દમાસ્કસ :   સીરિયાની સ્પેશિયલ ટ્રાન્ઝિશનલ કોર્ટે દેશના ભૂતપૂર્વ રાષ્ટ્રપતિ બશર અલ-અસદ અને તેમના ભાઈ માહેર અલ-અસદને માનવતા વિરુદ્ધના ગુનાઓ તથા યુદ્ધ ગુનાઓ બદલ ગેરહાજરીમાં મૃત્યુદંડની આકરી સજા ફટકારી છે. ડિસેમ્બર ૨૦૨૪માં બળવાખોર દળોના આક્રમણ બાદ અસદ અને તેમનો પરિવાર મોસ્કો ભાગી ગયા હતા. અદાલતે આદેશ આપ્યો છે કે બંને ભાઈઓ તેમજ તેમની ક્રૂર સુરક્ષા સંસ્થા સામે આંતરરાષ્ટ્રીય કાનૂની માધ્યમો દ્વારા કેસ ચલાવીને તેમને સીરિયા પાછા લાવવાના અને સજા અમલમાં મૂકવાના તમામ પ્રયાસો ચાલુ રાખવામાં આવશે.

કોર્ટે અસદના પિતરાઈ ભાઈ અને દારા પ્રાંતમાં રાજકીય સુરક્ષા વિભાગના ભૂતપૂર્વ વડા આતેફ નજીબને પણ સખત સજા ફટકારી છે. ૨૦૧૧માં ભીંતચિત્રો પર અસદ વિરોધી સૂત્રો લખવા બદલ ૧૫ બાળકોને અમાનુષી ત્રાસ આપવાનો નજીબ પર આરોપ હતો, જે ઘટના બાદ સમગ્ર સીરિયામાં ૧૪ વર્ષ લાંબુ ગૃહયુદ્ધ ફાટી નીકળ્યું હતું. ટ્રાયલ દરમિયાન નજીબને પાંજરામાં બેસાડીને જેલના ગણવેશમાં કાર્યવાહી સંભળાવવામાં આવી હતી, જેને સીરિયાની નવી સરકારે ન્યાયી શાસન તરફનું સૌથી મોટું પગલું ગણાવ્યું છે.

બશર અલ-અસદના ૨૪ વર્ષ જૂના શાસનના પતન બાદ પણ સીરિયામાં સંપૂર્ણ શાંતિ સ્થપાઈ નથી. માર્ચ ૨૦૨૫ અને જુલાઈ ૨૦૨૫ દરમિયાન અલાવાઈટ અને ડ્રુઝ સમુદાય વચ્ચે થયેલી સાંપ્રદાયિક હિંસામાં ૩,૦૦૦ થી વધુ લોકો જીવ ગુમાવી ચૂક્યા છે. વર્તમાન સીરિયન સત્તાવાળાઓ અસદ યુગના ગુનેગારોની ધરપકડ કરીને સંક્રમણકારી ન્યાય સમિતિઓની સ્થાપના કરી રહ્યા છે, જેથી દાયકાઓથી ચાલી આવતી હિંસા અને સામાજિક વિભાજનનો અંત લાવી શકાય.