કાઠમંડુ : નેપાળના વડાપ્રધાન બાલેંદ્ર શાહે સોમવારે કાઠમંડુના સિંહા દરબાર સ્થિત વડાપ્રધાન કાર્યાલય ખાતે ભારતીય રાજદૂત નવીન શ્રીવાસ્તવ સાથે એક મહત્વપૂર્ણ બેઠક યોજી હતી. આ બેઠક દરમિયાન તેમણે ભારત સાથે નેપાળના "ઐતિહાસિક અને ગાઢ સંબંધો" ને વધુ સશક્ત અને મજબૂત બનાવવાના મહત્વ પર ખાસ ભાર મૂક્યો હતો.

 પ્રધાનમંત્રી સચિવાલય દ્વારા આપવામાં આવેલી માહિતી અનુસાર, આ ઉચ્ચસ્તરીય મુલાકાતમાં ભારત-નેપાળ દ્વિપક્ષીય સંબંધો, પરસ્પર હિત ધરાવતા વિષયો, વિકાસ ભાગીદારી તથા સરહદી અને આર્થિક સહયોગના વિવિધ ક્ષેત્રો પર સઘન ચર્ચા કરવામાં આવી હતી. ભારતીય રાજદૂત નવીન શ્રીવાસ્તવે વડાપ્રધાન બાલેંદ્ર શાહને અભિનંદન પાઠવ્યા હતા અને ભારત તરફથી બંને દેશો વચ્ચેની ભાગીદારીને નવી ઊંચાઈઓ પર લઈ જવાની દ્રઢ પ્રતિબદ્ધતા વ્યક્ત કરી હતી.

 બેઠક બાદ ભારતીય રાજદૂત નવીન શ્રીવાસ્તવે સોશિયલ મીડિયા પ્લેટફોર્મ X પર પોસ્ટ કરીને જણાવ્યું હતું કે, "નેપાળના માનનીય વડાપ્રધાન બાલેંદ્ર શાહ સાથે મુલાકાત કરવાનો આનંદ થયો. તેમને ભારતના વડાપ્રધાન નરેન્દ્ર મોદી તરફથી ઉષ્માભર્યા શુભેચ્છાઓ અને સંદેશ પાઠવ્યો હતો. ભારત-નેપાળ ભાગીદારીને વધુ ગાઢ બનાવવા માટે ખૂબ જ ફળદાયી વિચારોનું આદાન-પ્રદાન થયું છે."

 નોંધનીય છે કે, આ મુલાકાત રાજકીય દ્રષ્ટિએ પણ અત્યંત મહત્વપૂર્ણ માનવામાં આવે છે, કારણ કે વડાપ્રધાન બાલેંદ્ર શાહે અગાઉ વિદેશી રાજદૂતો અને વરિષ્ઠ અધિકારીઓ સાથે વ્યક્તિગત ('વન-ઓન-વન') બેઠકો ટાળવાની પોતાની નીતિમાં ફેરફાર કરવાનું શરૂ કર્યું છે. આ બેઠક બાદ તેઓ ચીનના રાજદૂત ઝાંગ માઓમિંગ તથા અમેરિકી દૂતાવાસના અધિકારીઓ સાથે પણ મુલાકાત કરનાર છે. વડાપ્રધાન શાહના આ સકારાત્મક અભિગમથી દક્ષિણ એશિયાઈ પ્રદેશમાં ભારત અને નેપાળ વચ્ચેના સહયોગી સંબંધો વધુ ગાઢ બનશે તેવો વિશ્વાસ વ્યક્ત કરવામાં આવી રહ્યો છે.