધી છે. અત્યાર સુધી પાટનગરમાં ખાનગી યુનિવર્સિટીઓ સ્થાપવા માટે કોઈ સ્પષ્ટ કાનૂની માળખું ન હોવાને કારણે ઉચ્ચ શિક્ષણ માટે હજારો વિદ્યાર્થીઓને નોઈડા, ગુરુગ્રામ કે અન્ય રાજ્યો તરફ વળવું પડતું હતું. પરંતુ હવે આ ક્રાંતિકારી બિલ દ્વારા દિલ્હીમાં જ આંતરરાષ્ટ્રીય સ્તરની ખાનગી યુનિવર્સિટીઓ સ્થાપવાનો માર્ગ મોકળો થઈ ગયો છે, જેનાથી સ્થાનિક યુવાનોને ઘર આંગણે જ ઉત્કૃષ્ટ શિક્ષણ ક્ષેત્રે કારકિર્દી બનાવવાની અદ્ભુત તક મળશે.

આ નવા બિલની સૌથી મોટી અને આકર્ષક વિશેષતા દિલ્હીના સ્થાનિક વિદ્યાર્થીઓ માટે રાખવામાં આવેલું 25% અનામત  છે. નવી ખુલનારી દરેક ખાનગી યુનિવર્સિટીમાં દરેક કોર્સની 25 ટકા બેઠકો દિલ્હીના તેજસ્વી વિદ્યાર્થીઓ માટે અનામત રહેશે, જે દિલ્હી સરકાર (GNCTD)ની પ્રવર્તમાન અનામત નીતિ મુજબ ફાળવવામાં આવશે. આ ઉપરાંત, યુનિવર્સિટી શરૂ કરવા માટે મિનિમમ જમીનની ક્ષેત્રફળ કલમ  પણ નાબૂદ કરવામાં આવી છે, જેથી આધુનિક વર્ટિકલ કેમ્પસ પણ બનાવી શકાય. જોકે, વિદ્યાર્થીઓના હિત સાથે કોઈ સમાધાન ન થાય તે માટે પ્રાયોજક સંસ્થા પાસે ઓછામાં ઓછી 30 વર્ષની લીઝ અથવા જમીનની માલિકી હોવી ફરજિયાત બનાવાઈ છે.

સરકારે ખાનગી શિક્ષણ ધામોને સંચાલનની સ્વતંત્રતા આપી છે, પણ સાથે જ મનસ્વીતા કે નકલી સંસ્થાઓને રોકવા કડક નિયંત્રણો પણ લાદ્યા છે. દિલ્હીના ઉચ્ચ શિક્ષણ મંત્રી આ તમામ યુનિવર્સિટીઓના "વિઝિટર" તરીકે કામ કરશે, જેમને કેમ્પસનું નિરીક્ષણ કરવા, ગેરરીતિની તપાસ કરાવવા અને કડક સૂચનાઓ આપવાનો સંપૂર્ણ અધિકાર રહેશે. આ બધી જ યુનિવર્સિટીઓ માત્ર "યુનિટરી મોડેલ" પર ચાલશે, એટલે કે તેઓ અન્ય કોલેજોને એફિલિએશન આપી શકશે નહીં અને તેમણે UGC, AICTE તથા BCI જેવા કેન્દ્રીય સંસ્થાઓના નિયમોનું અક્ષરશઃ પાલન કરવું પડશે. આ ઐતિહાસિક પગલાથી દિલ્હી હવે દેશનું એક મોટું અને સુસજ્જ એજ્યુકેશન હબ બનવા તરફ અગ્રેસર થયું છે.