વોશિંગ્ટન: તા.૧૧ — યુનાઇટેડ સ્ટેટ્સમાં રહાતા અને વિઝા પર મુસાફરી કરતા વિદેશી નાગરિકો માટે અત્યંત મહત્વના સમાચાર સામે આવ્યા છે. રાષ્ટ્રપતિ ડોનાલ્ડ ટ્રમ્પના શાસનકાળ દરમિયાન યુએસ ડિપાર્ટમેન્ટ ઓફ સ્ટેટે આકરી ચકાસણી અભિયાન ચલાવીને ૧,૭૫,૦૦૦ થી વધુ વિદેશી નાગરિકોના વિઝા રદ કરી દીધા છે. કાયદાનું ઉલ્લંઘન, ગુનાહિત પ્રવૃત્તિઓ, વિઝા છેતરપિંડી અને રાષ્ટ્રીય સુરક્ષા માટે જોખમ ઊભું કરતા તત્વો સામે આ મોટું કડક રક્ષણાત્મક પાસું અપનાવવામાં આવ્યું છે.

કયા ગંભીર ગુનાઓને કારણે લેવાયા કડક પગલાં?

સ્ટેટ ડિપાર્ટમેન્ટના અહેવાલ મુજબ, મોટાભાગના કેસોમાં લો એન્ફોર્સમેન્ટ એજન્સીઓ સાથેના ઘર્ષણ અને કાનૂની કાર્યવાહી બાદ વિઝા રદ કરવામાં આવ્યા છે. જેમાં નશામાં વાહન ચલાવવું (DUI), ગંભીર શારીરિક હુમલો, ચોરી, ડ્રગ્સની તસ્કરી, બાળ શોષણ, માનવ તસ્કરી અને જાતીય ગુનાઓ જેવા કિસ્સાઓનો સમાવેશ થાય છે. એક કિસ્સામાં હેરોઇનના સેવન સાથે મર્યાદા કરતાં ત્રણ ગણા વધુ આલ્કોહોલ સાથે વાહન ચલાવતા પકડાયેલા નાગરિકનો વિઝા પણ રદ કરાયો છે.

'બર્થ ટૂરિઝમ' અને કરોડોની મેડિકલ છેતરપિંડીનો પર્દાફાશ

અમેરિકન વિઝા સિસ્ટમનો દુરુપયોગ રોકવા માટે દૂતાવાસોએ ખાસ ઝુંબેશ ચલાવી છે. ઉત્તર આફ્રિકાના એક અમેરિકી દૂતાવાસે જ ૧૦૦ થી વધુ એવા માતા-પિતાના વિઝા રદ કર્યા જેમણે માત્ર બાળકને યુએસ નાગરિકતા અપાવવાના હેતુથી 'બર્થ ટૂરિઝમ' નો સહારો લીધો હતો. આ ઉપરાંત $૫ મિલિયનથી વધુની બોગસ મેડિકેટ ફ્રોડ સ્કીમ ચલાવનારા તેમજ રોકાણકારો સાથે લાખો ડોલરની છેતરપિંડી કરનારા વ્યાવસાયિકો સામે પણ વિઝા રદ્દીકરણના આકરા આદેશો છૂટ્યા છે.

સોશિયલ મીડિયા પર હિંસાત્મક ટિપ્પણીઓ અને વિદેશ નીતિ

માત્ર ગુનાહિત કૃત્યો જ નહીં, પરંતુ રાજકીય હિંસાને પ્રોત્સાહન આપનારા કે તેની ઉજવણી કરનારા વિદેશીઓ સામે પણ સ્ટેટ ડિપાર્ટમેન્ટે સખત વલણ અપનાવ્યું છે. ચાર્લી કિર્કના મૃત્યુ અંગે વિવાદાસ્પદ અને હિંસક ટિપ્પણીઓ કરનારા અનેક વિદેશીઓના વિઝા તુરંત રદ કરાયા છે. વિદેશ મંત્રી માર્કો રુબિયોના નિર્દેશ હેઠળ ક્યુબન અને ઈરાની સરકાર સાથે જોડાયેલા શંકાસ્પદ નાગરિકોને રાષ્ટ્રીય સુરક્ષા અને વિદેશ નીતિના ધોરણે દેશનિકાલ કરવાની પ્રક્રિયા હાથ ધરાઈ છે.

અમેરિકી તંત્રનો સ્પષ્ટ સંદેશ

યુએસ સ્ટેટ ડિપાર્ટમેન્ટે સ્પષ્ટ શબ્દોમાં ચેતવણી આપી છે કે વિદેશી નાગરિકો માટે સતત ચકાસણી પ્રક્રિયા (Continuous Vetting) ચાલુ રહેશે. તંત્રએ ભારપૂર્વક જણાવ્યું કે, "અમેરિકન વિઝા એ એક વિશેષાધિકાર (Privilege) છે, કોઈ અધિકાર (Right) નથી." જો કોઈ પણ વ્યક્તિ વિઝા શરતોનો ભંગ કરશે કે અમેરિકન સમાજ માટે ખતરો બનશે, તો તેની સામે વિના સંકોચે કાર્યવાહી કરવામાં આવશે.