રાંચી, તા. ૧૧ : ઝારખંડમાં ભરતી પરીક્ષાઓની કથિત ગેરરીતિ અને પેપર લીકના વિરોધમાં ચાલી રહેલા વિદ્યાર્થી આંદોલન દરમિયાન સોમવારે વિધાનસભા ઘેરાવ વખતે થયેલી અથડામણ બાદ પોલીસ હવે સીસીટીવી દૃશ્યો તપાસશે. રાંચીના વરિષ્ઠ પોલીસ અધિકારી રાકેશ રંજને જણાવ્યું છે કે શાંતિપૂર્ણ વિદ્યાર્થી દેખાવમાં કથિત રીતે ગડબડ સર્જનારા તત્ત્વોની સીસીટીવીના આધારે ઓળખ કરવામાં આવશે. આંદોલનના ૧૭મા દિવસે વિદ્યાર્થીઓ અને નોકરીના ઉમેદવારો વિધાનસભા તરફ કૂચ કરી રહ્યા હતા ત્યારે પોલીસે પાણીનો મારો, અશ્રુવાયુ અને લાઠીચાર્જનો ઉપયોગ કર્યો હતો. 

પોલીસનો દાવો છે કે કેટલાક દેખાવકારોએ બેરિકેડ તોડવાનો પ્રયાસ કર્યો, પથ્થરમારો કર્યો અને વાહનોને અટકાવ્યા, જ્યારે દેખાવકારોએ પોલીસ ઉપર કોઈ પૂરતી ચેતવણી વિના બળપ્રયોગ કરવાનો આરોપ મૂક્યો છે. પોલીસના જણાવ્યા મુજબ ૧૪ પોલીસકર્મી ઘાયલ થયા છે. રાંચી શહેરના પોલીસ વડા પારસ રાણાએ કહ્યું હતું કે સ્થિતિ નિયંત્રિત કરવા ખૂબ ટૂંકા સમય માટે ‘ન્યૂનતમ બળ’ વપરાયું હતું. 

વિદ્યાર્થીઓ ઝારખંડ જાહેર સેવા આયોગ અને ઝારખંડ સ્ટાફ સિલેક્શન કમિશનની ભરતી પરીક્ષાઓમાં કથિત ગેરરીતિ અંગે પરીક્ષા વ્યવસ્થામાં ફેરફાર, કેટલીક પરીક્ષાઓ રદ કરવા અને કેન્દ્રીય તપાસની માગ કરી રહ્યા છે. પોલીસ કાર્યવાહી સામે આજે ભારતીય જનતા પાર્ટીએ ઝારખંડ બંધનું એલાન પણ આપ્યું છે.