વોશિંગ્ટન : અમેરિકાની ફેડરલ અપીલ કોર્ટે રાષ્ટ્રપતિ ડોનાલ્ડ ટ્રમ્પના વહીવટીતંત્રને એક મોટો આંચકો આપતાં વ્હાઇટ હાઉસ પરિસરમાં બનનારા ૪૦૦ મિલિયન ડોલર (આશરે ૩,૩૦૦ કરોડ રૂપિયા) ના ભવ્ય બોલરૂમના જમીન પરના બાંધકામ પર રોક લગાવી દીધી છે. વોશિંગ્ટન ડીસી સર્કિટ અપીલ કોર્ટે ૨-૧ થી મહત્વપૂર્ણ ચુકાદો આપતાં સ્પષ્ટ કર્યું છે કે દેશની સંસદ એટલે કે કોંગ્રેસની પૂર્વ મંજૂરી વિના રાષ્ટ્રપતિ દેશની સૌથી ઐતિહાસિક સરકારી ઇમારતમાં કોઈ મોટો ફેરફાર કરી શકે નહીં.

ચુકાદા દરમિયાન અપીલ કોર્ટે એક અત્યંત સખત ટિપ્પણી કરતા જણાવ્યું હતું કે, "દરેક રાષ્ટ્રપતિ વ્હાઇટ હાઉસના કામચલાઉ ભાડૂઆત હોય છે, તેના માલિક નથી." 'નેશનલ ટ્રસ્ટ ફોર હિસ્ટોરિક પ્રિઝર્વેશન' દ્વારા દાખલ કરાયેલા દાવોના આધારે કોર્ટે આ સ્ટે ઓર્ડર જારી કર્યો હતો. સંસ્થાનો આરોપ હતો કે વહીવટીતંત્રે કોંગ્રેસની મંજૂરી લીધા વિના જ વ્હાઇટ હાઉસના ઐતિહાસિક 'ઈસ્ટ વિંગ'ને તોડી પાડીને ત્યાં ૯૦,૦૦૦ ચોરસ ફૂટનો વિશાળ બોલરૂમ બનાવવાનું કામ શરૂ કરી દીધું હતું.

બીજી તરફ, રાષ્ટ્રપતિ ડોનાલ્ડ ટ્રમ્પે આ કોર્ટ ઓર્ડર સામે આકરો પ્રહાર કર્યો છે. તેમણે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર આ નિર્ણયને "ભયાનક" અને રાજકીય રીતે પ્રેરિત ગણાવ્યો હતો. ટ્રમ્પે દલીલ કરી હતી કે આ બોલરૂમ માત્ર એક મનોરંજનનું સ્થળ નથી પરંતુ તેમાં હાઈ-ટેક બોમ્બ શેલ્ટર, આધુનિક તબીબી સુવિધાઓ અને ડ્રોન તથા મિસાઈલ હુમલાથી રક્ષણ આપતી સુરક્ષા પ્રણાલીઓ સામેલ છે. તેમણે સ્પષ્ટ કર્યું છે કે તેમનું વહીવટીતંત્ર આ નિર્ણય વિરુદ્ધ યુએસ સુપ્રીમ કોર્ટમાં અપીલ કરશે.

અપીલ કોર્ટે ટ્રમ્પ સરકારને સુપ્રીમ કોર્ટમાં અપીલ કરવા માટે ૧૪ દિવસનો સમય આપ્યો છે. કોર્ટે એ પણ સ્પષ્ટ કર્યું છે કે આ સ્ટે કાયમી નથી, પરંતુ જ્યાં સુધી મુકદ્દમાનો આખરી નિર્ણય ન આવે અને વહીવટીતંત્ર કોંગ્રેસ પાસેથી વિધિવત મંજૂરી ન મેળવે ત્યાં સુધી જમીન પરનું બાંધકામ અટકેલું રહેશે. હાલમાં જમીનની નીચે ચાલી રહેલા સુવિધાયુક્ત કામોને ચાલુ રાખવાની છૂટ અપાઈ છે. આ કાનૂની લડાઈ હવે અમેરિકી રાષ્ટ્રપતિની બંધારણીય સત્તાઓ અને સંસદના અધિકારો વચ્ચેનો મોટો જંગ બની ગઈ છે.