ચંદીગઢ : પંજાબના રાજકારણમાં આગામી ૨૦૨૭ ની વિધાનસભા ચૂંટણી પહેલા બહુ મોટા રાજકીય ફેરફારોના સંકેતો મળી રહ્યા છે. શિરોમણી અકાલી દળ (SAD) ના પ્રમુખ સુખબીર સિંહ બાદલે વડાપ્રધાન નરેન્દ્ર મોદી સાથે સંસદમાં યોજાયેલી મહત્વપૂર્ણ મુલાકાતના બીજા જ દિવસે પાર્ટીના વરિષ્ઠ નેતૃત્વ સાથે ઉચ્ચ સ્તરીય બેઠક યોજી હતી. આ બેઠક બાદ અકાલી દળે મહિલા અનામત બિલના તાત્કાલિક અમલીકરણ અને દેશમાં પ્રસ્તાવિત સીમાંકન કવાયતને પોતાનું પૂર્ણ સમર્થન જાહેર કર્યું છે, જેનાથી ભાજપ અને અકાલી દળ વચ્ચે ફરી એકવાર ગઠબંધન થવાની અટકળોએ ભારે જોર પકડ્યું છે.

ચંદીગઢ ખાતે પાર્ટી હેડક્વાર્ટર પર યોજાયેલી આ મહત્વની બેઠકમાં સંસદ સમક્ષ ઉપસ્થિત વિવિધ કાયદાકીય મુદ્દાઓ પર વિગતવાર ચર્ચા કરવામાં આવી હતી. બેઠક બાદ સોશિયલ મીડિયા પર માહિતી આપતાં સુખબીર સિંહ બાદલે જણાવ્યું હતું કે, શિરોમણી અકાલી દળ દેશમાં મહિલા અનામત બિલને વિલંબ વિના તાત્કાલિક લાગુ કરવાની માંગ કરે છે. આ સાથે જ પાર્ટીએ સીમાંકન પ્રક્રિયા દરમિયાન તમામ રાજ્યોના હિતોનું રક્ષણ થાય અને દરેક રાજ્યને સમાન પ્રતિનિધિત્વ મળે તે માટે કેન્દ્ર સરકારના તમામ રાજ્યોમાં ૫૦% બેઠકોના સમાન વધારાના પ્રસ્તાવને સમર્થન આપ્યું છે, જેથી કોઈ પણ રાજ્ય આ કવાયતથી વંચિત ન રહી જાય.

ઉલ્લેખનીય છે કે, ૨૦૨૦ માં કૃષિ કાયદાઓના મુદ્દે શિરોમણી અકાલી દળે ભાજપ સાથેનો પોતાનો ૨૪ વર્ષ જૂનો ઐતિહાસિક સંબંધ તોડી નાખ્યો હતો. જોકે, તાજેતરમાં સંસદમાં પીએમ મોદી અને સુખબીર સિંહ બાદલ વચ્ચે થયેલી મુલાકાત અને ત્યારબાદ રાષ્ટ્રીય મુદ્દાઓ પર કેન્દ્ર સરકારના વલણને અકાલી દળ દ્વારા મળેલા સમર્થનને રાજકીય વિશ્લેષકો એક સકારાત્મક વળાંક તરીકે જોઈ રહ્યા છે. પંજાબમાં અકાલી-ભાજપનું જૂનું ગઠબંધન પુનર્જીવિત થશે કે કેમ, તે આગામી દિવસોમાં સ્પષ્ટ થશે.