નવી દિલ્હી : ભારત સરકારની મહત્વાકાંક્ષી 'પ્રધાનમંત્રી ઉજ્જવલા યોજના' (PMUY) ને ફરી એકવાર આંતરરાષ્ટ્રીય સ્તરે મોટી માન્યતા મળી છે. ઇન્ટરનેશનલ એનર્જી એજન્સી (IEA) ના પ્રમુખ ફાતિહ બિરોલે ભારતની આ LPG યોજનાની ભૂરી-ભૂરી પ્રશંસા કરતાં જણાવ્યું છે કે, આ કાર્યક્રમે દેશના કરોડો ગ્રામીણ પરિવારો અને ખાસ કરીને મહિલાઓના જીવનમાં ક્રાંતિકારી બદલાવ આણ્યો છે. તેમણે ઉમેર્યું હતું કે આ યોજના અને મહિલા મતદારોની શક્તિએ વડાપ્રધાન નરેન્દ્ર મોદીની રાજકીય સફળતામાં અત્યંત નિર્ણાયક ભૂમિકા ભજવી છે.

૧૦ કરોડથી વધુ કનેક્શન અને રૂ. ૧૨,૦૦૦ કરોડની સબસિડી

મે ૨૦૧૬માં ઉત્તર પ્રદેશના બલિયાથી શરૂ થયેલી આ યોજના હેઠળ અત્યાર સુધીમાં ૧૦.૩૩ કરોડથી વધુ ગરીબ પરિવારોને સ્વચ્છ રસોઈ ગેસના કનેક્શન પૂરા પાડવામાં આવ્યા છે. લાકડા અને કોલસાના ઝેરી ધુમાડામાંથી મહિલાઓને મુક્તિ અપાવવા માટે લાવવામાં આવેલી આ યોજના માટે સરકારે વર્ષ ૨૦૨૫-૨૬ માટે ₹૧૨,૦૦૦ કરોડની જંગી સબસિડી મંજૂર કરી છે, જે અંતર્ગત લાભાર્થીઓને સિલિન્ડર દીઠ ₹૩૦૦ ની સીધી સહાય પૂરી પાડવામાં આવે છે.

વૈશ્વિક પડકારો વચ્ચે સબસિડીમાં ફેરફાર

જોકે, તાજેતરમાં પશ્ચિમ એશિયામાં સર્જાયેલા ભૌગોલિક-રાજકીય સંકટ અને વૈશ્વિક સ્તરે એલપીજીના ભાવમાં થયેલા વધારાને કારણે યોજના સામે નવા પડકારો પણ ઊભા થયા છે. આંતરરાષ્ટ્રીય કિંમતોના દબાણને પહોંચી વળવા સરકારે ઉજ્જવલા યોજના હેઠળ મળતા વાર્ષિક સબસિડીવાળા સિલિન્ડરની સંખ્યા ૯ થી ઘટાડીને ૪ કરી છે. વૈશ્વિક આંચકાઓ વચ્ચે પણ ગરીબ પરિવારો સતત સ્વચ્છ ઇંધણનો ઉપયોગ કરતા રહે તે સુનિશ્ચિત કરવું એ હવે સરકાર સામે મુખ્ય પ્રાથમિકતા બની રહેશે.