મુંબઈ:  આજના ભાગદોડભર્યા કોર્પોરેટ યુગમાં જ્યાં માનસિક તણાવ અને બર્નઆઉટ સામાન્ય બાબત બની ગયા છે, ત્યાં જાણીતા ભારતીય ઉદ્યોગપતિ હર્ષ ગોએન્કાએ સોશિયલ મીડિયા પ્લેટફોર્મ 'X' પર એક અત્યંત રોચક ચર્ચા છેડી છે. ચીનની અગ્રણી રિટેલ કંપની 'પેંગ ડોંગ લાઈ' ની અનોખી 'અનહેપી લીવ' નીતિનો ઉલ્લેખ કરતા ગોએન્કાએ પ્રશ્ન કર્યો હતો કે, શું ભારત જેવા દેશમાં પણ આવી નીતિ અમલમાં મૂકવી જોઈએ? ચીની કંપની પોતાના કર્મચારીઓને માનસિક રીતે અસ્વસ્થ કે નાખુશ હોવાના સંજોગોમાં કોઈ પણ ખુલાસો આપ્યા વિના વર્ષમાં ૧૦ દિવસની વધારાની પેઇડ રજા આપે છે, જેને રદ કરવાનો મેનેજરોને પણ કોઈ અધિકાર નથી.

આ નીતિની શરૂઆત કરનાર પેંગ ડોંગ લાઈના સ્થાપક યુ ડોંગલાઈનું માનવું છે કે દરેક મનુષ્યના જીવનમાં ઉદાસી કે નાખુશીના દિવસો આવતા હોય છે, અને તેવા સમયે કામ પર દબાણ કરવાને બદલે વ્યક્તિને પોતાની જાત માટે સમય આપવો જરૂરી છે. હર્ષ ગોએન્કાની પોસ્ટ બાદ ભારતીય કોર્પોરેટ જગતમાં આ વિષયે ભારે જોર પકડ્યું છે. સોશિયલ મીડિયા પર લોકો આ મુદ્દે બે ભાગમાં વહેંચાઈ ગયા છે. કેટલાક લોકોનું માનવું છે કે વિરામ લેવાથી કાર્યક્ષમતા વધે છે, જ્યારે અન્ય લોકોનું કહેવું છે કે માત્ર ૧૦ દિવસની રજાઓ આપવાથી કામના કલાકો અને ઝેરી કાર્યસંસ્કૃતિ  જેવી મૂળભૂત સમસ્યાઓ દૂર થઈ શકતી નથી.

ઉલ્લેખનીય છે કે ચીનની આ રિટેલ કંપની માત્ર 'નાખુશ રજા' પૂરતી સીમિત નથી, પરંતુ પોતાના કર્મચારીઓના કલ્યાણ માટે જાણીતી છે. અહીં કર્મચારીઓ માટે દૈનિક માત્ર સાત કલાકના કામના કલાકો, શનિ-રવિની રજાઓ ઉપરાંત વાર્ષિક ૩૦ થી ૪૦ દિવસની નિયમિત રજાઓ અને ચાઇનીઝ ન્યુ યર દરમિયાન પાંચ વધારાની રજાઓ આપવામાં આવે છે. હવે જોવાનું એ રહે છે કે ભારતીય કંપનીઓ કર્મચારીઓના માનસિક સ્વાસ્થ્ય અને વર્ક-લાઈફ બેલેન્સને સુધારવા માટે ચીનની આ નીતિમાંથી કોઈ પ્રેરણા લે છે કે પછી તેને માત્ર એક ચર્ચાનો વિષય બનાવીને છોડી દે છે.