વોશિંગ્ટન, તા. ૧૧ : અમેરિકાના રાષ્ટ્રપતિ ડોનાલ્ડ ટ્રમ્પે ઈરાન દ્વારા અમેરિકા અને ઇઝરાયેલના હુમલામાં થયેલા નુકસાનનું વળતર માગવામાં આવ્યા બાદ હવે સામે ઈરાન પાસેથી જ વળતર માગવાની જાહેરાત કરી છે. ટ્રમ્પે પોતાના સામાજિક માધ્યમ પર જણાવ્યું કે ઈરાન સાથે સંકળાયેલા સંઘર્ષો અને રસ્તા પરના બોમ્બ હુમલાઓમાં માર્યા ગયેલા કે ગંભીર રીતે ઘાયલ થયેલા લોકો માટે અમેરિકા વળતરની માગણી કરશે. તેમણે જાન્યુઆરીમાં ઈરાનમાં થયેલા સરકારવિરોધી દેખાવો દરમિયાન મોતને ભેટેલા લોકોના પરિવારોને પણ ઈરાન દ્વારા વળતર ચૂકવવાની માગ કરી છે. 

ઈરાને અગાઉ કહ્યું હતું કે હોર્મુઝની સામુદ્રધુની સંપૂર્ણ રીતે ફરી ખોલવા માટે અમેરિકા દ્વારા વળતર, પ્રતિબંધોમાં રાહત અને લશ્કરી ધમકીઓનો અંત સહિતની શરતો પૂરી થવી જોઈએ. ઓમાન સાથે નવા જહાજી માર્ગ અંગે કરાર નજીક હોવાનું પણ ઈરાને જણાવ્યું હતું. ટ્રમ્પે વર્ષ ૨૦૦૦માં યમનના બંદરે અમેરિકન નૌકાદળના ‘યુએસએસ કોલ’ ઉપર થયેલા હુમલાનો પણ ઉલ્લેખ કરી વળતરની વાત કરી હતી. જોકે આ મુદ્દે મહત્વની હકીકત એ છે કે અમેરિકન તપાસ એજન્સીએ ‘યુએસએસ કોલ’ હુમલાની જવાબદારી અલ-કાયદા સાથે જોડી છે, ઈરાન સાથે નહીં. તેથી આ બાબતને ટ્રમ્પનો દાવો જ ગણવો જરૂરી છે. નવી વળતર-પ્રતિમાગણીથી હોર્મુઝ મુદ્દે ચાલી રહેલી વાટાઘાટો વધુ કઠિન બનવાની શક્યતા ઊભી થઈ છે.