નવી દિલ્‍હી ૧૧: દેશમાં ખાંડના ભાવમાં તીવ્ર વધારો થયો છે. કેટલીક જગ્‍યાએ ભાવ ૫૦ રૂપિયા પ્રતિ કિલોગ્રામને વટાવી ગયા છે. તહેવારોની મોસમ દરમિયાન રેકોર્ડબ્રેક ભાવ અને ખાંડની માંગને ધ્‍યાનમાં રાખીને, કેન્‍દ્ર સરકાર એક મોટું પગલું ભરી રહી છે. અછત અને ભાવ વધારાને રોકવા માટે, સરકાર ઇથેનોલ ઉત્‍પાદન માટે શેરડીના ઉપયોગને મર્યાદિત કરવાનું વિચારી રહી છે. રોઇટર્સના અહેવાલમાં બે સરકારી અને બે ખાંડ ઉદ્યોગનાસ્ત્રેતોનો ઉલ્‍લેખ કરવામાં આવ્‍યો છે.

દેશમાં ગયા મહિનામાં ખાંડના ભાવમાં આશરે ૧૦%નો વધારો થયો છે. તહેવારોની મોસમ દરમિયાન વપરાશ વધવાને કારણે આગામી ત્રણ મહિના સુધી ભાવ ઊંચા રહેવાની ધારણા છે. શેરડી ઉત્‍પાદક રાજ્‍યો મહારાષ્ટ્ર અને કર્ણાટકમાં ઓછા વરસાદને કારણે આગામી સિઝનમાં ખાંડનું ઉત્‍પાદન ઘટવાની પણ ધારણા છે. ચાલુ સિઝનના અંત સુધીમાં, એટલે કે સપ્‍ટેમ્‍બર સુધીમાં, ખાંડ મિલોએ આશરે ૩ મિલિયન મેટ્રિક ટન ખાંડ (કુલ ઉત્‍પાદનના ૧૦%) ઇથેનોલ ઉત્‍પાદન તરફ વાળ્‍યું હતું. જો નવી સિઝનમાં શેરડીમાંથી ઇથેનોલનું ઉત્‍પાદન પ્રતિબંધિત કરવામાં આવે છે, તો આ વધારાની ૩ મિલિયન ટન ખાંડ બજારમાં પ્રવેશ કરશે. આ વધારાની ખાંડ તેની કિમત ઘટાડશે.

સૂત્રોના જણાવ્‍યા અનુસાર, સરકાર ખાંડ મિલોને શેરડીના રસ અને બી-હેવી મોલાસીસમાંથી ઇથેનોલનું ઉત્‍પાદન કરવાથી પ્રતિબંધિત કરી શકે છે, કારણ કે તેમાં ખાંડનું પ્રમાણ વધુ હોય છે. તેના બદલે, મિલોને ફક્‍ત સી-હેવી મોલાસીસમાંથી જ ઇથેનોલનું ઉત્‍પાદન કરવાની મંજૂરી આપવામાં આવી શકે છે, જે મોટાભાગની ખાંડ શેરડીમાંથી કાઢ્‍યા પછી બાકી રહેલો અવશેષ છે. આના પરિણામે મોટાભાગની શેરડીનો ઉપયોગ ખાંડના ઉત્‍પાદન માટે થશે.

સરકારે પેટ્રોલમાં ૨૦% ઇથેનોલનું મિશ્રણ કરવાનો લક્ષ્યાંક નક્કી કર્યો છે. જો શેરડીમાંથી ઇથેનોલનો પુરવઠો ઘટશે, તો સરકાર આ લક્ષ્યને પૂર્ણ કરવા માટે મકાઈ અને ચોખાના ઉપયોગ પર ધ્‍યાન કેન્‍દ્રિત કરશે. દેશમાં મકાઈ અને ચોખાનો પૂરતો સ્‍ટોક છે, તેથી ઇથેનોલ મિશ્રણ કાર્યક્રમને અસર થશે નહીં