નવી દિલ્હી : ભારત અને યુનાઇટેડ સ્ટેટ્સ વચ્ચેના સંબંધોને નવી ઊંચાઈએ લઈ જવા માટે રાજદ્વારી સ્તરે મોટા હલચલ જોવા મળી રહી છે. અમેરિકન રાજદૂત અને રાષ્ટ્રપતિ ડોનાલ્ડ ટ્રમ્પના દક્ષિણ તેમજ મધ્ય એશિયા માટેના ખાસ દૂત સર્જિયો ગોરે ભારતના રાષ્ટ્રીય સુરક્ષા સલાહકાર (NSA) અજિત ડોભાલ સાથે સતત બીજા દિવસે બેક-ટુ-બેક ઉચ્ચસ્તરીય બેઠકો કરી છે. વિદેશ મંત્રાલયે આ બેઠકોને અત્યંત મહત્વપૂર્ણ અને ફળદાયી ગણાવી છે, જેમાં બંને દેશો વચ્ચેની વ્યાપક વૈશ્વિક વ્યૂહાત્મક ભાગીદારીને વધુ મજબૂત કરવા અંગે વિસ્તૃત ચર્ચા થઈ હતી.

વૈશ્વિક સુરક્ષા અને વેપાર ક્ષેત્રે સહયોગ વધારવા પર ભાર

વિદેશ મંત્રાલયના પ્રવક્તા રણધીર જયસ્વાલે એક પત્રકાર પરિષદમાં માહિતી આપતાં જણાવ્યું હતું કે બંને નેતાઓ વચ્ચેની આ મુલાકાતોમાં વેપાર, ઉર્જા સુરક્ષા, સંરક્ષણ અને મહત્વપૂર્ણ ટેકનોલોજી જેવા ક્ષેત્રોમાં દ્વિપક્ષીય પ્રગતિની સમીક્ષા કરવામાં આવી હતી. આ બેઠક બાદ સર્જિયો ગોરે સોશિયલ મીડિયા પ્લેટફોર્મ 'X' પર પોસ્ટ કરીને લખ્યું હતું કે, "વૈશ્વિક સુરક્ષાના સળગતા પડકારોનો સામનો કરવા માટે ભારત સાથેની અમારી ગાઢ ભાગીદારી ખૂબ જ મહત્વપૂર્ણ છે. યુએસ અને ભારત ઘણા સમાન લક્ષ્યો ધરાવે છે અને આ ભાગીદારી ઉત્તરોત્તર મજબૂત થઈ રહી છે."

પડોશી દેશોની સ્થિતિ અને ટેરિફ વિવાદ વચ્ચે મહત્વની બેઠક

આ હાઈ-પ્રોફાઈલ બેઠક એવા સમયે થઈ રહી છે જ્યારે પશ્ચિમ એશિયામાં ભારે તણાવ ચાલુ છે અને પાકિસ્તાન, સાઉદી અરેબિયા તેમજ તુર્કી જેવા દેશો વચ્ચે નવો સંરક્ષણ કરાર આકાર લઈ રહ્યો છે. બીજી તરફ, ભારત અને અમેરિકા વચ્ચે વેપાર અને ટેરિફ દરને લઈને ચાલી રહેલી વાટાઘાટો પણ નિર્ણાયક તબક્કામાં છે. ભારત ટ્રમ્પ વહીવટીતંત્ર પાસેથી ભવિષ્યમાં ટેરિફ ન વધારવાની કાયમી ખાતરી માંગી રહ્યું છે. તેવામાં રાષ્ટ્રપતિ ટ્રમ્પના સીધા પ્રતિનિધિ ગણાતા સર્જિયો ગોરની આ મુલાકાતને આગામી વેપાર કરાર માટે અત્યંત મહત્વની માનવામાં આવી રહી છે.