ન્યૂયોર્ક : પાકિસ્તાનમાં સિંધી સમુદાય સામે વધી રહેલા આર્થિક, રાજકીય અને સાંસ્કૃતિક દમન વચ્ચે સિંધી નેતાઓએ સંયુક્ત રાષ્ટ્ર (UN) અને આંતરરાષ્ટ્રીય સમુદાય સમક્ષ એક મોટો રાજદ્વારી મોરચો ખોલ્યો છે. જિયે સિંધ મુત્તાહિદા મહાઝ (JSMM) ના અધ્યક્ષ શફી બુરફત, સિંધુદેશ રાષ્ટ્રીય ચળવળ અને વૈશ્વિક સિંધી ડાયસ્પોરાના પ્રતિનિધિઓએ યુએન સેક્રેટરી જનરલ અને સિક્યુરિટી કાઉન્સિલને એક ખુલ્લી અપીલ જારી કરીને સિંધના અસ્તિત્વની રક્ષણ માટે યુએનની દેખરેખ હેઠળ મુક્ત અને ન્યાયી લોકમત (Referendum) યોજવાની માંગ કરી છે.

સિંધી નેતાઓએ પોતાની અપીલમાં આરોપ લગાવ્યો છે કે ૧૯૪૭ માં પાકિસ્તાનની સ્થાપના બાદથી જ પંજાબી વર્ચસ્વ ધરાવતી પાકિસ્તાની સેના અને શાસકો દ્વારા સિંધને એક "આંતરિક વસાહત" ની જેમ ચલાવવામાં આવી રહ્યું છે. સિંધુ નદીના પાણીનું ગેરકાયદેસર ડાયવર્ઝન કરીને ડેલ્ટા વિસ્તારને બંજર બનાવવામાં આવી રહ્યો છે. આ ઉપરાંત, થાર કોલસો, ખનિજ સંસાધનો અને તેલ જેવા કુદરતી સ્ત્રોતોની આડેધડ લૂંટ ચલાવીને સ્થાનિક સિંધી વસ્તીને તેમના જ વતનમાં મતાધિકાર અને આજીવિકાથી વંચિત રાખવામાં આવી રહ્યા છે.

અપીલમાં વધુમાં જણાવાયું છે કે પાકિસ્તાન સરકાર દ્વારા બહારના લોકોને વસાવીને કરાચી અને હૈદરાબાદ જેવા મુખ્ય શહેરોમાં વસ્તી વિષયક ફેરફારો (Demographic Changes) કરવાનો પ્રયાસ થઈ રહ્યો છે, જેથી મૂળ સિંધી લોકોનું રાજકીય પ્રતિનિધિત્વ ઘટી જાય. આ સિવાય, સિંધમાં પ્રભુત્વ ધરાવતી બિનસાંપ્રદાયિક અને સૂફી સંસ્કૃતિને તોડવા માટે ધાર્મિક ઉગ્રવાદી નેટવર્ક્સને પ્રોત્સાહન આપવામાં આવી રહ્યું છે. રાજકીય કાર્યકર્તાઓ અને પત્રકારોને બળજબરીથી ગુમ કરી દેવામાં આવે છે અથવા તેમની ન્યાયિક હત્યાઓ કરવામાં આવે છે.

આ આંતરરાષ્ટ્રીય અપીલમાં યુએન પાસે માંગ કરવામાં આવી છે કે સિંધમાં થતા માનવ અધિકારોના ઉલ્લંઘન અને સંસાધનોના શોષણની તપાસ માટે એક સ્વતંત્ર 'ફેક્ટ-ફાઇન્ડિંગ મિશન' મોકલવામાં આવે. સાથે જ, IMF અને વર્લ્ડ બેંકને અપીલ કરાઈ છે કે પાકિસ્તાનને આપવામાં આવતી અબજો ડોલરની લોનનો ઉપયોગ કલ્યાણકારી કાર્યોને બદલે લશ્કરી પ્રોજેક્ટ્સ અને ભ્રષ્ટાચારમાં થતો હોવાથી, આ નાણાકીય સહાય પર કડક માનવ અધિકાર શરતો લાદવામાં આવે. સિંધી નેતાઓએ આશા વ્યક્ત કરી હતી કે એક સ્વતંત્ર, ધર્મનિરપેક્ષ અને લોકશાહી 'સિંધુદેશ' દક્ષિણ એશિયા અને અરબી સમુદ્ર ક્ષેત્રમાં સ્થિરતા અને વેપાર સુરક્ષા સુનિશ્ચિત કરવામાં મહત્વપૂર્ણ ભૂમિકા ભજવશે.